Nanchi Bakyanyike Bafwainwa Kubatizhiwa Nyi?

BA Carlosa bansemi babalume mu kyalo kya Philippines baambile’mba: “Natemwa bingi mwanami wamukazhi wipana kwingijila Yehoba, kabiji nayuka naye watemwa bingi.” Nsemi wamulume mwina Greece waambile’mba: “Amiwa ne mukazhami twasangalele bingi kimye baana betu babakazhi basatu kyo babatizhiwe ne kwikala Bakamonyi ba kwa Yehoba saka bakijitu banyike. Babena kununguluka mu bukine kabiji bengijila Yehoba na lusekelo.”

Bansemi bena Kilishitu baji na bishinka byakonsha kwibalengela kusangalala inge baana babo babatizhiwa, bino kimye kimo luno lusekelo luvwangamo ne kijikila. Nsemi wamukazhi umo waambile’mba: “Nasangalele bingi ne kwakamwa.” Mambo ka a kusangalela ne kwakamwa pa kimye kimo? Waambile’mba: “Mambo nayukile namba pano mwanami byamushajila mwine ne Yehoba.”

Kwikala Kamonyi wabatizhiwa wingijila Yehoba, ke kikonkwanyi kyafwainwa kwibikila bakyanyike bonse. Bansemi bakamwa Lesa beshikisha’mba: ‘Nayuka namba mwanami wanunguluka ku mupashi, pano bino kana wakosa kya kukonsha kuchinuzhuka byubilo byatama ne kwikala wabula kaneneno kwi Yehoba?’ Bakwabo nabo bakonsha kwishikisha bene’mba: ‘Na mambo a lweseko lwa kukeba bintu bya ku mubiji, nanchi mwanami ukatwajijila kwingijila Lesa na kizaku ne na lusekelo nyi?’ Byo kiji bino, ñanyi lutangijilo lwa mu Baibolo lwakonsha kukwasha bansemi kuyuka’mba mwanabo wafikilamo kubatizhiwa?

Kwikala Mwana ja Bwanga kyo Kintu Kyakilamo Kunema

Mu kifulo kya kumankula jifumbi muntu jo afwainwa kubatizhiwapo, Mambo a Lesa alumbulula bintu bimwesha’mba muntu wafikilamo kubatizhiwa. Yesu wakambizhe baana banji ba bwanga ‘kusambisha ba mu mikoka yonse ya bantu ne kwaluka ke baana ba bwanga.’ (Mat. 28:19) Onkao mambo, baana ba bwanga ba kwa Yesu bo bafwainwa kubatizhiwa.

Mwana ja bwanga ye ñanyi? Buku wa Insight on the Scriptures walumbulula’mba: “Kino kyambo kingila ku bonse baitabila mwi Kilishitu ne kulondela mafunjisho anji.” Nanchi banyike nabo bakonsha kwikala baana ba bwanga bakine ba kwa Kilishitu nyi? Nyenga waingila bumishonale pa myaka 40 mu Latin America wanembele pa byo kyajinga kwi aye mwine, nkasanji ne kolojanji, bonse babakazhi amba: “Byo twayukile’mba tubena kukeba kwingijila Yehoba ne kwikala mu Paladisa, kechi twajinga banyike bakukankalwa kuyuka kyo twaubilenga ne. Kwipana kwitukwashanga kushinda meseko apitamo bakyanyike. Kechi twilangulusha pa byo twipaine kwingijila Lesa saka tukiji banyike ne.”

Mwakonsha kuyuka byepi amba pano mwanenu wafikilamo kwikala mwana ja bwanga wa kwa Kilishitu? Baibolo waamba’mba: “Nangwa mwanyike wimwesha byo aji monka mu byubilo byanji, kana mwingilo wanji wawama ne koloka nyi?” (Mana 20:11) Monai bintu byakonsha kwimukwasha kuyuka’mba wakyanyike ubena ‘kuyilako palutwe’ kumwesha’mba ubena kufikilamo kwikala mwana ja bwanga.—1 Timo. 4:15.

Biyukilo bya Bwana ja Bwanga

Nanchi mwanenu wimumvwina nyi? (Kolo. 3:20) Nanchi wingila mingilo ya pa nzubo yo mu mutuma nyi? Baibolo waamba pe Yesu byo akijinga na myaka ya kusemwa 12 amba: ‘Watwajijile kwibanekenena bansemi banji.’ (Luka 2:51) Na mambo a bumbulwa kulumbuluka, kafwako mwana nangwa umo wakonsha kunekenena bansemi banji mu bintu byonsetu ne. Bino bena Kilishitu bakine ‘balondela mu ngayo ya kwa Yesu.’ Onkao mambo, bakyanyike bakeba kubatizhiwa bayukanyikilwa ku byo bakokela bansemi babo.—1 Pe. 2:21.

Akilangulukai pa ano mepuzho: Nanchi mwanenu ‘ukebesha Bufumu bwa Lesa’ kupichila mu kuya mu mwingilo nyi? (Mat. 6:33) Nanchi watemwa kwisamba mambo awama na bakwabo nyi, inyi mumukanjikizha kuya mu mwingilo wa mu bujimi ne kusapwila ku nzubo ku nzubo? Abya wayuka byo kilumbulula kwikala musapwishi wabula kubatizhiwa nyi? Nanchi ubwelako ku bantu bamwesheshe lusekelo bo ataine pa kusapwila mu nyaunda nyi? Abya wiyukanyikisha ku bakwabo ne ku bafunjishi pa sukulu amba Kamonyi wa kwa Yehoba nyi?

Nanchi wanemeka kupwila nyi? (Sala. 122:1) Abya ukumbulapo pa Lufunjisho lwa Kyamba kya Usopa ne pa Lufunjisho lwa Baibolo lwa Kipwilo? Nanchi majashi a mu Sukulu wa Mwingilo wa Lesa wiamba na lusekelo nyi?—Hebe. 10:24, 25.

Nanchi mwanenu uchinuzhuka byubilo byatama kupichila mu kusala balunda ku sukulu ne kukwabotu nyi? (Mana 13:20) Watemwa nyimbo, mafilimu ne makayo a mutundu ka kabiji Intaneti wiingijisha byepi? Nanchi ñambilo ne byubilo byanji bimwesha’mba ulondela mizhilo ya mu Baibolo nyi?

Nanchi mwanenu wayuka bulongo Baibolo nyi? Abya bintu byo afunda pa Kupopwela kwa Kisemi wakonsha kwibyamba mu byambo byanji nyi? Nanchi wakonsha kulumbulula bukine bwa mu Baibolo? (Mana 2:6-9) Nanchi watemwa kutanga ne kufunda Baibolo ne mabuku anemba kalume wakishinka kabiji wa maana nyi? (Mat. 24:45) Abya wipuzhapo mepuzho pa mafunjisho a mu Baibolo ne pa byepelo byo abula kumvwisha nyi?

Ano mepuzho akonsha kwimukwasha kuyuka inge mwanenu ubena kununguluka ku mupashi nangwa ne. Panyuma ya kulangulukapo pa ano mepuzho, kampe mwakonsha kumona’mba mwanenu wafwainwa kuwamishako mumo mumo saka akyangye kubatizhiwa. Bino inge byubilo byanji byamwesha patoka’mba wafikilamo kwikala mwana ja bwanga, kabiji ne kwipana wipana kala kwingijila Lesa, mwakonsha kumuswisha kubatizhiwa.

Bakyanyike Bakonsha Kutota Yehoba

Bakalume ba Lesa bavula batendekele kumwesha bukishinka saka bakijitu banyike. Akilangulukai byajinga Yosefwa, Samwela, Yosiya ne Yesu. (Nte. 37:2; 39:1-3; 1 Sam. 1:24-28; 2:18-20; 2 Moba 34:1-3; Luka 2:42-49) Kabiji baana babakazhi bana ba kwa Filipa baawile bungauzhi nabo bafwainwa bebafunjishe kufumatu ku bwanyike.—Byu. 21:8, 9.

Kamonyi umo mu kyalo kya Greece waambile’mba: “Nabatizhiwe sanji na myaka 12. Kechi nelangulushapo pa byo nafuukwile ne. Papita ne myaka 24, kabiji naingila mwingilo wa kimye kyonse myaka 23. Kutemwa Yehoba kwankwashanga kushinda meseko apitamo bakyanyike. Byo nakijinga na myaka 12, kechi nayukile Binembelo byonka byo nebiyuka luno ne. Bino nayukile namba namutemwa Yehoba kabiji nakebelenga kumwingijila myaka ne myaka. Nji bingi na lusekelo mambo wankwasha kutwajijila mu mwingilo wanji.”

Bakulumpe ne banyike bonse bafikilamo kwikala baana ba bwanga bakine bafwainwa kubatizhiwa. Mutumwa Paulo wanembele’mba: ‘Na muchima, muntu witabila ne kumona bololoke; kabiji na kanwa nako witabila ne kumona lupulukilo.’ (Loma 10:10) Inge mwana ja bwanga wakyanyike wa kwa Kilishitu wabatizhiwa, bansemi ne aye mwine kibaletela bingi lusekelo, mambo ke kintu kyanema bingi mu bwikalo bwa muntu. Kange muswishe kintu nangwa kimo kwimulengela anweba ne baana benu kubula kukekalapo na luno lusekelo ne.

[Tubyambo twa mushi]

[Kitenguluzha pa peja 5]

Mweno Yawama ya Lubatizhilo

Bansemi bamo bamona baana babo inge babatizhiwa’mba bauba bingi bulongo, pano bino’mba bebika mu kizumba byonka byo kikala inge muntu watambula kitupa kya kwendesha motoka. Nanchi kubatizhiwa ne kutendeka kwingila mwingilo wazhila kwiletelelatu nyi? Baibolo kechi byobyo aamba ne. Byambo bya Mana 10:22 byamba’mba: “Mapesho a Yehoba o alengela muntu kunonka; kabiji mingilo yanji kechi inungako kintu ne.” Kabiji Paulo wanembejile wakyanyike Timoti amba: “Pakuba munema wa kunemeka Lesa wa kwikizhamo ne muchima kyo kya kumwenamo byavula.”—1 Timo. 6:6.

Kwambatu kine, kwingijila Yehoba kechi kwapela ne. Yelemiya wapichile mu makatazho apusana pusana mu mwingilo wa Lesa wa bungauzhi. Nangwa byonkabyo, wanembele pa mambo a kupopwela Lesa kwanji amba: “Byambo byenu byaikajile kwi amiwa ke bya kumwenamo lusekelo, ne bya kusangajika muchima wami; mambo amiwa natelwa na jizhina jenu, anweba Yehoba, Lesa wa mabumba.” (Yele. 15:16) Yelemiya wayukile’mba kwingijila Lesa kuleta bingi lusekelo. Ino ntanda ya kwa Satana yo ileta makatazho. Bansemi bafwainwa kukwasha baana babo kuyuka kino kishinka.—Yele. 1:19.

[Kitenguluzha/Kipikichala pa peja 6]

Nanchi Mwanami Wafwainwa Kukipembelelako Kubatizhiwa Nyi?

Kimye kimo nangwa kya kuba baana bafikilamo kubatizhiwa, bansemi bakonsha kukana’mba bakipembeleleko. Ñanyi bintu byakonsha kulengela bansemi kukanya mwanabo?

Nchina namba mwanami inge wabatizhiwa, mukuya kwa moba wakonsha kulenga mambo bamupangilamotu ne mu kipwilo. Nanchi ibyo kuba’mba bakyanyike bachina kubatizhiwa kechi baketotolwela kwi Lesa pa byo boba nenyi? Solomone wanembejile bakyanyike amba: “[Yuka’mba] Lesa ukakutotolwesha na mambo a bino bintu byonse.” (Sapwi. 11:9) Paulo wanembejile bantu ba mafumbi onse’mba: “Atweba bonsetu umo umo tukeambila mambo kwi Lesa.”—Loma 14:12.

Bantu babatizhiwa ne babula kubatizhiwa baketotolwela kwi Lesa pa bintu byo boba. Kange muvulame ne, Yehoba uzhikijila bakalume banji kupichila mu kubula kwibaleka kumona ‘lweseko lwakila pa bulume bwabo.’ (1 Ko. 10:13) Kikulutu ‘batekanya’ ne kwibikako kushinda meseko, Lesa ukebakwasha. (1 Pe. 5:6-9) Nsemi wamukazhi mwina Kilishitu wanembele’mba: “Baana babatizhiwa baji na bishinka byavula bya kwibalengela kuchinuzhuka kuba byatama bya mu ino ntanda. Mwanami wamulume wabatizhiwe na myaka 15, wamba’mba lubatizhilo luzhikijila. Waambile’mba: ‘Kulala mizhilo ya Yehoba kechi kwiyapotu ne mu milanguluko ne.’ Lubatizhilo lutundaika kuba byaoloka.”

Inge mwibafunjisha baana benu kukokela Yehoba kupichila mu byambo ne byubilo byenu, mwakonsha kuketekela’mba nabo bakobanga byonkabyo inge babatizhiwa. Byambo bya Mana 20:7 byaamba’mba: ‘Awa muntu waoloka wenda mu koloka kwanji ne baana banji bo asema bakekala ke bene ba lusekelo.’

Nafwainwa kutemwa mwanami patanshi wakifundapo mingilo imo. Bakyanyike bafwainwa kufunda kwingila mingilo pa kuba’mba bakakonshe kwimwenanga umvwe bakoma. Bino kutundaika baana kukinka manungo mu kufunda kufika palepa ne mu mali mu kifulo kya kuta muchima ku mpompwelo ya kine, ke kwibatwezha mu kizumba. Pa mambo a “nkunwa” nangwa’mba mambo a Bufumu abula kukoma, Yesu waambile’mba: “Ne awa wakushiwa nkunwa ya mu miba, ye yewa waumvwa mambo, kabiji bya kutabataba bya panopantanda, ne bujimbijimbi bwa bunonshi, byaipaya mambo, ne kupanga ke ne.” (Mat. 13:22) Kutundaika mwana kwibikila bikonkwanyi bya ku mubiji kwakonsha kumulengela kubula kwikala na mujojo wa kwingijila Lesa.

Mukulumpe umo mu kipwilo waambile pa bakyanyike bafikilamo kubatizhiwa bo bakanya ku bansemi babo amba: “Kukanya mwana kubatizhiwa kwakonsha kumulengela bumupashi bwanji kubwela panyuma kabiji ne kumulefula.” Kabiji kalama wa mwanzo wanembele’mba: “Wakyanyike utendeka kwimona kubula kufwainwa kwingijila Lesa. Wakonsha kulanguluka’mba bintu bya ku kyalo byobyo akonsha kuba bulongo.”

[Kipikichala]

Nanchi kuya ku sukulu wa univesiti kyo kintu kikatampe mu bwikalo bwenu nyi?

[Kipikichala pa peja 3]

Wakyanyike wakonsha kumwesha’mba wafikilamo kwikala mwana ja bwanga

[Bipikichala pa peja 3]

Kunengezha ne kukumbulapo pa kupwila

[Kipikichala pa peja 4]

Kukokela bansemi

[Kipikichala pa peja 4]

Kwingila mwingilo wa mu bujimi

[Kipikichala pa peja 4]

Lulombelo lwa pa bunke