Anweba Bansemi, Nanchi Mubena Kukwasha Baana Benu Kufikilamo Kubatizhiwa Nyi?

1. Ñanyi kintu bansemi bena Kilishitu kyo bakeba kushiinwa baana babo saka bakyangye kubatizhiwa?

BA BLOSSOM BRANDT balumbulwile bintu byamwekele kimye kyo bafuukwilepo kubatizhiwa. Baambile’mba: “Papichile bañondo bavula na kwambilatu batata ne bamama namba mbena kukeba kubatizhiwa, kabiji twisambangapo bingi. Bakebelenga kunkwasha kuyuka buneme bwa kintu kyo nafuukwilepo kuba. Nabatizhiwe pa 31 December, 1934.” Lelo jino, bansemi bena Kilishitu nabo bakeba bingi kukwasha baana babo kufuukula bintu bulongo. Kukankazhama nangwa kubanda kubatizhiwa kwakonsha konauna bulunda bwa mwana ne Lesa. (Yako. 4:17) Nangwa byonkabyo, bansemi bakeba kushiinwa’mba baana babo saka bakyangye kubatizhiwa bayuka byavwangiwamo mu kwikala mwana wa bwanga wa kwa Kilishitu.

2. (a) Ñanyi lukatazho lumo lwataana bakalama ba myanzo? (b) Tusakwisamba pa ka mu uno mutwe?

² Bakalama ba myanzo bamo bataana kuba’mba banyike bavula bakomena mu bisemi bya bena Kilishitu bino kechi babatizhiwa ne. Javula bano banyike bapwila ne kusapwila. Balanguluka’mba ne abo nabo Bakamonyi ba kwa Yehoba. Bino na mambo a bintu bimo, kechi bakeba kwipana kwi Yehoba ne kubatizhiwa ne. Ki ka kilengela? Bimye bimo bansemi babo bo bebatundaika kubula kubatizhiwa bukiji. Mu uno mutwe, tusakwisamba pa bintu bimo bilengela bansemi bena Kilishitu bamo kubula kukwasha baana babo kwipana ne kubatizhiwa.

NANCHI MWANAMI WAKOMA KUFIKA PA JIFUMBI JA KUBATIZHIWA NYI?

3. Ñanyi kintu kyaakaminwe bansemi ba ba Blossom?

³ Bansemi ba ba Blossom bo twaambapo mu jifuka jitanshi baakaminwe kuba’mba uno mwanabo wamukazhi kechi wakomene kya kuba wayuka buneme bwa lubatizhilo ne. Pano bansemi bakonsha kuyuka byepi inge kya kuba mwanabo wafikilamo kwipana?

4. Mukambizho wa kwa Yesu uji pa Mateo 28:19, 20 wakonsha kukwasha byepi bansemi pa kufunjisha baana babo?

⁴ Tangai Mateo 28:19, 20. Byonka byo twisambile mu mutwe wafumako, Baibolo kechi watongolapo myaka yafwainwa kwikala na muntu pa kuba’mba abatizhiwe ne. Nangwa byonkabyo, kulanguluka pa byo kilumbulula kwikala mwana wa bwanga kwakonsha kukwasha bingi bansemi. Kyambo kya Kingiliki kyatuntululwa’mba ‘kufunjisha bantu kwikala ke baana ba bwanga’ kiji pa Mateo 28:19, kilumbulula kufunjisha mu jishinda ja kukwasha bantu kufikilamo kwikala baana ba bwanga. Mwana wa bwanga ke muntu ufunda ne kukwatakanya mafunjisho a kwa Yesu ne kulama mikambizho yanji. Onkao mambo, kikonkwanyi kyafwainwa kwibikila bansemi bena Kilishitu ke kufunjisha baana babo kufumatu ku bulukeke ne kwibakwasha kwikala baana bwanga ba kwa Kilishitu babatizhiwa. Ibyo, lukeke kechi wakonsha kufikilamo kubatizhiwa ne. Pano bino, Baibolo umwesha’mba nangwatu baana babacheche bakonsha kukwatakanya bukine bwa mu Baibolo.

5, 6. (a) Jishinda Timoti jo bamulumbulwilamo mu Baibolo jitukwasha kuyuka ka pa lubatizhilo lwanji? (b) Bansemi bakonsha kukwasha byepi baana babo bulongo?

⁵ Timoti wajinga mwana wa bwanga watemenwe bukine saka akijitu mwanyike. Mutumwa Paulo waambile’mba Timoti wafunjile bukine bwa mu Binembelo kufumatu ku bulukeke. Nangwa kya kuba Timoti wakomejile mu kisemi kyo baabenejilemo bupopweshi, bainanji bajinga Bayudea ne bankambo yanji babakazhi bamukwashishe kuyuka Binembelo byonka Bayudea byo bebiyukile. Kyafuminemo, waikele na lwitabilo lwakosa bingi. (2 Timo. 1:5; 3:14, 15) Byo afikizhenga myaka ya kusemwa 20, Timoti wajinga mwana wa bwanga wafikijilemo kwingila mingilo mu kipwilo.—Byu. 16:1-3.

⁶ Nangwa byonkabyo, baana bapusana pusana, bamo bakoma bukiji, bakwabo ne. Bamo bakoma bukiji mu maana kabiji bakwatakanya bukine ne kufuukula bintu bulongo kabiji bakeba kubatizhiwa. Bakwabo kana bakomako bino bafikilamo kubatizhiwa. Onkao mambo, bansemi bayuka bulongo nkomeno ya baana kechi bakonsha kukanjikizha baana kubatizhiwa ne. Bino bakwasha mwana yense kukomenako mu maana a kuyuka Lesa ne kutwajijila kuyilako palutwe. Bansemi bakonsha kusangalala inge mwanabo kealondele byambo biji pa Byambo bya Maana 27:11. (Tangai.) Pano bino, kechi bafwainwa kulubako ku kikonkwanyi kyabo, kya kukwasha baana babo kwikala baana ba bwanga ba kwa Kilishitu ne. Na mambo a kino, bansemi bafwainwa kulanguluka pa buno bwipuzho, ‘Nanchi mwanami wafunda byavula pe Lesa kya kuba wafuukulapo kwipana ne kubatizhiwa nyi?’

NANCHI MWANAMI WAFUNDA BYAVULA PE LESA NYI?

7. Nanchi kikebewa kuyukatu byonse bya mu Baibolo pa kuba’mba muntu abatizhiwe nyi? Lumbululai.

⁷ Bansemi byo baji bafunjishi mu kisemi, bakeba baana babo kuyukisha bukine pa kuba’mba bepane kwi Lesa. Nangwa byonkabyo, kechi kikebewa kuyukatu byonse bya mu Baibolo bino muntu wafuukulapo kwipana kwi Lesa ne kubatizhiwa ne. Baana ba bwanga bonse bafwainwa kutwajijila kufunjilapo bikwabo nangwatu inge babatizhiwa. (Tangai Kolose 1:9, 10.) Onkao mambo, ñanyi bintu byafwainwa kufunda muntu saka akyangye kubatizhiwa?

8, 9. Twakonsha kufunjilako ka ku jishimikila ja kwa Paulo ne muota?

⁸ Bansemi bakonsha kufunjilako byavula ku byaubile kisemi kimo mu myaka kitota kitanshi. (Byu. 16:25-33) Pa lwendo lwanji lwa bubiji lwa bumishonale mu 50 C.E., Paulo wayile ku Filipai. Byo ajinga kokwa, aye ne Silasa bebapelemo mambo a bubela ne kwibakasa. Bufuku kwaubiwe kitentanshi kikatampe, kya kuba ne bitendekesho bya kaleya byasunkene, kabiji binzhilo byashinkukile. Muota walangulukile’mba bakaili banyema, kabiji wakebelenga kwiipaya mwine, bino Paulo wamukainye. Paulo ne Silasa basapwijile uno muota ne kisemi kyanji. Kutemwa bukine bo bafunjile pe Yesu kwalengejile kino kisemi kuba byepi? Babatizhiwe ponkapotu kwa kubula kutaya kimye. Twakonsha kufunjilako ka ku jino jishimikila?

⁹ Kyamweka uno muota wajinga mushilikale wa bena Loma kala. Kechi wayukile Binembelo ne. Onkao mambo, pa kuba’mba ayuke Binembelo, wafwainwe kufunda mafunjisho atanshi a mu Baibolo, kuyuka byo kilumbulula kwikala kalume wa Lesa, ne kufuukulapo kukookela mafunjisho a kwa Yesu. Mu kimyetu kicheche, bukine bwa mu Binembelo bo afunjile bwamulengejile kwipana ne kubatizhiwa. Kabiji kufuma juba jo abatizhiwe, watwajijile kufunjilapo bikwabo pe Lesa. Onkao mambo, byonka byamwesha jino jishimikila, mwakonsha kuba byepi inge mwanenu wamwesha’mba wakwatakanya mafunjisho atanshi a mu Binembelo, kubikapo ne buneme bwa kwipana ne lubatizhilo? Anweba bansemi bena Kilishitu mwakonsha kulanguluka’mba mwanenu kechi wakonsha kuya ku bakulumpe mu kipwilo kuba’mba besambe nanji bamone inge wafikizha bikebewa pa kuba’mba abatizhiwe ne.a Byonkatu byuba baana ba bwanga bonse babatizhiwa, ukatwajijila kufunjilapo bikwabo pa kyaswa muchima wa Yehoba mu bumi bwanji bonse, myaka ne myaka.—Loma 11:33, 34.

ÑANYI KINTU MWANAMI KYO AFWAINWA KUTANGIZHAKO, SUKULU NYI, INYI KUBATIZHIWA?

10, 11. (a) Bansemi bamo balanguluka’mba ka? (b) Ñanyi kintu bansemi kyo bafwainwa kuteshako muchima?

¹⁰ Bansemi bamo bakonsha kulanguluka’mba kyakonsha kuwama mwanabo patanshi kukifunda sukulu ne kutwela nkito apa bino wabatizhiwa. Ino milanguluko kechi yakonsha kutama ne, bino abya kuba byobyo kwakonsha kukwasha mwana kwikala na lusekelo nyi? Ne kyakilamo kunema, nanchi ino ndangulukilo yakwatankana na byaamba Binembelo nyi? Mambo a Yehoba atundaika banyike kuba byepi?—Tangai Musapwishi 12:1.

¹¹ Kyawama bingi kuvuluka kuba’mba ino ntanda ne byonse bijiimo bilengela bantu kubula kuba kyaswa muchima wa Yehoba ne kubula kulanguluka byonka byo alanguluka. (Yako. 4:7, 8; 1 Yoa. 2:15-17; 5:19) Bulunda bwakosa ne Yehoba bo bukazhikijila mwana ku bujimuku bwa kwa Satana, ntanda yanji ne ku milanguluko ya bantu babula kwakamwa Lesa. Inge nsemi keatundaike baana kufunda masukulu ne kukeba makito, wakonsha kulengela mwana kubula kuyuka bintu byanema mu bwikalo. Abya nsemi mwina Kilishitu wakonsha kuleka mwananji kuba’mba alangulukenga byonka bilanguluka bantu ba mu ntanda nyi? Lusekelo lwa kine lufuma mu kutangizhako Yehoba mu bwikalo bwetu.—Tangai Salamo 1:2, 3.

KYAKONSHA KWIKALA BYEPI INGE MWANAMI WALENGA MAMBO?

12. Mambo ka bansemi bamo o babujila kukeba baana babo kubatizhiwa bukiji?

¹² Nsemi wamukazhi umo mwina Kilishitu pa kulumbulula kintu kimo kyamulengelanga kukanya mwananji wamukazhi kubatizhiwa waambile’mba, “Nachinanga’mba bakamupanga mu kipwilo.” Byonka byaambile uno nyenga, bansemi bamo balanguluka’mba kyakonsha kuwama mwanabo kupembelela kubatizhiwa pa kuba’mba akikomeko ekale na maana a bukulumpe. (Nte. 8:21; Maana 22:15) Bakonsha kulanguluka’mba, ‘Inge mwanami kechi wabatizhiwa ne, kechi bakonsha kumupanga mu kipwilo inge walenga mambo ne.’ Mambo ka ino ndangulukilo kyo yatamina?—Yako. 1:22.

13. Nanchi kubula kubatizhiwa bukiji kulengela muntu kubula kwikala na mambo kwi Yehoba nyi? Lumbululai.

¹³ Ibyo, bansemi bena Kilishitu kechi bakeba baana babo kubatizhiwa saka bakyangye kukoma mu maana ne. Nangwa byonkabyo, kechi twafwainwa kulangulukanga’mba inge mwana wabula kubatizhiwa kechi bakamuzhachisha kwi Yehoba ne. Mambo ka o twaambila bino? Kwitotolwela kwi Yehoba kechi kwaimena pa kubatizhiwa ne. Bino mwana uketotolwela kwi Lesa inge wayuka kyawama ne kyatama mu meso a Yehoba. (Tangai Yakoba 4:17.) Onkao mambo, bansemi ba maana batundaika baana babo kwibikila bikonkwanyi byawama, kechi kwibakanya kubatizhiwa ne. Bakeba kufunjisha mwanabo saka akijitu lukeke kuyuka ne kunemeka malamuna a Yehoba. (Luka 6:40) Kunemeka mizhilo ya Lesa kukazhikijila mwanenu ne kumutundaika kutwajijila kwenda mu jishinda jaoloka ja Yehoba.—Isa. 35:8.

BALONGO NE BANYENGA MU KIPWILO BYO BAKONSHA KUKWASHA

14. Bakulumpe mu kipwilo bakonsha kukwasha byepi bansemi babena kukwasha baana babo kufikilamo kubatizhiwa?

¹⁴ Byo baji bakafunga, bakulumpe mu kipwilo bakonsha kukwasha bansemi kupichila mu kwamba byawama bifuma mu kwibikila bikonkwanyi mu mwingilo wa Lesa. Nyenga umo waingijile bupainiya myaka kukila pa 70 uvuluka kimye kimo kyo esambile na Mulongo Charles T. Russell, uno nyenga saka akijitu na myaka itanu na umo. Washimikizhe’mba: “Mulongo Russell wisambile ne amiwa pa maminiti 15 ne kuntundaika kwibikila bikonkwanyi bya ku mupashi.” Kine, byambo bya lutundaiko byakonsha kulengela muntu kwingila myaka yavula. (Maana 25:11) Bakulumpe mu kipwilo bakonsha kwitako bansemi ne baana babo ku mingilo ya pa Nzubo ya Bufumu, ne kupapo baana mingilo kwesakana na jifumbi jabo.

15. Mu ñanyi mashinda balongo ne banyenga mu kipwilo mo bakonsha kutundaikila banyike?

¹⁵ Balongo ne banyenga mu kipwilo nabo bakonsha kuta muchima banyike. Bafwainwa kuta muchima ku biyukilo bimwesha’mba banyike babena kwibikako kwingijila Lesa. Nanchi pajipo mwanyike wakumbwile mukumbu wawama, watangile bulongo nangwa kwamba bulongo jashi pa kupwila mukachi ka mulungu nyi? Nanchi mwayukapo mwanyike umo washinjile lweseko ku sukulu ne kusapwila bakwabo mo bafunjila nyi? Batundaikai bano banyike. Mwakonsha ne kwipa mutembo wa kwisambapo na mwanyike umo inge kupwila kwapwa nangwa kupwila saka kukyangye kutenda. Inge mwamwesha banyike amba mwibata muchima mu ano mashinda ne akwabotu, kyakonsha kwibalengela kuyuka’mba ne abo baji na mwingilo mu “kipwilo kikatampe.”—Sala. 35:18.

KWASHAI BAANA BENU KUFIKILAMO KUBATIZHIWA

16, 17. (a) Lubatizhilo lwanemena ka? (b) Ñanyi kintu kileta lusekelo kikeba bansemi bena Kilishitu bonse? (Monai kipikichala kitanshi.)

¹⁶ Kukomesha baana mu “kwibajimuna ne kwibafunjisha maana a Yehoba” ke mwingilo wanema uji na bansemi bena Kilishitu. (Efi. 6:4; Sala. 127:3) Kupusanako na byajinga baana ba bena Isalela kala, baana ba bena Kilishitu lelo jino kechi basemwatu saka bepaina jimo kwi Yehoba ne. Kabiji kechi tuswana butemwe bwa Lesa ne bukine ku bansemi ne. Mwana aku usemwatu, bansemi bafwainwa kwibikila kikonkwanyi kya kumufunjisha kwikala mwana wa bwanga wa kwa Kilishitu, kwipana ne kubatizhiwa pa kuba’mba akengijilenga Yehoba. Kafwako mwingilo wanema kukila uno ne. Lubatizhilo lwanema mambo muntu yense wafwainwa kwipana aye mwine, kubatizhiwa, ne kwingijila Lesa mu bukishinka pa kuba’mba akapuluke malwa akatampe abena kwiya.—Mat. 24:13.

¹⁷ Ba Blossom Brandt byo bafuukwilepo kubatizhiwa, bansemi babo bena Kilishitu bakebelenga kushiinwa inge kya kine bayukile buneme bwa kintu kyo bakebelenga kuba. Byo bashiinwe’mba mwanabo kya kine winengezha, bamutundaikile kubatizhiwa. Bufuku bwa kutwala ku juba ja lubatizhilo, bashabo bebobijile kintu kyawama bingi. Ba Blossom bashimikizhe’mba: “Batata betwichile bonse ne kwitambila kufukama, kepo balombele. Mu lulombelo, babuujile Yehoba amba batemenwe bingi amiwa byo nafuukwilepo kwipana kwi aye.” Kabiji ne byo papichile myaka 60, ba Blossom baambile’mba: “Nangwa pakapite myaka yavula byepi, kechi nkalubamo juba batata jo bandombejileko ne.” Ne anweba bansemi bonse mwakonsha kumona lusekelo lufumamo inge baana benu bepana kwi Yehoba ne kubatizhiwa.