Bya Kulumbulula

Byambo ku Bansemi Bena Kilishitu:

Byo muji bansemi, mukebesha bingi kukwasha baana benu kutemwa Yehoba ne kwipana kumwingijila. Mwakonsha kwibakwasha byepi pa kuba’mba babatizhiwe? Ñanyi kimye kyo bafwainwa kufikilamo kubatizhiwa?

Yesu wakambizhe baana banji ba bwanga amba: ‘Kafunjishai bantu ba mu bisaka byonse bya bantu kwikala ke baana bami ba bwanga, ne kwibabatizha.’ (Mat. 28:19) Kwesakana na bino byambo, kine kintu kilengela muntu kubatizhiwa ke kwikala mwana wa bwanga, kechi kwikalatu muntu wayuka mafunjisho aamba pe Yesu ne, bino wafwainwa kwialondelanga. Kino ke kintu kyafwainwa kuba ne banyike.

Ikalai na byubilo byawama pa kuba’mba baana benu bafunjileko kabiji bafunjishai byambo bya Yehoba. (Mpitu. 6:6-9) Mwafwainwa kwingijisha byambo biji mu buku wa kubaʼmba Mukekala Myaka ne Myaka! pa kufunjisha baana benu mafunjisho atanshi a mu Baibolo ne kwibakwasha kuyuka bya kwingijisha mafunde a mu Baibolo. Kwashai baana benu kuyuka bya kulumbulula bintu byo baitabilamo ku bakwabo. (1 Pe. 3:15) Byo mwibafunjisha ne byo mwibatundaika, byo bafunda pa lufunjisho lwa pa bunke, pa kupopwela kwa kisemi, pa kupwila ne kupwanañana na balunda bawama bikebalengela kufuukulapo kubatizhiwa ne kutwajijila kuba byawama. Babuulainga mashinda awama akonsha kwibakwasha kufwenya kwipi ne Lesa.

Pa Byambo bya Maana 20:11 paamba’mba: “Mwana bamuyukila ku byubilo byanji, kana byubilo byanji byawama nangwa koloka.” Ñanyi bintu bimo bimwesha’mba mwana wa mulume nangwa wa mukazhi wafikilamo kwikala mwana wa bwanga wa kwa Yesu Kilishitu kabiji winengezha kubatizhiwa?

Mwana wafikilamo kubatizhiwa wafwainwa kukookelanga bansemi banji. (Byu. 5:29; Kolo. 3:20) Yesu byo afikizhe myaka ya kusemwa 12, Baibolo waamba’mba: “Aye watwajijile kwibanekenena [bansemi banji].” (Luka 2:51) Kechi mwafwainwa kuketekela mwanenu koloka pa kuba’mba emukookelenga ne. Bino yense ukeba kubatizhiwa ukebikako kwikala byonka byajinga Yesu kabiji ukamwesha kino pa kunekenena bansemi banji.

Kabiji ukamwesha’mba ubena kukebesha kufunda bukine bwa mu Baibolo. (Luka 2:46) Nanchi mwanenu utanwa ku kupwila kabiji ukumbulapo nyi? (Sala. 122:1) Abya watemwa kutanga Baibolo kimye kyonse ne kwikala na lufunjisho lwa pa bunke nyi?—Mat. 4:4.

Mwana wafikilamo kubatizhiwa utangizhako bintu bya Bufumu. (Mat. 6:33) Wayuka’mba uji na mwingilo wa kubuulako bantu bintu byo aitabilamo. Wingijisha mashinda apusanapusana pa kusapwila bantu kabiji kechi umvwa bumvu kwisolola ku bafunjishi banji ne bakwabo mo bafunjila amba Kamonyi wa kwa Yehoba ne. Utako bingi muchima kunengezha bulongo majashi o bamupa mu Kupwila kwa Bwikalo ne Mwingilo.

Wibikako bingi kuchinuzhuka bintu byatama kabiji kechi upwanañana na bantu babi ne. (Maana 13:20; 1 Ko. 15:33) Kino kikamwekela mu nyimbo yo atelekako, mafilimu ne mitanchi ya pa tv yo atamba, makayo a pa kompyuta ne byo engijisha Intaneti.

Baana bavula bo bakwasha ku bansemi babo, batemwa bukine kabiji bafikilamo kubatizhiwa. Yehoba emupeshe byo mubena kukwasha baana benu kukosesha balunda bwabo ne aye.

Byambo ku Musapwishi Wabula Kubatizhiwa:

Kyawama bingi kwikala musapwishi wabula kubatizhiwa ne kwingijila pamo na kipwilo. Twimusanchila bingi pa kwibikako kwenu kuba’mba mwingijilenga Lesa. Mwamuyuka Lesa na mambo a kufunda Mambo anji kabiji mwaketekela mu milaye yanji.—Yoa. 17:3; Hebe. 11:6.

Saka mukyangye kutendeka kufunda na Bakamonyi ba kwa Yehoba, kampe mwayangapo ku bupopweshi bumo, nangwa kampe kechi mwakipwilapo kala mu bupopweshi buji bonse ne. Nangwa kampe mwaubangapo bintu bimo byatama byobakanya mu Baibolo. Bino pa kino kimye, muji na lwitabilo kibena kumwesha’mba mwalapila. Kino kyakonsha kwimulengela kwilangulusha na mambo a bintu bimo byatama byo mwaubanga kala. Pano na mambo a kuba mwapimpula byubilo byenu, kibena kulumbulula’mba mwaleka byubilo byatama kabiji mubena kukebesha kuba bintu bitokesha Lesa ku muchima.—Byu. 3:19.

Kampe ne anweba mwayuka binembelo byazhila, ‘kufumatu kimye kyo mwajinga lukeke.’ Kabiji kuyuka binembelo kwimulengela kubula kuba bintu byatama ne kuchinuzhuka kulenga mambo akatampe. (2 Timo. 3:15) Mwafunda byo mwakonsha kuchinuzhuka kuba bintu byatama byuba bakwenu ne bintutu bikwabo byashikwa Yehoba. Mwamwesha kuba’mba muji na lwitabilo pa kutundaika bupopweshi bwa kine ne kubuulako bakwenu bintu byo mwaitabilamo. Bemufunjisha bya kusapwila. Pano mwafuukulapo anweba bene kwingijila Yehoba byo mwaikala musapwishi wabula kubatizhiwa.

Kimo kimye Yehoba mwamuyuka saka mwakoma kala nangwa mwamuyukile kufumatu ku bwanyike, mwakonsha kulangulukapo pa mashinda akwabo abiji a kukoseshamo lwitabilo lwenu mwi aye. Ano mashinda abiji ke kwipana ne kubatizhiwa. Mwipana kwi Yehoba mu lulombelo ne kumubuula byo mwafuukulapo kwingijilangatu aye yenka kwapwa. (Mat. 16:24) Pa kuba’mba mumweshe kuno kwipana kwenu, mwafwainwa kubatizhiwa mu mema. (Mat. 28:19, 20) Inge mwipana ne kubatizhiwa, po po mufikilamo kwingila mwingilo wimupa Yehoba Lesa. Uno mwingilo wawama bingi.

Byonkatu byo mwafunjile mu Baibolo, mwakonsha kupita mu makatazho apusana pusana. Vulukai’mba aku ubatizhiwatu, ‘Yesu bamutwajile mungye ku mupashi, Diabola waishile na kumweseka.’ (Mat. 4:1) Inge mwabatizhiwa ne kwikala mwana wa bwanga wa kwa Kilishitu, mwafwainwa kuketekela kupita mu meseko. (Yoa. 15:20) Ano meseko akeshila mu mashinda apusana pusana. Bakonsha kwimushikwa ku ba mu kisemi kyenu. (Mat. 10:36) Bakonsha kwimwendeleka ku bakwenu mo mufunjila, mo mwingijila ne balunda nenu ba kala. Vulukainga kimye kyonse byambo byaambile Yesu biji pa Mako 10:29, 30 byaamba’mba: “Kine nemwambila namba, kafwako washa nzubo, bakolojanji nangwa bankasanji ba balume, banyenga yanji, bainanji, bashanji, baana nangwa majimi na mambo a amiwa ne na mambo a mambo awama ukabula kutambula byavula kufika ku 100 mu kino kimye—mazubo, bakolojanji ba balume, bankasanji ba balume, banyenga yanji, bainanji, baana, ne majimi, ne kumanyikwa ne mu bwikalo bukeya bumi bwa myaka ne myaka ne.” Onkao mambo, twajijilai kufwenya kwipi ne Yehoba ne kulondela mizhilo yanji yaoloka mu bwikalo bwenu.

Inge mwafuukulapo kubatizhiwa, buulai ukwatankanya mingilo ya jibumba ja bakulumpe mu kipwilo. Mu mutwe walondelapo muji mepuzho o mukesambapo na bakulumpe mu kipwilo pa kuba’mba bakayuke umvwe mwafikilamo kubatizhiwa nangwa ne. Mwakonsha kutendeka kupitulukamo mu ano mepuzho pa lufunjisho lwa pa bunke bwenu.

Pa kunengezha mikumbu ya mepuzho o mukesambapo na bakulumpe mu kipwilo, ikalaiko na kimye kya kutanga ne kulanguluka pa Binembelo bijimo. Mwakonsha kunemba bishinka monka mu buku nangwa pa pepala. Mwakonsha kwingijisha bino bishinka pa kukumbula kabiji mwafwainwa kuzhikula buku kimye kyo mubena kwisamba na bakulumpe. Inge kimukatazha kumvwisha mepuzho amo, mwakonsha kushikisha wimufunjisha Baibolo nangwa bakulumpe mu kipwilo.

Kimye kyo mukesambanga na bakulumpe, kechi mwafwainwa kulanguluka’mba kanatu mukumbule mikumbu yalepa ne. Mwafwainwa kukumbulatu mukumbu mwipi mu byambo byenu. Pa kukumbula mepuzho amo, mwafwainwa kutongolapo kinembelo kimo nangwa bibiji bibena kukosesha kishinka kyo mwakumbula.

Inge kechi mwayuka bulongo mafunjisho atanshi a mu Baibolo ne, bakulumpe mu kipwilo bakanengezhapo jishinda ja kwimukwashishamo. Bakoba bino pa kuba’mba muyuke bya kukumbula mu byambo byenu pa kulumbulula mwatala Binembelo ne kukafikilemo kubatizhiwa kimye kikwabo.

[Mikambizho ku bakulumpe mu kipwilo: Mikambizho ya kulondela pa kwisamba na babena kukeba kubatizhiwa iji pa mapa 208-212.]