MEPUZHO A KWIPUZHA BOBA BAKEBA KUBATIZHIWA
Mwisambo Wapelako na Babena Kuya ku Lubatizhilo
Kubatizhiwa javula kubiwa pa kubuñana ne pa kushonkena kwa Bakamonyi ba kwa Yehoba. Ku mpelo ya jashi ja lubatizhilo, ñambi wambila boba babena kuya ku lubatizhilo kwimana ne kukumbula na jiwi ja peulu ano mepuzho abiji:
1. Nanchi mwalapila ku bundengamambo bwenu ne kwipana anweba bene kwi Yehoba, ne kwitabila kuba’mba Yesu Kilishitu jo jishinda janengezha Lesa ja kupulushishamo bantu nyi?
2. Nanchi mwayuka’mba lubatizhilo lwenu lusa kumwesha’mba pano mwi Bakamonyi ba kwa Yehoba bakwatankena pamo na jibumba janji nyi?
Kukumbula’mba ee ano mepuzho ke “kusolola patoka” amba babena kuya ku lubatizhilo baji na lwitabilo mu bukuzhi ne kumwesha’mba kine bepana abo bena kwi Yehoba. (Loma 10:9, 10) Onkao mambo, babena kuya ku lubatizhilo bafwainwa kulangulukilapo jimo ne kulombelapo pa ano mepuzho kuba’mba bakakonshe kukumbula kwesakana na mwayila lwitabilo lwabo.
Nanchi mwipana kwi Yehoba mu lulombelo ne kumulaya kuba’mba mukamupopwelangatu aye yenka ne kuba kyaswa muchima wanji mu bwikalo bwenu nyi?
Nanchi kine mwashiinwa’mba mwafwainwa kubatizhiwa pa kino kimye nyi?
Ñanyi mvwajilo yafwainwa kuvwala babena kuya na kubatizhiwa? (1 Timo. 2:9, 10; Yoa. 15:19; Fili. 1:10)
Twafwainwa kuvwala bivwalo na “kwipelula ne kwikala na milanguluko yawama” pa kuba’mba ‘tunemeke Lesa.’ Onkao mambo, aba babena kubatizhiwa kechi bafwainwa kuvwala bivwalo byapulangila nangwa bivwalo byo banembapo byambo nangwa bya kutentemesha busulu ne. Bafwainwa kuvwala bivwalo bya butooto, bibena kumweka bulongo kabiji byailamo na byo mubena kuba.
Ñanyi byubilo byafwainwa kwikala na muntu ubena kubatizhiwa? (Luka 3:21, 22)
Bena Kilishitu lelo jino balondela lubatizhilo lwa kwa Yesu. Wayukile kuba’mba lubatizhilo ke kintu kyanema bingi, kabiji kino kyamwekejile mu byubilo byanji. Onkao mambo, mpunzha ya lubatizhilo kechi yafwainwa kwikala ke kwa kuletela bisela, kwa kukayila, kufwenkelapo, nangwa kubilako bintu byakonsha kulengela bantu kulengulula jino juba ne. Kabiji mwina Kilishitu wa katataka kechi wafwainwa kusapula uba nobe watoola mfuko ne. Nangwa kya kuba lubatizhilo ke kimye kya lusekelo, pano bino musapwishi wafwainwa kusangalala mu jishinda jawama.
Kupwila kimye kyonse ne kupwanañena pamo na kipwilo kukemukwasha byepi kwikela mwayila kwipana kwenu kwi Yehoba?
Panyuma ya kubatizhiwa, mambo ka o mwafwainwa kutwajijila kwikala na mutanchi wawama wa lufunjisho lwa pa bunke ne kwingilako kimye kyonse mu mwingilo wa mu bujimi?
MIKAMBIZHO KU BAKULUMPE MU KIPWILO
Umvwe musapwishi wabula kubatizhiwa ubena kukeba kubatizhiwa, bafwainwa kumubuula kupituluka mu “Mepuzho a Kwipuzha Boba Bakeba Kubatizhiwa,” aji pa mapa 185-207 mu uno buku. Wafwainwa kutanga “Byambo ku Musapwishi Wabula Kubatizhiwa,” byatatwila pa jipa 182, bibena kulumbulula byo akonsha kunengezha mepuzho a lubatizhilo. Byonka byo baamba mu mutwe wa kuba’mba “Byambo ku Musapwishi Wabula Kubatizhiwa,” wakonsha kwingijisha bishinka byo anemba kabiji wakonsha kuzhikula ne buku saka atalamo kimye kya mwisambo. Nangwa byonkabyo, kafwako wafwainwa kupitulukilamo jimo nanji mu mepuzho bakulumpe saka bakyangye ne.
Inge muntu ubena kukeba kubatizhiwa wafwainwa kubuula ukwatankanya mingilo ya jibumba ja bakulumpe. Kabiji wafwainwa kutanga “Mepuzho a Kwipuzha Boba Bakeba Kubatizhiwa.” Ukwatankanya mingilo ya jibumba ja bakulumpe ukamwipuzha inge wipana kwi Yehoba mu lulombelo kuba kyaswa muchima wa Lesa. Inge wipana, ukwatankanya mingilo ya jibumba ja bakulumpe ukambila bakulumpe babiji kwisamba nanji “Mepuzho a Kwipuzha Boba Bakeba Kubatizhiwa.” Mukulumpe umo bakamwambila kwisamba nanji lubaji 1, mukwabo bakamwambila kwisamba nanji lubaji 2. Kechi kikebewa kupembelatu’mba bakikabijike kimye kikekelamo kubuñana nangwa kushonkena, apa bino mwaikala na ino misambo ne.
Ino mbaji ibiji yakonsha kubiwa mu maola abiji, lubaji lumo jiola jimo lubaji lukwabo jiola jimo. Pano bino kafwapo muzhilo, umvwe kibena kukebewa mwakonsha kupitaila pa jiola jimo. Mwafwainwa kutatula ne kupezhako mwisambo na lulombelo. Muntu ubena kukeba kubatizhiwa kechi wafwainwa kupitamotu lubilo pa kunengezha mepuzho ne. Bakulumpe mu kipwilo nabo kechi bafwainwa kupitamotu lubilo kimye kyo babena kwisamba nanji ne. Bakulumpe bo bapa uno mwingilo bafwainwa kutako muchima.
Javula kyawama kupitulukamo mu mepuzho na babena kukeba kubatizhiwa pa bunke bunke, kukila kwibepwizha bonse pamo. Ubena kukeba kubatizhiwa wafwainwa kukumbula mepuzho onse, kino kikakwasha bakulumpe kuyuka inge wayuka bukine ne kubula kumuzhinauka inge wafikilamo kubatizhiwa. Kabiji muntu ubena kukeba kubatizhiwa ukambanga saka akasuluka pa kwisamba nanji pa bunke bwanji. Ba mulume ne mukazhi bafwainwa kwibepwizha pamo.
Inge babena kupitulushamo nyenga, bafwainwa kwikela pa mpunzha pabula kufyamika kabiji bantu po bakonsha kubula kumvwa byo babena kwamba. Inge kyakonsheka kusendapo muntu umo, wafwainwa kwikala mukulumpe nangwa nkwasho, kwesakana na lubaji lo mubena kwisamba nanji, byonka byo baamba mu jifuka jalondelapo.
Mu kipwilo muji bakulumpe bacheche, bankwasho bafikilamo kabiji bafuukula bintu bulongo bafwainwa kwipuzha babena kuya ku lubatizhilo mepuzho aji mu “Lubaji 1: Byaitabilamo Bena Kilishitu.” Bakulumpe mu kipwilo bo bonkatu bafwainwa kwipuzha mepuzho aji mu “Lubaji 2: Byafwainwa Kwikala Bena Kilishitu.” Inge mu kipwilo kafwamo balongo bafikilamo ne, mwafwainwa kwipuzha kalama wa mwanzo umvwe wakonsha kwambila kipwilo kiji pepi kwimukwashako.
Inge ubena kukeba kubatizhiwa mwanyike, bansemi banji baitabila bafwainwa kutanwako kimye kyo babena kumwipuzha mepuzho aji mu mbaji yonse ibiji. Inge kechi kyakonsheka bansemi banji kutanwako ne, bakulumpe mu kipwilo babiji (nangwa mukulumpe ne nkwasho, kwesakana na lubaji lo babena kupitulukamo) bafwainwa kutanwako pa kupitulukamo nanji mu mbaji yonse ibiji.
Bakulumpe mu kipwilo bakakeba kuyuka kana ubena kukeba kubatizhiwa wayukako byavula pa mafunjisho atanshi a mu Baibolo nangwa ne. Kabiji bakakeba kuyuka kana watemwa bukine ne kunemeka jibumba ja Yehoba nangwa ne. Umvwe kya kuba uno muntu kechi waumvwisha mafunjisho atanshi a mu Baibolo ne, bakulumpe bakamonapo jishinda ja kumukwashishamo kuba’mba akafikilemo kubatizhiwa kimye kikwabo. Bakwabo nabo bafwainwa kwibapako kimye pa kuba’mba bamwesha’mba banemeka mwingilo wa mu bujimi nangwa kunekenena bintu byanengezha jibumba. Bakulumpe bene bakafuukulapo kimye kyo bafwainwa kwingijisha pa lubaji lumo kana jiola jimo nangwa kukilapo pa kuba’mba bayuke bulongo inge ubena kukeba kubatizhiwa wafikilamo nangwa ne. Nangwa kya kuba pa mepuzho amo pakonsha kutayiwa kimye kyabaya, kabiji akwabo pakonsha kutayiwa kimye kicheche, bafwainwa kupituluka mu mepuzho onse.
Bakulumpe bo bapeele mwingilo wa kupituluka mu ano mepuzho bakasambakana pamo inge lubaji lwa bubiji lwapwa ne kwisamba pa kuba’mba bayuke inge uno muntu wafwainwa kubatizhiwa nangwa ne. Bakulumpe bakalanguluka pa nkomeno yanji, bintu byo ayuka ne bintutu bikwabo. Tukebesha kukwasha bantu bakeba kwingijila Yehoba kabiji bakwatakanya bukine bwa mafunjisho atanshi a mu Baibolo. Na bukwasho bwenu, mukakwasha boba babena kubatizhiwa kwinengezha kwingila mwingilo wanema byo baji ba mwingilo ba mambo awama.
Inge mwapwisha kupitulukamo nanji, mukulumpe umo nangwa bonse babiji bo bapeele uno mwingilo bafwainwa kumwita ne kumubuula umvwe wafikilamo kubatizhiwa nangwa ne. Umvwe wafikilamo kubatizhiwa, bakulumpe bafwainwa kwisamba nanji “Mwisambo Wapelako na Babena Kuya ku Lubatizhilo,” uji pa mapa 206-207. Inge uno muntu kechi wapwishishe kufunda buku wa Mukekala Myaka ne Myaka! ne, bakulumpe bakamubuula kutwajijila kufunda nangwa kya kuba wabatizhiwa. Mubuulai kuba’mba bakanemba juba jo abatizhiwa ku Kikachi kya Musapwishi mu Kipwilo. Kabiji mubuulai’mba bakulumpe mu kipwilo bakakeba kuyuka juba jo abatizhiwe, jizhina janji, juba ja kusemwa ne keyala wanji ne kwibinemba pa kuba’mba jibumba ja Lesa jitangijilenga bulongo mingilo ya Bakamonyi ba kwa Yehoba mwaya ntanda yonse. Bafwainwa kuba bino pa kuba’mba bamukwashe kwingilangako mingilo ya Lesa ne kukosesha bulunda bwanji ne Lesa. Kabiji bakulumpe bafwainwa kulumbulwila musapwishi wakatataka kuba’mba jizhina janji, juba ja kusemwa ne keyala wanji byanemba bakulumpe byazhikijilwa kwesakana na mizhilo ya kuba’mba Global Data Protection Policy of Jehovah’s Witnesses iji pa jw.org. Uno mwisambo wafwainwa kwikala wa maminiti jikumi nangwa kubwela panshi.
Inge papita mwaka umo kufuma pabatizhiwe musapwishi, bakulumpe babiji bafwainwa kusambakana nanji ne kumutundaika ne kumubuulako mashinda akwabo akonsha kumukwasha. Pa bano bakulumpe babiji umo wafwainwa kwikala kalama wa jibumba ja mwingilo muji uno musapwishi. Umvwe uno musapwishi wa katataka mwanyike, bansemi banji baitabila bafwainwa kutanwapo. Kuno kusambakana kwafwainwa kwikala kwa kumutundaika. Bakulumpe bakesamba pa bulunda bwanji ne Lesa ne kumubuulako mashinda akonsha kumukwasha kutwajijila kwikala na lufunjisho lwa pa bunke ne kutanga Baibolo pa juba pa juba, kupopwela kwa kisemi, kutanwa ku kupwila ne kukumbulapo ne kuyanga mu mwingilo. (Efi. 5:15, 16) Umvwe kechi wapwisha buku wa Mukekala Myaka ne Myaka! ne, bakulumpe mu kipwilo bafwainwa kunengezhapo muntu umo wa kumufunjishanga. Bakulumpe bafwainwa kumusanchila pa byo abena kwingila. Javula kumufundako ne kumubuulako kishinka kimo nangwa bibiji kwanema bingi.