Kakitenguluzha ka Mepuzho

◼ Bimye Binga Muntu byo Afwainwa Kutanwa ku Kupwila ne Kusapwila pa Kuba’mba Abatizhiwe?

Kubatizhiwa ke kintu kyanema muntu kyo afwainwa kuba. Pa kuba’mba abatizhiwe wafwainwa kufunda mikambizho ya Lesa. Kabiji wafwainwa ne kwingijishanga bintu byo abena kufunda.

Bena Kilishitu bebakambizha kupwila pamo, onkao mambo, muntu pa kuba’mba abatizhiwe wafwainwa kutanwanga ku kupwila ne kukumbulangapo. (Hebe. 10:24, 25) Kabiji wafwainwa ne kunembesha mu Sukulu wa Mwingilo wa Lesa, nangwa kya kuba muntu pa kuba’mba abatizhiwe kechi kanatu’mba uji mu sukulu ne.

Bena Kilishitu baji na mwingilo wa kusapwila mambo awama ne kufunjisha bantu, onkao mambo, muntu pa kuba’mba abatizhiwe wafwainwa kwingilanga mwingilo wa kusapwila. (Mat. 24:14; 28:19, 20) Pafwainwa kupita bañondo banga pa kuba’mba a batizhiwe? Pafwainwa kupita kimye pa kuba’mba ayuke kusapwila. (Sala. 78:37) Nangwa byonkabyo, kechi pafwainwa kupita kimye kyabayisha kufuma po aikela musapwishi wabula kubatizhiwa ne, kimo kimye bañondo bacheche bakonsha kupitapo. Maola anga o afwainwa kupananga? Kechi kujipo mukambizho waamba pa maola o afwainwa kupananga ne. Bino bakulumpe bafwainwa kuyuka biji yewo muntu ubena kukeba kubatizhiwa ne kulangulukapo bulongo umvwe wafwainwa.—Luka 21:1-4.

Bakulumpe (nangwa bankwasho umvwe kya kuba pa kipwilo kechi paji bakulumpe bavula ne) babena kupitulushamo muntu ukeba kubatizhiwa bafwainwa kuyuka kuba’mba bantu bapusana pusana, kabiji bafwainwa kumona umvwe awo muntu wafwainwa kubatizhiwa. Bakulumpe bafwainwa kushiinwa kya kine kuba’mba, awo muntu ukeba kwikala kamonyi wa kwa Yehoba, utanwa ku kupwila kabiji usapwila mambo awama. Kabiji bafwainwa ne kuyuka’mba muntu ukyangye kubatizhiwa kechi wayuka bintu byavula bya mu binembelo, ne kuyuka bulongo bya kusapwila ne. Onkao mambo, umvwe bakulumpe bamona kuba’mba kechi wafwainwa kubatizhiwa ne, bafwainwa kumulumbulwila bulongo byaamba Binembelo ne kumukwasha pa kuba’mba kimye kikwabo akabatizhiwe.