Mepuzho Afuma ku Batanga

Nafwainwa kuba byepi inge nji na bwipuzho pa kintu kimo kyo natanga mu Baibolo nangwa inge kankebe bukwasho pa kintu kyankatazha?

Byambo bya Mana 2:1-5 bitutundaika kutwajijila ‘kukeba’ maana ne milangwe byonka byo twafwainwa kukeba “bya buneme byafyamika.” Kino kibena kulumbulula’mba twafwainwa kwibikishako kukeba mikumbu ya mepuzho a mu Baibolo ne bya kuba na makatazho o tupitamo. Twakonsha kuba byepi bino?

Buku wa Mwenaimo mu Sukulu wa Lufunjisho lwa Mwingilo wa Lesa, mapa 33 kufika ku 38, walumbulula “Byo Twafwainwa Kupesapesa” mu mabuku afuma ku “kalume wakishinka kabiji wa maana.” (Mat. 24:45) Pa jipa 36 betulumbulwila byakwingijisha Watch Tower Publications Index, muji mitwe ne nteeta ya binembelo. Twakonsha kupesapesa kwingijisha kyambo nangwa Kinembelo, pa kuba’mba tutane nteeta ya kwitukwasha. Tekanyai ne kupesapesa pa kuba’mba mutane mukumbu mwine nangwa bukwasho bo mukeba. Vulukainga kuba’mba mubena kukeba “bya buneme byafyamika” bikebewa kimye ne kwingila na ngovu.

Kuji binembelo ne bintu bimo byabula kwambiwapo mu mabuku etu. Nangwa kya kuba Binembelo bimo twaambapo, bino byambo byo twaambapo kechi byanembelwe na nkebelo ya kukumbula bwipuzho bo mwakonsha kwikala nabo ne. Kabiji mashimikila amo aleta mepuzho mambo mu Binembelo kechi balumbululatu byonse tonkotonko ne. Onkao mambo, kechi twakonsha kutana mukumbu bukiji wa bwipuzho bonse ne. Umvwe kyaikala bino, kechi twafwainwa kusombatu mikumbu ne, mambo ‘biletatu mepuzho, kabiji kechi biji pa bintu bipana Lesa bikosesha lwitabilo ne.’ (1 Timo. 1:4; 2 Timo. 2:23; Titu. 3:9) Ofweshi wa musampi nangwa ofweshi mukatampe wa ntanda yonse kechi wakonsha kupesapesa nangwa kukumbula mepuzho abula kwambiwapo mu mabuku etu ne. Tuji bingi na lusekelo mambo byanembwa mu Baibolo bitukwasha mu bwikalo bwetu kabiji yashapo bimo pa kuba’mba twikale na lwitabilo mwi Lesa Mwina uno buku.—Monai buku wa Fwenyai Kwipi ne Yehoba, mapa 185 kufika ku 187.

Pano ibyepi inge kya kuba mwapulwilamotu mabula na kupesapesa’mba muyuke bya kuba na bintu bibena kwimukatazha mu bwikalo? Kasulukai kwisamba na mukwenu wa mu lwitabilo wakoma ku mupashi, nabiji bakulumpe mu kipwilo. Bayuka Baibolo kabiji bapita mu byavula mu bwikalo bwa bwina Kilishitu. Bakonsha kwimubula bya kuba na makatazho o mubena kupitamo nangwa kwimukwasha kufuukula bulongo pa bintu bimo mambo bemuyuka bulongo kabiji ne lukatazho lwenu pamo. Kabiji kechi mwafwainwa kulubako kulomba Yehoba kwimukwasha ne kwimutangijila na mupashi wazhila kulanguluka bulongo ne, “mambo Yehoba ye upana maana . . . ne milangwe.”—Mana 2:6; Luka 11:13.