Mufundako Byepi Bakwenu?

Nanchi kuji wakimusolomokapo kala amba mumubuleko bya kuba nyi? Kampe wimwipuzha mepuzho nabiji a kuba’mba: ‘Nsakuba byepi? Ngye ku kijiilo nyi? Ntwele ino nkito nyi? Nanchi ujitu bulongo kutwela nanji mu masongola nyi?’

Bamo bakonsha kwimusolomoka amba mwibabuleko bya kuba pa bintu byanema byakunza balunda nabo, ba mu kisemi, kimo kimye ne Yehoba. Byo mukebafundako bikemena pa ka? Mufundako byepi bakwenu? Nangwa kya kuba abyo bintu byanema nangwa ne, kyawama kimye kyonse kulondela byaamba Byambo bya Mana 15:28 amba: “Muchima wa waoloka ulanguluka mwa kukumbwila.” Akimonai ano mafunde atanu a mu Baibolo byo akonsha kwitukwasha pa kufundako bakwetu.

1 Yukai Bintu byo Biji.

“Umvwe muntu wakumbula saka akyangye kumvwisha kyo kya kukosama kabiji ukamona bumvu.”—MANA 18:13.

Pa kuba’mba tufundeko bakwetu bulongo patanshi twafwainwa kuyuka bintu byo biji ne bibena kulanguluka yewo muntu ubena kukeba bukwasho. Kyakumwenako: Inge muntu wimutumina lamya ne kwimwipuzha byakwenda pa kuya ku nzubo kwenu, ki ka kyo mwafwainwa kuyuka saka mukyangye kumubula byakwenda? Nanchi mwakonsha kumubula byakwenda kwa kubula kuyuka mpunzha ko aji nyi? Ine. Kyo kimotu, pa kuba’mba mufundeko muntu bulongo, mwafwainwa kuyuka “mpunzha” ko aji nangwa’mba lukatazho luji na yewo muntu ubena kukeba bukwasho. Nanchi kujipo bintu bimo byakonsha kwitulengela kumubula byakwenda nyi? Inge kechi twayuka bintu byo biji ne, twakonsha kumubula bintu byakonsha kukilamo kumuvulañanya.—Luka 6:39.

Monai Inge Wapesapesapo kya Kine. Kabiji kyanema ne kumwipuzha ubena kukeba bukwasho mepuzho nabiji a kuba’mba: “Ñanyi mafunde a mu Baibolo o mwakonsha kwingijisha?” “Ñanyi bintu byawama ne byatama byakonsha kufumamo mu byo mubena kulanguluka kuba?” “Bishinka ka byo mwapesapesapo?” “Abya kujipo bemukwashishepo, nabiji bakulumpe mu kipwilo, bansemi benu nangwa bemufunjisha Baibolo nyi?”

Mikumbu yanji yakonsha kwitukwasha kuyuka awo muntu byo abena kwibikako kukeba kuyuka bya kuba. Kabiji pa kumukwasha twafwainwa kulanguluka ne pa bakwabo byo bamukwashishe. Twakonsha ne kuyuka inge awo muntu ubena kukebatu bakumubula ‘bintu byo akebatu aye mwine kumvwa.’—2 Timo. 4:3.

2 Kuja Kabakubaku Ne.

“Muntu yense wafwainwa kupelawizha kumvwa kabiji abande kwamba ne kubanda kuzhingila.”—YAKO. 1:19.

Na mambo a kukeba kumukwasha, twakonsha kuja kabakubaku kukumbula. Pano ibyepi inge kya kuba kechi twapesapesa bulongo bishinka byaamba pa yeo mutwe ne, abya kyakonsha kwikala kya maana kukumbula nyi? Byambo bya Mana 29:20 byaamba’mba: “Wayukapo muntu upelawizha kwambanyi? Kukwasha wakosama byobyako, kukila kumukwasha aye.”

Mwafwainwa kushiinwa’mba bukwasho bwenu bwaesakana na mwayila maana a Lesa. Ishikishai anweba bene amba, ‘Abya ndangulukilo ne “mupashi wa ba pano pa ntanda” byo bibena kundengela kumufunda bino nyi?’ (1 Ko. 2:12, 13) Vulukai kuba’mba kukeba kumukwasha kechi kyo kyonkatu kikebwa ne. Mutumwa Petelo byo ayukile’mba mwingilo wa kwa Yesu wakatazha, wamubujile’mba: “Kwakamwa ne, Nkambo; kino kechi kikemumwekela ne.” Twakonsha kufunjilako ka ku byaubile Petelo? Tufunjilako kuba’mba inge twabula kujimuka, nangwa muntu ujitu bulongo wakonsha kwitubula “milanguluko ya bantu kechi ya Lesa ne.” (Mat. 16:21-23) Kyanema bingi kulangulukapo saka tukyangye kwamba. Nanchi maana etu kechi akepa inge twiesakanya ku maana a Lesa nenyi?—Yoba 38:1-4; Mana 11:2.

3 Ingijishainga Mambo a Lesa.

“Kechi neubila bintu ami mwine ne; pakuba monka mwamfunjishishe Batata mo mo ñambila bino bintu.”—YOA. 8:28.

Nanchi mwakonsha kwamba’mba: “Inge amiwa, inge . . . ”? Nangwa kya kuba mukumbu wapela, kyawama kwikala na muchima wa kwikepesha ne kuyuka pa kupelela byonka byaubanga Yesu. Wajinga bingi na maana kabiji wayukile byavula kukila bantu bonse; bino waambile’mba: “Kechi ñamba milanguluko yami ne, bino Batata . . . bankambizhizhe byo nafwainwa kubulañana ne kwamba.” (Yoa. 12:49, 50) Byafunjishanga Yesu byaimenejile pa kyaswa muchima wa Shanji.

Kyakumwenako, Luka 22:49 wamba’mba byo kwashajile pacheche kuba’mba bamukwate baana banji ba bwanga bamwipwizhe inge kijitu bulongo kulwa na bakebelenga kumukwata. Mwana wa bwanga wakozhezhepo ne umo na mpoko. Akimonai jishimikila jiji mu Mateo 26:52-54, jamba’mba nangwa kya kuba bintu byakatezhe, Yesu wisambile na baana banji ba bwanga ne kwibakwasha kuyuka kyaswa muchima wa Yehoba. Na mambo a kuba wayukile mafunde aji mu Ntendekelo 9:6 ne bungauzhi buji mu Salamo kitango 22 ne mu Isaya 53, Yesu wakonsheshe kwibapa lutangijilo lwa maana lwapulwishe myeo yabo ne kutokesha Yehoba ku muchima.

4 Ingijishainga Mabuku a mu Jibumba Jetu ja Lesa.

“Nanchi kalume wakishinka kabiji wa maana ye ñanyi, Nkambo yanji ye atongwele kwikala mukulumpe wa bantu ba ku nzubo yanji amba ebapenga kajo pa kimye kyafwainwa?”—MAT. 24:45.

Yesu watongola jibumba ja kalume jipana kajo kanema ka ku mupashi. Inge mubena kufundako muntu pa bintu byanema, nanchi mumonapo kimye kya kupesapesa mu mabuku alumbulula Baibolo nyi?

Mu Watch Tower Publications Index ne mu Watchtower Librarya muji bishinka byavula byalumbululwa bulongo. Kyakonsha kutama bingi kubula kwingijisha bino bintu bitukwasha. Muji mitwe yavula ne bibaba byakonsha kukwasha babena kukeba bukwasho. Muba byepi pa kukwasha bakwenu kwingijisha mafunde a mu Baibolo ne kulanguluka pa byaamba Mambo a Lesa? Byonkatu mapu byo akonsha kukwasha muntu kuyuka ko aji ne kuyuka ko abena kuya, ne mabuku a kupesapesamo nao akonsha kukwasha muntu kuyuka jishinda jo ajimo ne byo akonsha kutwajijila kwenda mu jishinda jaya ku bumi.

Bakulumpe mu kipwilo bavula bafunjisha basapwishi byakwingijisha Nteeta nangwa selechi wa Watchtower Library, kabiji bakwasha balongo ne banyenga kulanguluka byakwingijisha Binembelo. Bukwasho bwa uno mutundu kechi bulengelatu basapwishi kuyuka bya kupwisha makatazho abo ne, bino bwibalengela ne kwikala na muteeto wa kupesapesa ne kukinka manungo mu bintu bya ku mupashi bitunengezhezha Yehoba. Inge ke bobe bino, bekala “na maana a kupima bintu ne kuyuka kyawama ne kyatama.”—Hebe. 5:14.

5 Kufukwilangako Bakwenu Ne.

“Mambo muntu yense ukesendela mwine kisendwa kyanji.”—NGA. 6:5.

Muntu yense wafwainwa mwine kusalapo lujimuno ne mafunde o afwainwa kulondela. Yehoba witupa lūsa lwa kusalapo atweba bene kwikela mwayila mafunde anji nangwa ne. (Mpitu. 30:19, 20) Mu makatazho amo, mafunde a mu Baibolo avula akonsha kwingilatu bulongo, onkao mambo mwine muntu ubena kukeba bukwasho ye wafwainwa kusalapo jifunde ja kwingijisha. Kwesakana na kubaya kwa lukatazho nangwa jifumbi ja ubena kukeba bukwasho, twafwainwa ne kwishikisha’mba: ‘Nanchi nafwainwa kumukumbula nyi?’ Makatazho amo kyawama kwiatwala ku bakulumpe mu kipwilo nangwa ku bansemi ba ubena kukeba bukwasho inge mwanyike.

[Tubyambo twa mushi]

[Kitenguluzha/Kipikichala pa peja 8]

Bya Kuba pa Kupopwela kwa Kisemi

Pa kupopwela kwa kisemi, mambo ka akubujila kukeba mikumbu ya mepuzho o bemwipwizhe? Ñanyi mitwe ne mafunde a mu Baibolo o mwakonsha kwingijisha pa kukumbula mepuzho o bemwipwizhe? Kimye kimo, mulongo nangwa nyenga wakonsha kwimwipuzha pa muntu ye akeba kutwela nanji mu masongola. Pa kwingijisha Nteeta nangwa Watchtower Library, patanshi kebai mitwe yaamba pa kyo mubena kukeba. Kyakumwenako, mu Nteeta mwakonsha kuya pa ka mutwe ka kuba’mba “Dating” (kwibajikila) nangwa’mba “Marriage” (Masongola). Balululai mu mitwe ya icheche yakunza ku kyo mubena kupesapesapo. Byo mubena kumona biji mu mutwe mukatampe, monai inge paji panembwa’mba, “See also” (Monai ne ino mitwe) yakonsha kwimutwala pa byo mubena kukeba.

[Kitenguluzha pa peja 9]

Tumusanchila bingi Yehoba pa byo etufunjisha kupichila mu jibumba janji bitukwasha kufundako bakwetu bulongo. Musapwishi 12:11 waamba’mba: ‘Byambo bya ba maana byauba nobe mingele kabiji byambo byo bakonkanya pamo byapainwe ku Kafunga umo byauba nobe misomali yo bapopesha bulongo.’ Binzhipwila “byauba nobe mingele” bebingijishanga pa kufunga banyama, byo biji lujimuno ne mafunde, nao akwasha muntu kuya mu jishinda jawama. “Misomali yo bapopesha bulongo” ilengela kishimikwa kukosa. Kufundako bakwetu bulongo nako kwakonsha kwibalengela kumona byawama. Ba maana ‘bakonkanya’ nangwa’mba baji na mukoyo wa kukeba “byambo byo bakonkanya pamo” bimwesha maana a “Kafunga” wabo umotu aye Yehoba.

Londelainga byuba uno Kafunga pa kufundako bakwenu. Kyawama bingi kutelekesha pa kufundako bakwetu. Inge byo tubena kwamba byaimena pa mafunde a mu Baibolo, byo tufundako bakwetu bikebakwasha kabiji bikebalengela ne kumona byawama bya myaka ne myaka.