Nanchi Mukumbu Wanema Nyi?

“Najinga na myaka jikumi byo natendekele kwenda na bansongwalume. Patanshi twakikwatangatu ku maboko ne kwifyompa. Pano bino kechi pabanjile ne, twatendekele kwikwata pa bibese bya mubiji byazhila ne kwilaala. Byo nafikizhe myaka ya kusemwa 15, natendekele kwingila nkito kabiji bansolomokanga ku banabalume pa nkito bakebanga kwilaala ne amiwa. Ne amiwa nakebelenga kuba byubilo byatama ne kwichina kala na bakwetu mo twaingijilanga. Nakebelenga amba bakwetu bantemwe, kabiji kino kyalengejile ketutumpuketu mu bulalelale.”—SARAH,a AUSTRALIA.

ABYA mwakonsha kukumya pa kumvwa amba Sarah wakomejile mu kisemi kya bena Kilishitu nyi? Bansemi banji baesekele kumukomesha mwayila mizhilo ya mu Baibolo ya byubilo byawama. Bino Sarah wasajilepo jishinda jingi.

Bavula bakonsha kulondela byafuukwilepo Sarah. Bamona amba Baibolo washala mu bya kala pa mambo a kwilaala. Bakwabo nabo bamona amba kupela ku maulu kechi kwatama nangwa kya kuba baya mu bupopweshi ne.

Nanchi kyanema kuyuka ne kwikela mwayila bifunjisha Baibolo pa mambo a kwilaala nyi? Baibolo mwine waamba’mba, ‘wanembelwe na lutangijilo lwa mupashi wa Lesa kabiji ye wawama kwibafunjisha bantu.’ (2 Timoti 3:16) Umvwe kya kuba mwaitabila amba Lesa ye walengele bantu bonse ne kuba’mba Baibolo Mambo anji anembelwe na lutangijilo lwanji, ko kuba’mba kyanema bingi kuyuka byo aamba pa ano mambo.

Kyatamakotu ke kya kuba’mba, bavula kechi bayuka Baibolo byo afunjisha pa mambo a kwilaala ne. Bantangi ba bupopweshi bamba’mba banemeka Baibolo bo bafunjisha byapusanako pa mambo a kwilaala. Luno lufunjisho lwalengela machechi avula kwabenamo.

Mu kifulo kya kuketekela byamba bantu, nanchi kechi kyawama kumonapo kimye anweba bene ne kupesapesa byaamba Baibolo pa uno mutwe nenyi? Kibaba kyalondelapo kyaamba pa mepuzho jikumi epuzha bantu javula pa byamba Baibolo pa kwilaala. Muji mikumbu ya kubula kupita mu mbaji yamwesha kya kine Baibolo byo afunjisha. Kibaba kyapelako mu ino mitwe yalondankana kisakwamba pa ene mambo o twafwainwa kutela muchima ku bintu byo tufuukulapo.

[Tubyambo twa mushi]