Mambo ka o Twafwainwa Kulondela Mizhilo ya mu Baibolo?

NANCHI Baibolo byo aamba pa kwilaala byapwa nkito kabiji wakizhamo kukanya nyi? Ine. Baibolo byo aamba pa kwilaala byakonsha kwitukwasha kuchinuzhuka:

▪ Bikola bisambukilañana kupichila mu kwilaala

▪ Kwimita memi abula a mu masongola a mu jifunde

▪ Bintu byatama bifuma mu kupwa kwa masongola

▪ Kwikala na jiwi ja mu muchima jazhatwa

▪ Kupwa munema na mambo a kwitwingijisha ku bantu

Mulenga wetu Yehoba Lesa,a ukeba amba twiyowe ne kumwenamo mu kwingijisha bya bupe byo etupa. Lesa ye “wimufunjisha’mba mukamwenemo byawama.” (Isaya 48:17) Muntu ulondela mizhilo ya mu Baibolo yaamba pa kwilaala:

▪ Witabilwa kwi Lesa

▪ Ukasuluka mu milanguluko

▪ Bulunda mu kisemi bukosa

▪ Kechi utamisha jizhina janji ne

▪ Unemekwa

Pano kyakonsha kwikala byepi inge kechi mubena kulondela mizhilo ya mu Baibolo ya byubilo byawama ne? Abya mwakonsha kupimpula bwikalo bwenu nyi? Nanchi Lesa ukemupamo mambo pa byubilo byenu bya kala nyi?

Akilangulukai pa kino kishinka: Bamo saka bakyangye kwikala mu kipwilo kya bena Kilishitu mu myaka kitota kitanshi baubanga bulalelale, bukende ne kwilaala kwa banabalume nangwa banabakazhi bonka bonka. Bino bafuukwilepo kupimpula bwikalo bwabo, kabiji bamwenejilemo bintu byavula bingi. (1 Kolinda 6:9-11) Lelo jino, bantu bavula kuzhokoloka ntanda yonse nabo bafuukulapo kuba byonka bino. Basha bwikalo buncha ne kumwenamo mu kulondela mizhilo yawama ya mu Baibolo. Akimonai byajinga Sarah, watongolwa mu kibaba kitanshi.

“Nafikenejiletu Kukasuluka”

Sarah wataine kuba’mba bwikalo bwanji bwa kwitayaika kechi bwamulengejile kukasuluka ne kutondwa kwesakana na byo akebelenga ne. Mwine washimuna amba: “Namwene kuba’mba jiwi ja mu muchima wami jankatazhanga. Naumvwanga bumvu kabiji naakaminwe amba nkemita nangwa kutambula nshiki yatama. Kechi nalubileko kuba’mba Lesa koaji ne, kabiji nayukile’mba bwikalo bwami bwamufichishe ku muchima. Namwene amba naubile bubipisho kabiji kyankolele bingi ku muchima.”

Kyapeleleko, Sarah waikele na bulume bwa kumukwasha kupimpula bwikalo bwanji. Bamukwashishe ku bansemi banji, Bakamonyi ba kwa Yehoba. Kabiji wayile ku bakulumpe mu kipwilo kya bwina Kilishitu monka mo aji kuba’mba bamukwashe. Sarah waamba’mba: “Nakuminye bingi byo bantambwijile bulongo ne butemwe bwamwesheshe bansemi bami ne bakulumpe mu kipwilo. Nafikenejiletu kukasuluka.”

Lelo jino Sarah uji na baana babiji. Waamba’mba: “Kechi mfya baana bami bintu byo nafuukwilepo kuba ne. Nkeba amba bayuke kulengulula mizhilo ya Lesa byo kwalengejile bwikalo bwami kutama. Kikonkwanyi kyami ke kya kwibakwasha kumwenamo ku mubiji, mu milanguluko ne mu byubilo kupichila mu kulondela byaamba Lesa pa mambo a kwilaala. Nasumininwa amba Lesa witupa mizhilo yawama kulondela mambo kechi ukeba amba bintu bitutamine ne.”

Ne anweba mwakonsha kumwenamo byawama mu kulondela lutangijilo lwawama lwa Lesa. Baibolo walaya bino amba: “Mafunde a Yehoba aoloka, asekesha ne muchima: Mukambizho wa Yehoba wawama, utokesha pa meso. . . . Pa kwibilama paji mfweto ikatampe.”—Salamo 19:8, 11.b

[Tubyambo twa mushi]

[Mabulañano pa peja 8]

Aba babula kulondela mizhilo ya mu Baibolo javula bayanda mu milanguluko

[Mabulañano pa peja 9]

Aba balondela mizhilo ya mu Baibolo bekala na jiwi ja mu muchima jawama kabiji bakosesha bulunda bwabo mu kisemi