Mepuzho Afuma Ku Batanga

Mu ñanyi jishinda lufu lwa bantu ba Lesa bakishinka mo lwaikela “lwa buneme ku meso a Yehoba”?

▪ Nyimbi wa masalamo watangijilwe na mupashi kwimba’mba: “Lufu lwa bazhijikwa [bakishinka] banji lo lwa buneme ku meso a Yehoba.” (Sala. 116:15) Bumi bwa mupopweshi yense wa Yehoba bwanema bingi kwi aye. Nangwa byonkabyo, byambo biji mu Salamo 116 kechi bibena kulumbulula lufu lwa muntu umo ne.

Pa kwamba jashi ja kijilo kya mwina Kilishitu, kechi kyawama kwingijisha Salamo 116:15 kwamba pa wafwa nangwa kya kuba awo wafwa wajinga kalume wakishinka wa Yehoba ne. Mambo ka? Mambo bino byambo bya nyimbi wa masalamo kechi bibena kwamba pa muntu umo ne. Kino kibena kulumbulula’mba Lesa kechi uswisha jibumba ja bantu banji bakishinka bonse kufwa ne, mambo banema bingi kwi aye.—Monai Salamo 72:14; 116:8.

Salamo 116:15 witulaya’mba Yehoba kechi ukaswisha jibumba ja bakalume banji bakishinka kwibazhiisha pano pa ntanda ne. Kya kine, bintu byo tupitamo mu moba etu a lelo bimwesha’mba twachinchika meseko akatampe ne kumanyikwa. Onkao mambo, kino ke kishiino kya kuba’mba Lesa kechi ukaswisha amba betuzhiishe ne.

Na mambo a kuba ye wa bulume bonse kabiji ukafikizha kyaswa muchima wanji, Yehoba kechi ukaswisha kwitonauna mu bujibumba ne. Inge Lesa waswisha kino, kyakonsha kumwesha’mba balwanyi banji bamukila bulume, pano bino, kino kechi kikobiwa ne. Mulanguluko wa Yehoba wa kuba’mba mu ntanda mukekale bantu bakishinka kwi aye, kine ukafika kwa kubula nangwa kuzhinaukatu ne. (Isa. 45:18; 55:10, 11) Kabiji mwingilo wazhila wa Yehoba wakonsha kuzhiya umvwe kya kuba bazhiisha bantu banji bonse ba kumupopwela mu bipango bya nzubo yanji ikatampe ya ku mupashi ya pano pa ntanda. Kabiji kechi kwakonsha kwikala bangikazhi ba mu “ntanda ipya,” ko kuba’mba bantu baoloka bakatangijilwanga na “jiulu jipya” ne. (Lum. 21:1) Kabiji Bukalama bwa Kilishitu bwa Myaka Kiumbi kechi bwakonsha kwikalako kwa kubula bangikazhi pano pa ntanda ne.—Lum. 20:4, 5.

Kifulo kikatampe kya Lesa ne jizhina janji byakonsha kuzhinaukwa inge waswisha balwanyi banji konauna bantu banji bonse pa ntanda. Kuswisha kino kintu kubiwa kwakonsha kulengela Yehoba kubula kuyukanyikwa’mba ye Nkambo Walengele Bintu Byonse. Bino na mambo a munema ye aji nanji ne jizhina janji jazhila, Yehoba kechi ukaswisha bantu banji bakishinka kwibepaya pa kimye kimo ne. Kabiji akilangulukai pa kino: Byo kiji kuba’mba Yehoba ke Lesa “wabula bubi,” kechi ukakankalwa kuzhikijila jibumba ja bantu banji babena kumwingijila mu bukishinka ne. (Mpitu. 32:4; Nte. 18:25) Kunungapo, kuswisha jibumba ja bakalume banji bonse kufwa kwakonsha kupusenamo na Mambo a Lesa aamba’mba: “Yehoba kechi ukebaleka bantu banji ne, na mambo a jizhina janji jikatampe.” (1 Sam. 12:22) Kya kine, “Yehoba kechi ukebataya bantu banji ne, Nangwa kuleka buswanyi bwanji ne.”—Sala. 94:14.

Kitutekenesha bingi kuyuka kuba’mba bantu ba Yehoba kechi bakazhiya bonse pa ntanda ne. Onkao mambo, twayai tukilemo kwikala bakishinka kwi Lesa ne kuketekela mulaye wanji wa kuba’mba: “Bino kafwako kyela nangwa kimo kyo bakabunda kya kukulwishako obewa kikengila bulongo ne, kabiji obewa ukebashinka bulaka bonse bakemana na kukushinawina mu kije. Bino bintu byo byo bakatambula ba mwingilo wami amiwa Yehoba, ne kubinga kwabo kukafuma kwi amiwa, byo byaamba Yehoba.”—Isa. 54:17.

[Mabululañano pa peja 22]

Lesa kechi ukaswisha bantu banji kuba’mba bazhiye ne