Nanchi Mubena Kusamisha Lukumo Lwa Yehoba Nyi?
“Tusamisha lukumo lwa Yehoba nobe kimbonyi.”—2 KO. 3:18.
MUSAKUKUMBULA’MBA KA?
Nangwa kya kuba twi bandengamambo, twakonsha kutumbijika byepi Yehoba?
Nga milombelo yetu ne kutanwa ku kupwila kwa bwina Kilishitu kwitukwasha byepi kusamisha lukumo lwa Lesa?
Ki ka kyakonsha kwitukwasha kutwajijila kupa Yehoba lukumo?
1, 2. Mambo ka o twafwainwa kuketekela’mba twakosha kwikala na byubilo bya Yehoba?
ATWEBA bonse twapasha bansemi betu mu bintu bimo. O ene mambo o tubujila kukumya inge twaumvwa muntu waambila kalombwana amba: ‘Ujitu nobe bashobe.’ Kashimbi bakonsha kumwambila’mba: ‘Undengela kuvuluka bainobe.’ Kabiji javula baana balondela byuba bansemi babo. Nga atweba kiji byepi? Nanchi twakonsha kulondela Shetu wa mwiulu, aye Yehoba nyi? Nangwa kya kuba tukyangye kumumonapo, twakonsha kumona byubilo byanji byawama kupichila mu kufunda Mambo anji, kumona bintu byo alenga ne kulanguluka languluka pa Binembelo kikatakata byobya byaamba pa byambo ne byubilo bya mwana Lesa, Yesu Kilishitu. (Yoa. 1:18; Loma 1:20) Twakonsha kusamisha lukumo lwa Yehoba.
2 Saka akyangye kulenga ba Adama ne Evwa, Lesa waketekejile kuba’mba bantu bakobanga kyaswa muchima wanji, kumwesha byubilo byanji ne kupana lukumo kwi aye. (Tangai Ntendekelo 1:26, 27.) Kupichila mu kwikala na munema wa kunemeka Lesa, twakonsha kumwesha byubilo bya Mwine witulengele. Umvwe twauba kino, tukekala na jishuko ja kusamisha lukumo lwa Lesa nangwa kya kuba twafuma mu bisho ne mitundu yapusana pusana nangwa twafunda nangwa ne. Mambo ka? Mambo “Lesa kechi uji na misalululo ne, bino mu bisaka byonse muntu wakamwa Lesa ne kuba byaoloka ye witabilwa kwi aye.”—Byu. 10:34, 35.
3. Bena Kilishitu bomvwa byepi byo bengijila Yehoba?
3 Bena Kilishitu bashingwa basamisha lukumo lwa Yehoba. Onkao mambo, mutumwa washingilwe na mupashi, aye Paulo wanembele’mba: “Atweba bonse, byo tuji na bilungi byavwetulwa tusamisha lukumo lwa Yehoba nobe kimbonyi, twalululwa mu kipasha kimo kyonka kufuma mu lukumo lumo kufika ne mu lukumo lukwabo.” (2 Ko. 3:18) Ngauzhi Mosesa byo akunkulukile kufuma ku Mutumba wa Sinai saka asenda mabwe apapakana panembelwe Mikambizho Jikumi, kilungi kyanji kyasamine mambo Yehoba wisambile nanji. (Lupu. 34:29, 30) Nangwa kya kuba bena Kilishitu kechi kyakibamwekelapo kala ne, kabiji bilungi byabo kechi bisama ne, bino bekala bingi na lusekelo pa kwisamba na bakwabo pe Yehoba, byubilo byanji ne mulanguluko wanji wawama ye alengejile bantu. Nobe bimbonyi bya mabwe byasamanga mu moba a kala, bashingwa ne balunda nabo bakekala pano pa ntanda, basamisha lukumo lwa Yehoba mu bwikalo bwabo ne mu mwingilo. (2 Ko. 4:1) Nanchi mubena kusamisha lukumo lwa Yehoba kupichila mu kumwesha byubilo bya kunemeka Lesa ne mu mingilo yenu byo muji basapwishi ba Bufumu ba kimye kyonse nyi?
TUKEBA KUSAMISHA LUKUMO LWA YEHOBA
4, 5. (a) Byonka byo kyajinga kwi Paulo, ñanyi bulwi bo tuji nabo? (b) Nga bundengamambo bwituba byepi?
4 Byo tuji bakalume ba Yehoba, tukebesha bingi kunemeka ne kutumbijika Mulenga wetu mu byonse byo tuba. Nangwa byonkabyo, javula kechi tufikizha bintu byo tukeba kuba ne. Paulo naye wajinga na luno lukatazho. (Tangai Loma 7:21-25.) Pa kulumbulula ene mambo o twaikela na buno bulwi, Paulo wanembele’mba: “Bonse baleenga mambo kabiji bapelelelatu ne kufika ku lukumo lwa Lesa ne.” (Loma 3:23) Kya kine, kupichila mu kuswana bundengamambo kufuma kwi Adama, bantu bonse banonkwa buzha na mambo a ‘Bundengamambo abo buji nobe Mfumu.’—Loma 5:12; 6:12.
5 Bundengamambo bo bu ka? Ke kintu kyonse kyapusana na bikeba Yehoba, mashinda anji, mizhilo yanji ne kyaswa muchima wanji. Bundengamambo bonauna bulunda bwa muntu na Lesa. Kabiji bwitulengela kupusa, byonkatu muntu byo asa muketo ne kupusa kintu kyo abena kukeba kwasa. Twakonsha kulenga mambo kya nshiji nangwa kwa kubula kuyuka. (Bala. 15:27-31) Bundengamambo bwaikizha mizhazhi mu bantu kabiji bwibabanya na Mulenga wabo. (Sala. 51:5; Isa. 59:2; Kolo. 1:21) Onkao mambo, bantu bonse kechi bafikizha bipimo bya Yehoba ne, kabiji bakankalwa kusamisha lukumo lwa Lesa kwesakana na mo akebela. Kwa kubula nangwa kuzhinaukatu ne, bundengamambo bo bulema bukatampe buji na bantu bonse.
6. Nangwa kya kuba twi bandengamambo, twakonsha kutumbijika byepi Lesa?
6 Nangwa kya kuba twi bandengamambo, Yehoba ke “Lesa upana luketekelo.” (Loma 15:13) Wanengezha jishinda ja kupwishishamo bundengamambo, ko kuba’mba kitapisho kya bukuzhi bwa kwa Yesu Kilishitu. Kupichila mu kwikala na lwitabilo mu kino kitapisho, kechi twikala “bazha ba bundengamambo” ne, bino twikala na jishuko ja kusamisha lukumo lwa Yehoba. (Loma 5:19; 6:6; Yoa. 3:16) Kutwajijila kwikala na bulunda bwawama ne Lesa kwituletela mapesho a Yehoba pa kino kimye ne kimye kya kulutwe po tukekala balumbuluka ne kwikala na bumi bwa myaka. Nangwa kya kuba tukiji bandengamambo, tuji bingi na mapesho mambo Lesa witumona pa muntu pa muntu kuba’mba twakonsha kusamisha lukumo lwanji.
SAMISHAINGA LUKUMO LWA LESA
7. Pa kuba’mba tusamishenga lukumo lwa Lesa, ñanyi kintu kyo twafwainwa kuyuka pe atweba bene?
7 Pa kuba’mba tusamishenga bulongo lukumo lwa Lesa, twafwainwa kuyuka twi bandengamambo. (2 Moba 6:36) Kabiji twafwainwa kuyuka milanguluko yetu ya bundengamambo ne kwingijilapo pa kuba’mba tufikilemo kutumbijika Lesa. Kyakumwenako, inge twaponena mu bundengamambo bwa kutamba bipikichala bya mulekese, twafwainwa kuyuka’mba tubena kukebewa kubula bakulumpe mu kipwilo kuba’mba betukwashe. (Yako. 5:14, 15) Luno lwakonsha kwikala lubaji lutanshi lo twafwainwa kuba pa kuba’mba twikale bwikalo bunemeka Lesa. Byo tuji bapopweshi ba Yehoba, twafwainwa kutwajijila kwipesapesa pa kuba’mba tuyuke inge tubena kwikela mwayila mizhilo yanji yaoloka. (Mana 28:18; 1 Ko. 10:12) Nangwa tuji na miteeto ya bundengamambo iji byepi, twafwainwa kutwajijila kwingijilapo pa kuba’mba tusamishenga lukumo lwa Lesa.
8. Nangwa kya kuba twi bambulwakulumbuluka, twakonsha kuba ka?
8 Yesu ye yenkatu waikele pano pa ntanda ne kufwa kwa kubula kufichishapo Lesa ku muchima ne, kabiji wasamishenga lukumo lwa Lesa. Nangwa kya kuba kechi twalumbuluka byonka byajinga Yesu ne, twakonsha kwibikako kulondela byo aubanga. (1 Pe. 2:21) Yehoba umona kwibikako kwetu ne kuyilako palutwe, kabiji witupesha byo twibikako na kumuletela lukumo.
9. Nga Baibolo wingila ñanyi mwingilo mu bwikalo bwa bena Kilishitu bakeba kwikela mwayila bikeba Lesa?
9 Mambo a Yehoba anembwa akonsha kwitumwesha po twakonsha kuwamisha. Kufunda Baibolo ne kulanguluka langulukapo pa Binembelo kwanema bingi. (Sala. 1:1-3) Kutanga Baibolo pa juba pa juba kuketukwasha kuwamishako bwikalo bwetu. (Tangai Yakoba 1:22-25.) Mambo lwitabilo lwetu lwaimena pa kuyuka Baibolo kabiji kyo kitukwasha kuchinuzhuka kulenga mambo akatampe ne kutokesha Yehoba ku muchima.—Sala. 119:11, 47, 48.
10. Lulombelo lwafwainwa kwitukwasha byepi kwingijila Yehoba bulongo?
10 Pa kuba’mba tusamishenga lukumo lwa Lesa, twafwainwa ne ‘kukelwanga mu lulombelo.’ (Loma 12:12) Twafwainwa kulomba kuba’mba Yehoba etukwashe kumwingijila mu jishinda jaitabilwa. Kabiji twakonsha kumulomba mupashi wazhila, kwitukwasha kwikala na lwitabilo lwakosa, bulume bwa kushinda meseko ne kwikala na maana a “kulumbulula bulongo mambo a bukine.” (2 Timo. 2:15; Mat. 6:13; Luka 11:13; 17:5) Byonkatu mwana byo akinka manungo mwi bashanji, ne atweba twafwainwa kukinka manungo mwi Shetu wa mwiulu, Yehoba. Inge twalomba kuba’mba etukwashe kumwingijila bulongo, twakonsha kuketekela’mba uketukwasha. Kange tulangulukenga’mba tubena kumukatazha ne. Mu kifulo kya kulanguluka bino, twayai tumutotenga, kumusanchila, kulomba lutangijilo lwanji kikatakata inge ketupite mu meseko ne kulomba amba etukwashe kumwingijila mu jishinda jizhijika jizhina janji jazhila.—Sala. 86:12; Yako. 1:5-7.
11. Kupwila kwa kipwilo kwitukwashisha byepi kusamisha lukumo lwa Lesa?
11 Lesa wapana mwingilo wa kulama mikooko yanji yanema kwi “kalume wakishinka kabiji wa maana.” (Mat. 24:45-47; Sala. 100:3) Jibumba ja kalume jatako bingi muchima kumona bakwabo ba mu lwitabilo byo babena kusamisha lukumo lwa Yehoba. Byonkatu sendwe usona bivwalo byo apima kya kuvwala pa kuba’mba tumweke bulongo, ne atweba ba mwingilo wa bwina Kilishitu kupwila kwitukwasha kwikala na byubilo byawama. (Hebe. 10:24, 25) Onkao mambo, twayai tufikenga bukiji ku kupwila, mambo inge twaikala na kisela kya kukelwa, tushalangapo pa bintu byo tufunda pa kupwila bitukwasha kwikala na byubilo byawama byo tuji bakalume ba Yehoba.
TWAYAI TULONDELENGA LESA
12. Twakonsha kulondela byepi Lesa?
12 Pa kuba’mba tumweshenga lukumo lwa Yehoba, twafwainwa kwikala “bakulondela Lesa.” (Efi. 5:1) Jishinda jimo ja kulondelamo Yehoba ke kumonanga bintu byonka byo ebimona. Kwikela mo tukebela kumwesha’mba kechi twamunemeka ne, kabiji kwakonsha kwituletela malwa a kabotoka. Byo kiji kuba’mba ntanda yo tujimo ibena kutangijilwa na mubi, Satana Diabola, twafwainwa kwingila na ngovu pa kuba’mba tushikwe bintu byashikwa Yehoba ne kutemwa byo atemwa. (Sala. 97:10; 1 Yoa. 5:19) Kyanema bingi kuyuka’mba jishinda jawama kwingijilamo Lesa ke kumupa lukumo mu bintu byonse byo tuba.—Tangai 1 Kolinda 10:31.
13. Mambo ka o twafwainwa kushikilwa bundengamambo, kabiji kino kiketulengela kuba ka?
13 Yehoba washikwa bundengamambo, ne atweba twafwainwa kwibushikwa. Onkao mambo, twafwainwa kuchinuzhuka bintu byatama ne kumona kuba’mba bundengamambo kechi bwitushinda ne. Kyakumwenako, twafwainwa kuchinuzhuka bunsatuki, bundengamambo bwakonsha kwitulengela kubula kufikilamo kutumbijika Lesa. (Mpitu. 13:6-9) Onkao mambo, twayai twibikengako kuchinuzhuka boba basenduka mu lwitabilo nangwa yense wamba’mba mulongo bino saka abena kuba byubilo bibula kunemeka Lesa. Kino byo byo kyakonsha kwikala nangwatu ku wa mu kisemi. (1 Ko. 5:11) Kafwako kyo twakonsha kumwenamo mu kwipachika na boba basenduka mu lwitabilo nangwa boba balengulula jibumba ja Yehoba ne. Kabiji kutanga byambo byabo mu mabuku, mu mapepala a byambo nangwa pa Intaneti kwakonsha kubika bu mupashi bwetu mu kizumba.—Tangai Isaya 5:20; Mateo 7:6.
14. Inge tukeba kusamisha lukumo lwa Lesa, ñanyi kyubilo kyo twafwainwa kwikala nakyo, kabiji mambo ka?
14 Kumwesha butemwe kyo kintu kikatampe kyo twafwainwa kuba pa kulondela Shetu wa mwiulu. Byonka byo aji, ne atweba twafwainwa kwikala na butemwe. (1 Yoa. 4:16-19) Kabiji kwitemwa atwe bene na bene ko kwituyukanyikisha’mba twi baana ba bwanga ba kwa Yesu kabiji amba twi bakalume ba Yehoba. (Yoa. 13:34, 35) Nangwa kya kuba tuji na bundengamambo bo twaswana bwakonsha kwitulengela kuba byatama, twafwainwa kwibuchinuzhuka ne kwikala na butemwe kimye kyonse. Kwikala na butemwe ne byubilo bikwabo byawama kuketukwasha kubula kuba bintu byatama bibula kumwesha lusa.—2 Pe. 1:5-7.
15. Nga butemwe bwitulengela kuba byepi na bakwetu?
15 Butemwe bwitulengela kukeba kubila bakwetu bintu byawama. (Loma 13:8-10) Kyakumwenako, kutemwa bena kwetu kuketulengela kubula kuzhilulula mwanya wa masongola. Kutemwa bakulumpe mu kipwilo ne kunemeka mwingilo wabo, kuketukwasha kukokela ne kunekenena buntangi bwabo. Kabiji baana batemwa bansemi babo bakokela ne kwibanemeka kabiji kechi bamba byatama pe abo ne. Inge twatemwa bakwetu, kechi tukamonanga nobe twibakila nangwa kubula kwibapa mushingi ne. (Yako. 3:9) Kabiji bakulumpe mu kipwilo batemwa mikooko ya Lesa, bakeilamanga bulongo.—Byu. 20:28, 29.
16. Butemwe bwakonsha kwitukwasha byepi mu mwingilo wetu wa kusapwila?
16 Butemwe kyo kyubilo kikatampe kyo twafwainwa kumwesha mu mwingilo wetu. Na mambo a kutemwa Yehoba, kechi tukalefulwa na mambo a misalululo nangwa inge kya kuba bantu bamo babula kutambwila mambo awama ne. Mu kifulo kya kuba byobyo, tukatwajijila na kusapwila mambo awama. Kabiji butemwe buketulengela kunengezha bulongo pa kuba’mba twingilenga bulongo mwingilo wa kusapwila. Inge twatemwa Lesa ne bakwetu, kechi tukamonanga mwingilo wa kusapwila Bufumu nobe mingilotu ikwabo ya ku mubiji ne. Bino tukamonanga’mba jishuko jikatampe kabiji tukengilanga na lusekelo.—Mat. 10:7.
TWAJIJILAI KUTUMBIJIKA YEHOBA
17. Kuyuka kuba’mba twapelelelatu ne kufika ku lukumo lwa Lesa ne, kwitulengela kumwenamo byepi?
17 Bantu ba mu ino ntanda kechi bayuka’mba bundengamambo ke kintu kyatama bingi ne, bino atweba twayuka. Kino kitulengela kuyuka buneme bwa kuchinuzhuka byubilo bya bundengamambo. Kabiji kuyuka kuba’mba twi bandengamambo kwitukwasha kufunjisha jiwi jetu ja mu muchima pa kuba’mba jitukwashenga kuyuka mwakubila inge mu muchima mwaiya milanguluko ya kukeba kulenga mambo. (Loma 7:22, 23) Kya kine, twakonsha kukoka, pano bino Lesa wakonsha kwitukosesha kuba kyawama kimye kyonse.—2 Ko. 12:10.
18, 19. (a) Ki ka kitulengela kushinda mu bulwi bwetu bwa kulwa na nzhita ya bapashi batama? (b) Twafwainwa kufuukulapo kuba ka?
18 Pa kuba’mba tutumbijike Yehoba, twafwainwa ne kulwa na nzhita ya bapashi batama. Bilwilo byetu bya nkondo ya ku mupashi bitupa Lesa byo bitukwasha kushinda buno bulwi. (Efi. 6:11-13) Satana ukeba kwangata lukumo lwafwainwa kuyatu kwi Yehoba kwapwa. Kabiji Diabola watwajijila kukeba konauna bulunda bwetu na Yehoba. Pano bino, Satana upulwilamotu mabula umvwe bantu bambulwakulumbuluka, banabalume, banabakazhi ne baana batwajijila kulama bukishinka bwabo ne kutumbijika Lesa. Onkao mambo, twayai tutwajijile kutota Yehoba byonka byuba bilengwa bya mwiulu, byamba’mba: “Anweba Yehoba Lesa wetu, mwafwainwa kutambula lukumo, buneme ne bulume, mambo yenu mwalengele bintu byonse kabiji na mambo a kyaswa muchima wenu o byaikajileko ne kulengwa.”—Lum. 4:11.
19 Twayai tutwajijile kutumbijika Yehoba, nangwa bintu bikatazhepotu byepi. Mambo umvwa bingi bulongo pa kumona bantu bakishinka saka bebikako kumulondela ne kusamisha lukumo lwanji. (Mana 27:11) Twayai twambenga byonka byaambile Davida byo aimbile’mba: “Nkemutota, anweba Nkambo Lesa wami, na muchima wami yense; Kabiji nkatumbijikanga jizhina jenu myaka ne myaka.” (Sala. 86:12) Tubena kutengela juba jo tukafikilamo bulongo kutumbijika Yehoba ne kumutota myaka ne myaka. Kino kikekala kimye kya lusekelo ku bantu balukokelo. Nanchi mubena kusamisha lukumo lwa Yehoba Lesa, na luketekelo lwa kutwajijila kuba bino myaka ne myaka nyi?
[Kipikichala pa peja 27]
Nanchi mubena kusamisha lukumo lwa Yehoba mu ano mashinda nyi?