Kupwila kwa Nkambi ne kwa Mikoka Kwitutundaika Kupa Lesa Lukumo!
Kupwila kwa Nkambi kwa “Pai Lesa Lukumo” ne kwa Mikoka kwajingako, kwapana bukamonyi bwawama bingi. Kuno kupwila kwanema, kwatumbijika jizhina ja Yehoba ne kwitutundaika ‘kupana kwi Yehoba lukumo lwafwainwa jizhina janji.’ (Sala. 96:8) Ee kine, wafwainwa kutumbijikwa na mambo a mingilo yanji ya kukumya ya kulenga bintu bimwesha byubilo byanji byawama.—Yoba 37:14; Lum. 4:11.
Kwingijisha mepuzho alondelapo pamo na byambo byo mwanembele pa kupwila kwa nkambi, nengezhai bulongo kuba’mba mukakumbulepo pa kupitulukamo mu majashi mu mulungu wa October 20.
1. Bilengwa bibula kupema bipana byepi lukumo kwi Lesa, kabiji kino kyapusana byepi na jishinda jo bapainamo bantu lukumo kwi aye? (Sala. 19:1-3; “Bilengwa Byamba Lukumo lwa Lesa”)
2. Kimwesho kya kukumya kya kwaluka kwa kwa Yesu kimenako ka ano moba, kabiji kumwekanyika kwanji lelo jino kukosesha byepi bena Kilishitu ba ano moba? (Jashi jikatampe, “Bimwesho bya Bungauzhi bwa Lukumo Bitukosesha!”)
3. Twakonsha kwipelula byepi byonka bipelwile ngauzhi Danyela, kabiji mu kuba bino twakonsha kumwenamo byepi? (Da. 9:2, 5; 10:11, 12; “Lukumo lwa Yehoba Lumwekela Boba Bepelula”)
4. (a) Ñanyi bintu bisatu byo twakonsha kufunjilako ku luzhachisho loaleta Lesa luji mu bungauzhi bwa kwa Amosi? (Amo. 1:3, 11, 13; 9:2-4, 8, 14) (b) Lufunjisho ka lwanema Bakamonyi bakwa Yehoba lo bafwainwa kufunjilako ku lujimuno luji mu Amosi 2:12? (“Byotufunda mu Bungauzhi bwa kwa Amosi mu Moba etu a Lelo”)
5. (a) Bubi ka buji mu kutoma maalwa bibi, nangwa kya kuba muntu kechi wapendwa ne? (b) Abya lukatazho lwa kutoma maalwa bibi, lwakonsha kupwa byepi? (Mako 9:43; Efi. 5:18; “Chinai Kutoma Maalwa Bibi”)
6. Mubena kumwenamo byepi mu buloshuwa wakatataka wa ‘Monai Kyalo kyawama’? (“‘Ntanda Yawama’—Kimwesho kya Bikekala Paladisa”?
7. Mu ñanyi mashinda asatu ‘motumweshesha lukumo lwa Yehoba nobe katajilo’? (2 Ko. 3:18; ‘Tumwesha Lukumo lwa Yehoba Nobe Katajilo’)
8. Ñanyi ulengela’mba betushikwe pa kubula mambo, kabiji kika kyakonsha kwitukwasha kusungijila bulumbuluke bwetu nangwa kya kuba bantu betushikwa? (Sala. 109:1-3; “Bo Bashikwa pa Kubula Mambo”)
9. Kilishitu wamonanga byepi kutumbalala, kabiji muntu wakonsha kuyuka byepi amba wafwainwa kwikala na ino mweno? (Mat. 20:20-26; “Ikalai na Ndangulukilo ya kwa Kilishitu ya byo Amona Kutumbalala”)
10. Kika kyakonsha kwitukwasha kutwajijila kwikala bakosa ku mupashi nangwa kya kuba twakoka ku mubiji? (“Bakoka ku Mubiji, Bino Kechi Bakoka ku Mupashi Ne”)
11. Mashinda ka amo Satana o atundaikilamo bubela, kabiji Kinembelo ka kyafwainwa kwingijishiwa ku meseko abena kukeba kwitonawina lwitabilo? (Yoa. 10:5; “Jimukai na ‘Jiwi ja Benyi’”)
12. Bansemi bakonsha kulonda byepi kyakumwenako kya kwa Yesu kwesakana na byo kyanembwa mu Mako 10:14, 16? (b) Kika kimusangajika pa mambo a buku wakatataka wa Sambilila Kuli Kasambilisha Mukalamba? (“Baana Betu ke Bunonshi Bwanema Bingi”)
13. Bakyanyike babena kutota byepi Yehoba? (1 Timo. 4:12; “Bakyanyike byo Babena Kutota Yehoba”)
14. Bintu ka bimo byo mubena kuvuluka mu kifwanyikizho kya “Kosaiko na Kusapwila Nangwa Babena Kwimukanya”?
15. Twakonsha kumwenako byepi kwi (a)ba Petelo ne Yoano? (Byu. 4:10, NW) (b) Setepena? (Byu. 7:2, 52, 53) (c) ku kipwilo kya bena Kilishitu ba mu myaka kitota kitanshi? (Byu. 9:31; kifwanyikizho ne jashi “Sapwilai Mambo Awama ‘kwa Kubula Kuleka’”)
16. (a) Ñanyi mashinda o twaitabanzhañene a kupelamo Lesa lukumo? (b) Bika byo twafwainwa kuketekela umvwe ketulondele byo twafunjile pa kupwila kwa nkambi kwa “Pai Lesa Lukumo”? (Yoa. 15:9, 10, 16; “‘Pangainga Bipangwa Byavula’ bya Kuletela Yehoba Lukumo”)
Kulangulukanga mikambizho yawama yo twafunjile pa kupwila kwa nkambi, kuketutundaika kwingijishanga byonse byo twafunjile. (Fili. 4: 8, 9) Kino kikakosesha mulanguluko wetu wa kukeba ‘kubila byonse lukumo lwa Lesa.’—1 Ko. 10:31.