Fwenyai Kwipi Ne Lesa

Nanchi Lesa Inge Walekela Muntu Mambo, Ulubako Nyi?

MUKUMBU ke wa kuba’mba, ee. Yehoba walaya bo atala bulongo amba: “Amiwa nkebalekela bubi bwabo, ne kwiavuluka mambo abo jibiji ne.” (Yelemiya 31:34) Yehoba walaya bandengamambo balapila amba, inge wibalekela mambo kechi wiavuluka ne. Nanchi kino kilumbulula’mba Mulenga wa bintu byonse kechi wakonsha kuvuluka mambo o alekejileko muntu nenyi? Byambo byanembele Ezikyo bitulengela kuyuka Lesa byo alekelako mambo ne kulubako.—Tangai Ezikyo 18:19-22.

Yehoba waingijishe Ezikyo kushimuna buchibamambo bwanji bwaishilenga pa bena Yuda ne pa bena Yelusalema baubanga byatama. Uno mukoka walekele kupopwela Yehoba kabiji mu ntanda mwayujile bukapondo. Yehoba waambijile jimo konaunwa kwa Yelusalema ku bena Babilona. Yehoba waambile byambo bipana luketekelo. Bonse pa muntu pa muntu bafwainwe kusalapo, muntu yense wazhachilwe nangwa kubinga pa byo aubanga.—Byepelo 19 ne 20.

Pano kyaikele byepi inge kya kuba muntu walekele byubilo byanji byatama ne kutendeka kuba byawama? Yehoba waambile’mba: “Umvwe aye mubi waleka bubi bwanji bonse bo aubilenga, ne kulama malamuna ami onse, kasa oba bya mwayila mizhilo, byonka byaoloka, kine ukekala na bumi, kechi ukafwa ne.” (Kyepelo 21) Yehoba ‘waswila jimo kulekela mambo’ balapila ne kusankilapo mashinda abo ancha, bajanyenye.—Salamo 86:5.

Pano ibyepi pa mambo o alengele? Yehoba waamba’mba: “Kafwako nangwa kimo kya mu mizhilulwila yanji yo azhilulwile kyo bakamuvulukila ne.” (Kyepelo 22) Muntu walapila ‘mizhilulwila yanji yo azhilulwile kechi bakamuvulukilayo ne.’ Mambo ka kino o kyanemena?

Mu Baibolo, kyambo kya Kihebelu kyatuntululwa’mba “kuvuluka” kechi kilumbululatu kuvuluka bya kunyuma ne. Pa kino kyambo buku umo wamba’mba: “Javula kilumbulula kumubapo kimo pa byo aubile.” Onkao mambo “kuvuluka” kulumbulula “kumubapo kimo” muntu watamishe. Yehoba byo aamba pa walapila amba, ‘mizhilulwila yanji yo azhilulwile kechi ukamuvulukila ne,’ ulumbulula’mba kechi ukamukambula pa byo aubile ne.a

Byambo byotutanga pa Ezikyo 18:21, 22 bitulengela kuyuka Lesa po afika mu kulekela mambo, ako kwitufika bingi pa muchima. Umvwe Yehoba witulekela mambo kechi uketubapo kimo pa mambo a kala ne. Bino aye utaya mambo a walapila kunyuma yanji. (Isaya 38:17) Kijitu nobe wafuta po anembele mambo etu.—Byubilo 3:19.

Lusa lwa Lesa lwanema bingi kwi atweba bantu bambulwa kulumbuluka. Tulenga mambo javula. (Loma 3:23) Yehoba ukeba atweba bonse kuyuka kuba’mba uketulekelako mambo umvwe twalapila kufuma panshi ya muchima. Kabiji umvwe witulekelako mambo, ulubako, ko kuba’mba kechi ukeavuluka ne kwitubapo kimo nangwa kwitukambula ne. Kino kitutekenesha bingi! Nanchi lusa lwa Lesa kechi lwimulengela kukebesha kufwenya kwipi ne aye nenyi?

[Tubyambo twa mushi]