Ingijilainga Lesa Upana Bwana Bwa Bene

“Kutemwa Lesa kulumbulula amba tulondelenga mikambizho yanji; kabiji mikambizho yanji kechi yakatazha ne.”—1 YOA. 5:3.

MWAKONSHA KUKUMBULA NYI?

Satana ulengela byepi mizhilo ya Lesa kumweka nobe yakatazha?

Mambo ka o twafwainwa kujimukila pa kusala ba kupwanañana nabo?

Ki ka kiketukwasha kutwajijila kwikala bakishinka kwi Lesa upana bwana bwa bene?

1. Yehoba umona byepi bwana bwa bene, kabiji wamwesheshe byepi kino na byo aubile na ba Adama ne Evwa?

YEHOBA ye yenkatu uji na bwana bwa bene bwa kine. Pano bino, kechi wibwingijisha mu jishinda jatama; nangwa kufuukwila bakalume banji bintu byonse bya kuba ne. Pakuba wibapa lūsa lwa kwifuukwila bintu ne kuba bintu byawama byo bakeba. Kyakumwenako, Lesa wapainetu muzhilo umo ku ba Adama ne Evwa wa kubula kuja ku “kichi kya kuyuka byawama ne byatama.” (Nte. 2:17) Onkao mambo, bajinga na bwana bwa bene bwa kuba kyaswa muchima wa yewa wibalengele.

2. Bansemi betu batanshi baonawine byepi bwana bwa bene bwibapele Lesa?

² Mambo ka Lesa o apelejile bansemi betu batanshi lūsa lwabaya lwa kwifuukwila bintu? Ke na mambo a kuba wibalengele mu kipasha kyanji ne kwibapa jiwi ja mu muchima, waketekejile kuba’mba bakobanga byaoloka mambo a kutemwa Mulenga wabo. (Nte. 1:27; Loma 2:15) Kyataminekotu, ba Adama ne Evwa bakankelwe kunemeka wibapele bumi kubikapotu ne bwana bwa bene. Basajilepo bwana bwa bene bwatama bwibapele Satana bwa kwitolwela. Bamwene nobe basa kwikala na bwana bwa bene bwabaya, pano bino, kufuukula kwabo kwalengejile abo ne baana babo kwikala bazha ba bundengamambo mwafuma buyanji ne lufu.—Loma 5:12.

3, 4. Satana weseka byepi kwitujimbaika pa mambo a mizhilo ya Yehoba?

³ Umvwe Satana walengejile bantu babiji balumbuluka ne bamalaika bavula kukana bumfumu bwa Lesa, ko kuba’mba ne atweba wakonsha kwitongola. Bitewa byanji kechi byaaluka ne. Weseka kwitujimbaika kupichila mu kulanguluka amba mikambizho ya Lesa yakatazha, kabiji itulengela kubula kwiyowa bya kisangajimbwe. (1 Yoa. 5:3) Milanguluko ya uno mutundu yakonsha kwitutwala mungi inge kya kuba ketupwanañane na bantu balanguluka byobyo. Nyenga wa myaka ya kusemwa 24 waubile bulalelale waambile’mba: “Kupwanañana na babi kwandengejile kuba bintu byaubilenga bakwetu, mambo nakebanga kuba bintu byaubangapo bakwetu.” Kampe ne anweba bakimukatazhapo kala ku bakwenu mu jino jishinda.

⁴ Kyatamakotu ke kya kuba’mba, bamo mu kipwilo kya bena Kilishitu nabo bakonsha kwitulengela kuba kintu kyatama. Kamonyi wakyanyike umo waambile’mba: “Bakwetu bamo baipangwizhe bantu babula mu lwitabilo. Na mambo a kukaya nabo kimye kyabaya, ne amiwa natendekele kwikala byonka byo bajinga. Bulunda bwami na Lesa bwatendekele kukoka. Kechi namwenangamo mu kajo ka ku mupashi pa kupwila ne, kabiji nayangatu ja kamo kamo mu mwingilo. Po po nayukile kuba’mba nafwainwa kuleka kukaya nabo, kabiji byo byo naubile.” Nanchi mwamona balunda byo bakonsha kwimulengela kuba nyi? Akilangulukai pa kyakumwenako kya mu Baibolo kyakonsha kwitukwasha mu ano moba.—Loma 15:4.

WAONGWELE MICHIMA YABO

5, 6. Nga Abisalomo waongwele byepi bakwabo, kabiji abya waubile kintu kyo akebelenga nyi?

⁵ Mu Baibolo muji byakumwenako byavula bingi bya bantu balengelanga bakwabo kuba byatama. Umo pa bano ke Abisalomo, mwana Mfumu Davida. Abisalomo wajinga mwanamulume wa buya. Nangwa byonkabyo, mu kuya kwa kimye, byonka biji Satana, Abisalomo waikele na lwiso, mambo watendekele kukumbwa jitanda ja bufumu bwa shanji, kintu kyo abujile lūsa lwa kwikala nakyo.a Pa kuba’mba angate bufumu, Abisalomo wajimbaikile bena Isalela amba ukeba kwibakwasha ne kwibambila mu bujimuku amba mfumu kechi wibatele muchima ne. Byonkatu byaubile Diabola mu bujimi bwa Edena, Abisalomo walengejile bantu kulanguluka’mba wibata muchima kabiji wabepele bubela bwatama bingi pe bashanji.—2 Sam. 15:1-5.

⁶ Nanchi Abisalomo waubile kintu kyo akebelenga kuba nyi? Twakonsha kwamba’mba ee, mambo jishimikila ja mu Baibolo jaamba’mba: “Abisalomo waongwele michima ya bena Isalela.” (2 Sam. 15:6) Nangwa kya kuba Abisalomo waongwele bantu, pano bino, kyapeleleko bamushinjile. Mu kwitota kwanji mwafumine lufu kabiji waipayishe ne biumbi bya bantu bamulondejilenga.—2 Sam. 18:7, 14-17.

7. Ñanyi bintu byo twafwainwa kufunjilako ku jishimikila ja kwa Abisalomo? (Monai kipikichala pa jipa 14.)

⁷ Mambo ka bena Isalela o bajimbaikilwe bukiji? Kampe bakebelenga bintu bibalaile Abisalomo. Nangwa kampe bajimbaikilwe na mambo a mwekelo yanji. Kechi twayuka kyalengejile ne, pano kishinka ke kya kuba’mba: Kechi bajinga bakishinka kwi Yehoba ne ku mfumu ye atongwele ne. Ne lelo jino, Satana watwajijila kwingijisha bantu baji nobe “Abisalomo” kongola michima ya bakalume ba Yehoba. Bano bantu bakonsha kwamba’mba, ‘Mizhilo ya Yehoba yakatazha bingi nangwa amba bantu babula kwingijila Yehoba baji bingi na lusekelo.’ Inge mwaumvwa byambo bya uno mutundu, nanchi muyuka amba bya bubela ne kutwajijila kwikala bakishinka kwi Lesa nyi? Nanchi mwayuka’mba muzhilo wa Yehoba bunke ye ‘muzhilo walumbuluka,’ muzhilo wa Kilishitu, wakonsha kwimulengela kwikala na bwana bwa bene bwa kine nyi? (Yako. 1:25) Inge ibyo, nemekai uno muzhilo, kabiji kange mwingijishenga kutama bwana bwa bene bwa bwina Kilishitu bo muji nabo ne. —Tangai 1 Petelo 2:16.

8. Ñanyi bintu byaubiwe bimwesha’mba mu kulengulula mizhilo ya Yehoba kechi mufuma lusekelo lwa kine ne?

⁸ Satana wazanza meso kikatakata pa bakyanyike. Mulongo uji na myaka kukila pa 30, waambile pa kimye kyo akijinga mwanyike amba: “Namonanga nobe mizhilo ya Yehoba ya byubilo byawama yakatazha, kechi neimonanga’mba ituzhikijila ne.” Kyafuminemo, waubile bulalelale. Kino kechi kyamuletejile lusekelo ne. Waambile’mba: “Pa myaka yavula najinga bingi na binyenge na mambo a kunkatazha ku jiwi jami ja mu muchima.” Nyenga umo waubile bulalelale kimye kyo ajinga wakyanyike wanembele’mba: “Panyuma ya kuba bino, naumvwine bulanda ne kumvwa nobe ne watutu. Papita ne myaka 19, ne luno nkivuluka kino kintu kyatama kyo naubile.” Nyenga mukwabo waambile’mba: “Kulanguluka’mba byubilo byami byafichishe ku muchima bantu bo natemwa, kabiji byaonawine bulunda bwami na Lesa kyandengejile kwilangulusha bingi. Ke kintu kyatama bingi kubula kubilwa bibusa kwi Yehoba.” Satana kechi ukeba’mba mulangulukenga pa byatama bifuma mu bundengamambo ne.

9. (a) Ñanyi mepuzho akonsha kwitukwasha kupesa pesa bulongo byo tumona Yehoba, mizhilo yanji ne mafunde anji? (b) Mambo ka o kyanemena kuyuka Lesa bulongo?

⁹ Kyatamakotu ke kya kuba’mba bakyanyike bavula baji mu bukine, kubikakotu ne bakulumpe, bafunjila bintu mu kitoba kuba’mba byakisangajimbwe bya bundengamambo mufuma kalulu kuvimba meso. (Nga. 6:7, 8) Onkao mambo, iipuzhai kuba’mba: ‘Nanchi nayuka mashinda a bujimuku Satana o engijisha kuba’mba antwale mungi nyi? Nanchi mmona Yehoba amba mulunda nami wa pa muchima umbula bya kine, kabiji ukeba’mba mmwenemo byawama nyi? Abya nashiinwa kuba’mba kechi ukantana bintu byawama kabiji bikandengela kwikala na lusekelo nenyi?’ (Tangai Isaya 48:17, 18.) Pa kuba’mba mukumbule kufuma panshi ya muchima’mba ee, mwafwainwa kumuyuka bulongo Yehoba. Mwafwainwa kumuyuka bulongo ne kuyuka’mba mizhilo ne mafunde a mu Baibolo amwesha’mba wimutemwa, kechi kwimwangata bwana bwa bene ne.—Sala. 25:14.

LOMBAI KUBA’MBA MWIKALE NA MUCHIMA WA MILANGWE

10. Mambo ka o twafwainwa kwibikilako kulondela Mfumu wa kyanyike Solomone?

¹⁰ Byo akijingatu nsongwalume, Solomone walombele amba: “Njitu mwanyike mucheche; naluba mwa kutwajila mingilo yami.” Kepo alombele muchima wa milangwe. (1 Mfu. 3:7-9, 12) Yehoba wakumbwile milombelo yanji ya kufuma panshi ya muchima, ne anweba ukakumbula milombelo yenu nangwa mwi banyike nangwa mwi bakulumpe. Ibyo kuba’mba Yehoba kechi ukemupa maana ne milangwe mu jishinda ja kukumya ne. Pano bino, ukemulengela kwikala na maana inge ke mufunde Mambo anji, kulomba mupashi wanji wazhila, ne kulondela mafunde ne mikambizho yo mutambwila kupichila mu kipwilo kya bwina Kilishitu. (Yako. 1:5) Ee kine, Yehoba ulengela bakalume banji bakyanyike kwikala ba maana kukila boba balengulula lujimuno lwanji, nangwatu boba betela’mba, ‘bamaana ne bamilangwe’ ba mu ino ntanda.—Luka 10:21; tangai Salamo 119:98-100.

11-13. (a) Ñanyi mafunjisho anema o twafwainwa kufunda mu Salamo 26:4, Byambo bya Mana 13:20, ne mu 1 Kolinda 15:33? (b) Mwakonsha kwingijisha byepi mafunde aji mu bino Binembelo?

¹¹ Pa kuba’mba tumvwishe buneme bwa kufunda Baibolo ne kulanguluka pa byo tutanga kuba’mba tuyuke Yehoba bulongo, twayai tulanguluke pa binembelo byalondelapo. Mu bino binembelo muji mafunde anema bingi aamba pa byo twakonsha kusala balunda. Byaamba’mba: “Kechi naikele na bantu ba bubela ne; Kabiji kechi nkende na babujimbijimbi ne.” (Sala. 26:4) “Awa wenda na ba mana ukekala ke wa mana; pakuba awa wenda ne bakosama ukamona byakatazha.” (Mana 13:20) “Kupwanañana na babi konauna byubilo byawama.”—1 Ko. 15:33.

¹² Ñanyi mafunjisho anema o twafwainwa kufunjilako ku bino binembelo? (1) Yehoba ukeba’mba tusalenga bulongo balunda. Ukeba kwituzhikijila ku bintu byakonsha konauna byubilo byetu byawama ne bulunda bwetu ne aye. (2) Kwa kubula nangwa kuzhinaukatu ne, bantu bo tupwanañana nabo bakonsha kwitulengela kuba bintu byawama nangwa byatama. Nembelo ya byepelo biji peulu po imwesha’mba Yehoba ubena kukeba kwitufika pa muchima. Ubena kuba byepi kino? Monai kuba mba kafwapo nangwa kyepelo kimo pa bino byepelo kyo banemba nobe mizhilo ya kuba’mba “kuba kikye ne.” Pakuba byanembwa mu jishinda japela kumvwa. Kiji nobe Yehoba ubena kwitwambila’mba: ‘Bino byo bishinka. Musakubapo byepi? Ki ka kiji mu muchima wenu?’

¹³ Kikwabo, mambo a kuba bino byepelo bisatu byanembwa nobe bishinka, kechi bipwa nkito ne. Iipuzhai anweba bene mepuzho nabiji a kuba’mba: Nakonsha kuchinuzhuka byepi kupwanañana na bantu “babujimbijimbi”? Mu ñanyi bintu mo nakonsha kupwanañena na bantu ba uno mutundu? (Mana 3:32; 6:12) Ñanyi bantu “ba mana” Yehoba bo akeba’mba mpwanañanenga nabo? Nga bantu “bakosama” bo akeba’mba nchinuzhukenga bo bañanyi? (Sala. 111:10; 112:1; Mana 1:7) Ñanyi “byubilo byawama” byo nkonauna inge nasalapo kupwanañana na babi? Nanchi mu ntanda mo mujitu balunda batama nyi? (2 Pe. 2:1-3) Mwakonsha kukumbula byepi ano mepuzho?

14. Mwakonsha kulengela byepi Kupopwela kwa Kisemi kyenu kuwama?

¹⁴ Byonka byo twisamba pa bino Binembelo, byo byo mwafwainwa ne kutanga binembelo bikwabo pa kuba’mba muyuke milanguluko ya Lesa pa mitwe yanema kwi anweba ne kisemi kyenu.b Anweba bansemi, langulukai kwisamba ino mitwe kimye kya Kupopwela kwa Kisemi kyenu. Kimye kyo mubena kuba bino, vulukainga kuba’mba kyo mubena kukeba ke kukwasha yense wa mu kisemi kunemeka kya kine butemwe bwa Lesa byonka byo bwasololwa mu mizhilo ne mafunde anji. (Sala. 119:72) Kine, kufunda kwa uno mutundu, kukalengela bonse ba mu kisemi kyenu kufwenya kwipi ne Yehoba ne kukwatankana.

15. Mwakonsha kuyuka byepi inge mwatendeka kwikala na muchima wa milangwe?

¹⁵ Mwakonsha kuyuka byepi amba muji na muchima wa milangwe? Jishinda jimo ke kwesakanya milanguluko yenu na ya bantu bakishinka bajingako kala, nabiji Mfumu Davida wanembele’mba: “Nsekela bingi mu kuba kyaswa muchima wenu, anweba Lesa wami; Kine, mizhilo yenu yanembwa mukachi kami.” (Sala. 40:8) Kabiji nembi wa Salamo 119 naye waambile’mba: “Kine, buku wenu wa mizhilo byo namutemwisha! I ye ye ndanguluka juba jonse.” (Sala. 119:97) Mwafwainwa kwingila na ngovu pa kuba’mba mwikale na butemwe bwa uno mutundu. Buno butemwe bubaya umvwe ke mufunde na mukoyo, lulombelo, kulanguluka langulukapo ne kumona mapesho avula afuma mu kukokela mizhilo ya Lesa.—Sala. 34:8.

LWISHAI BWANA BWA BENE BWA BWINA KILISHITU!

16. Mwafwainwa kuyuka ñanyi kintu inge mukeba kushinda mu bulwi bwa kulwisha bwana bwa bene bwa kine?

¹⁶ Mwapita bwikalo bwa bantu, byalo bilwa makondo na mambo a kukeba kwikala na bwana bwa bene. Onkao mambo, anweba mwakonsha ne kukilamo kwipana kulwisha bwana bwa bene bwa bwina Kilishitu. Mwafwainwa kuyuka’mba balwanyi benu kechi Satana yenkatu ne, bino ne ntanda ne mupashi wayo watama. Kabiji muji ne na bulwi na bumbulwakulumbuluka bwenu, kubikapo ne muchima wa bujimbijimbi. (Yele. 17:9; Efi. 2:3) Nangwa byonkabyo, na bukwasho bwa Yehoba mukashinda. Kyakilapo, mu kushinda kwenu mukafuma bintu bibiji byawama. Kitanshi, mukasangajika muchima wa Yehoba. (Mana 27:11) Kya bubiji, byo mubena kumona bulume bwa Lesa bukasulula buji mu ‘muzhilo walumbuluka wa bwana bwa bene,’ po po mukakilamo ne kutwajijila kwikala mu ‘jishinda jakepa’ jitwala ku bumi bwa myaka. Mu kuya kwa kimye, mukeyowa bwana bwa bene bwa kine Yehoba bo alaya bantu banji bakishinka.—Yako. 1:25; Mat. 7:13, 14.

17. Mambo ka o twafwainwa kubujila kwinyengaika inge twatamisha, kabiji ñanyi bukwasho Yehoba bo apana?

¹⁷ Ibyo kuba’mba bimye bimo bonse tulubankanya. (Sapwi. 7:20) Umvwe kino kyaubiwa, kechi mwafwainwa kwinyengaika nangwa kulefulwa ne. Inge mwatamisha mwafwainwa kwingijilapo, nangwatu inge kibena kukebewa bukwasho kufuma ku bakulumpe mu kipwilo. Yakoba wanembele’mba: “Lulombelo [lwabo] lwa lwitabilo lukalengela muntu wakolwa kukosa, ne Yehoba ukamubuka. Kabiji umvwe walengele mambo, Lesa ukamulekelako.” (Yako. 5:15) Kya kine, kange muvulame kuba’mba Lesa wa lusa ne kuba’mba wimuletele mu kipwilo mambo wamwene’mba mwakonsha kumwingijila ne. (Tangai Salamo 103:8, 9.) Onkao mambo, umvwe mwatwajijila kumwingijila na muchima wenu yense, kechi ukemutaya ne.—1 Moba 28:9.

18. Twakonsha kwikela byepi mwayila lulombelo lwa kwa Yesu lwanembwa mu Yoano 17:15?

¹⁸ Byo alombelenga bufuku bwapeleleko na batumwa banji bakishinka 11, Yesu wibalombejileko na byambo byawama bya kuba’mba: “Mwibazhikijilenga na mambo a aye mubi.” (Yoa. 17:15) Yesu kechi wateletu muchima batumwa banji bonka ne, bino wata muchima ne bonse bamulondela lelo jino. Na mambo a kino, twafwainwa kuketekela’mba Yehoba ukakumbula lulombelo lwa Yesu lwa kwituzhikijila mu bino bimye byakatazha. ‘Yehoba ye jikebo ja boba benda bulongo mu jishinda ja kishinka . . . ukejilama jishinda ja bazhijikwa banji.’ (Mana 2:7, 8) Ibyo kuba’mba tupita mu makatazho pa kwenda mu jishinda ja bulumbuluke, pano bino, jo jonkatu jishinda ja ku bumi bwa myaka ne bwana bwa bene bwa kine. (Loma 8:21) Kange muleke muntu nangwa umo emujimbaike’mba mufume mu jino jishinda ne.

[Tubyambo twa mushi]

[Bipikichala pa peja 14]

Twakonsha kuyuka byepi bantu baji nobe Abisalomo ne kwibachinuzhuka?