Kange Mulefulwe Ne!
Nanchi mwaikala Bakamonyi ba kwa Yehoba pa myaka yavula kabiji mubena kukeba kuba’mba benakwenu batendeke kupopwela Yehoba pamo ne anweba nyi?
Nangwa abya mwalefulwapo kala na mambo a kuba ye mwafunjishanga Baibolo wamwekelenga nobe watemwa bukine, pano ko kyakayanga wikileka nyi?
Byashimikizha balongo ne banyenga bamo ba ku Britain bisakwimukwasha kubula kulefulwa. Kabiji musakumona byo mwafwainwa kuba pa kuba’mba mu kwibikako kwenu kukwasha boba bakyangye kutambwila bukine mufume bintu byawama.—Sapwi. 11:1.
MUKOYO WANEMA BINGI
Kintu kimo kyakonsha kwimukwasha ke mukoyo. Mwafwainwa kulamachila ku bukine ne kukakachila kwi Yehoba. (Mpitu. 10:20) Bino byo byaubile ba Georgina. Kimye kyo batendekele kufunda Baibolo na Bakamonyi ba kwa Yehoba mu 1970, bamwatawabo ba Kyriacos bazhingijile bingi. Bebakainyenga kufunda Baibolo kabiji kechi bakebanga Bakamonyi pa nzubo yabo ne, kabiji inge batana mabuku a Bakamonyi ba kwa Yehoba beatayanga.
Ba Georgina byo batendekele kutanwa ku kupwila, bamwatawabo bakijilemo kuzhingila. Juba jimo ba Kyriacos bayile ku Nzubo ya Bufumu na kubusha mapata. Ba Georgina byo bavulukile kuba’mba bamwatawabo bayuka Kingiliki kukila Kizungu, batumijile lamya mulongo Mungiliki wa mu kipwilo kikwabo kuba’mba eye na kwibakwasha. Byaambile uno mulongo na kifyele byafikile bingi pa muchima ba Kyriacos, kabiji byo papichile bañondo bacheche, batendekele ne kufunda Baibolo. Pano bino, kechi batwajijile kufunda ne.
Myaka isatu yalondejilepo, ba Georgina batwajijile kwibakatazha ku bamwatawabo. Ba Kyriacos baambijile bakazhi babo amba inge bakabatizhiwetu, bakebakana. Juba jo bayilenga ku lubatizhilo, ba Georgina balombele bingi kwi Yehoba kuba’mba bamwatawabo babule kwibakana. Bakamonyi byo baishile na kusenda ba Georgina kuba’mba baye ku kubuñana, ba Kyriacos baambile’mba: “Tangilaipo, tusakwiya na motoka wetu.” Ba Kyriacos batainweko ku kipungu kya lukelo ne kumonako bakazhi babo byo babatizhiwenga.
Ba Kyriacos byo bakepesheko kukatazha bakazhi, batendekele kupimpula bwikalo bwabo. Byo papichile myaka 40 kufuma po batainwe ku kupwila kwa Bakamonyi, ba Kyriacos babatizhiwe. Ki ka kibalengejile? Baambile’mba: “Kyansangajikile bingi pa kumona mukazhami byo afuukwilepo kutwajijila kupopwela Yehoba.” Ba Georgina baambile’mba: “Nangwa kya kuba bamwatawami bankanyanga, nafuukwilepo kuba’mba kechi nkaleka kupopwela Lesa wami ne. Kabiji natwajijile kulomba kwi Yehoba kabiji kechi nalefwilwe ne.”
BUNEME BWA KUVWALA BUMUNTU BUPYA
Kintu kikwabo kyakonsha kukwasha bena kwenu ke kwikala na byubilo bya bwina Kilishitu. Mutumwa Petelo watundaikile banabakazhi bena Kilishitu amba: “Anweba banabakazhi nekenenainga bamwatawenu kuba amba aba babula kukokela mambo a Lesa, be akokele kupichila mu kumona byubilo byenu byawama.” (1 Pe. 3:1, 2) Ba Christine balondejile luno lujimuno nangwa kya kuba papichile myaka yavula pa kuba’mba bamwatawabo bakokele mambo a Lesa. Myaka 20 kufuma po baikejile Bakamonyi, bamwatawabo ba John kechi baitabijile mwi Lesa ne. Kabiji kechi bakebanga bya bupopweshi ne, pano bino, bamwene kuba’mba bakazhi babo banemekele bingi bupopweshi bwabo bwa katataka. Baambile’mba: “Namwene kuba’mba bumuletela bingi lusekelo. Wakosele bingi kabiji wankwashishe bingi mu bimye bya makatazho.”
Ba Christine kechi bakanjikizhanga bamwatawabo kuya mu bupopweshi bwabo ne. Bamwatawabo baambile’mba: “Mukazhami wayukile kuba’mba kechi wafwainwa kwamba ne amiwa pa bupopweshi bwanji ne, kabiji watekenyetu ne kuleka amiwa mwine nafunda bukine.” Ba Christine inge bamona mitwe imo mu Kyamba kya Usopa ne Labainga! yo bamonanga kuba’mba bamwatawabo basakutemwa kwiitanga, nabiji yoya yaamba pa bya sayansi ne bilengwa na Lesa, bebapanga ne kwibambila’mba, “Naketekela musakutemwa kutanga ino mitwe.”
Juba jimo ba John byo bakotokele ku nkito batendekele kuwamisha pa nzubo. Mambo a kuba bajinga na kimye kyabaya kya kulanguluka pa mepuzho aamba pa bumi, batendekele kulanguluka’mba, ‘Nanchi twaishilekotu nyi, inyi paji kyo betulengejile?’ Juba jikwabo, mulongo wisambilenga nabo, wibepwizhe’mba, “Mwakonsha kutemwa kufunda Baibolo nyi?” Ba John baambile’mba: “Na mambo a kuba natendekele kuketekela mwi Lesa, naswile kufunda.”
Kyawama bingi mambo ba Christine kechi bekilekele ne. Papichile myaka 20 na kulomba kuba’mba bamwatawabo batambwile bukine, kyapeleleko babatizhiwe. Lelo jino babena kwingijila Yehoba pamo. Ba John baambile’mba: “Kuji bintu bibiji byandengejile kuba’mba nswe bukine, lusa ne butemwe bwa Bakamonyi. Kikwabo, inge wasongola Kamonyi wa kwa Yehoba, ko kuba’mba wasongola mwanamukazhi wakishinka, kabiji uji na butemwe bwa kine.” Kya kine, ba Christine balondejile jifunde jiji mu 1 Petelo 3:1, 2, kabiji mwafumine byawama.
NKUNWA IPANGA BIPANGWA PA KUPITAPO KIMYE
Pano nga bafunda Baibolo baleka kutako muchima, kiji byepi? Mfumu Solomone wanembele’mba: “Kusai nkunwa yenu lukelo, kabiji mabanga nao kechi muvunge kuboko kwenu ne. Mambo kechi mwayuka ikamena bulongo ne, kana iyi nyi, kana yoya, nangwa kana yonse ibiji ikawama pamo.” (Sapwi. 11:6) Bimye bimo pakonsha kupita myaka yavula pa kuba’mba nkunwa ya bukine imene. Nangwa byonkabyo, mu kuya kwa kimye muntu wakonsha kuyuka buneme bwa kufwenya kwipi ne Lesa. (Yako. 4:8) Juba jimo mukakumya bingi.
Akilangulukai pe ba Alice bavilukijile ku England kufuma ku India. Batendekele kufunda Baibolo mu 1974. Baambanga mulaka wa Kihindi, pano bakebelenga kuyukisha Kizungu. Batwajijile kufunda kabiji batendekele ne kutanwa ku kipwilo kya Kizungu. Bayukile kuba’mba babena kufunda bukine, pano bino kechi bebunemekele ne. Kabiji batele muchima pa kukeba mali ne kuya ku bijiilo. Kyapeleleko, ba Alice balekele kufunda Baibolo.
Pa kupitapo myaka nobe 30 ba Alice batumijile nkalata ba Stella bebafunjishanga Baibolo. Mu nkalata baambile’mba: “Naketekela musakumvwa bingi bulongo pa kuyuka kuba’mba muntu ye mwafunjishanga Baibolo mu 1974, wabatizhiwe pa kushonkena kwa nkambi kwajingako katataka. Mwaingijile mwingilo wanema bingi mu bwikalo bwami. Mwabyajile nkunwa ya bukine mwi amiwa, nangwa kya kuba kechi nakebelenga kwipana kwi Lesa ne, bino nalamine ino nkunwa mu milanguluko ne mu muchima wami.”
Ki ka kyamwekele? Ba Alice balumbulwile’mba bajinga bingi na binyenge kimye kyafwile bamwatawabo mu 1997. Balombele kwi Lesa. Byo papichiletu kakimye kacheche, Bakamonyi babiji bamba mulaka wa Kipunjabi baishile pa nzubo yabo ne kwibashila talakiti wa kuba’mba, Ñanyi Luketekelo Lotuji Nalo ku Batemwe Betu Bafwa? Ba Alice bamwene kuba’mba milombelo yabo yakumbulwa kabiji bafuukwilepo kuba’mba bafwainwa kupwanañananga na Bakamonyi ba kwa Yehoba. Pano bafwainwe kwibatana kwepi? Bataine buku ye bebapele kwi ba Stella mwanembelwe keyala wa kipwilo kya Kipunjabi. Ba Alice bayile ku Nzubo ya Bufumu kabiji bebatambwijile bingi bulongo ku balongo ne banyenga. Ba Alice baambile’mba: “Nataine butemwe bo nashile, kabiji bankwashishe kukepeshako binyenge.”
Batendekele kutanwa ku kipwilo kimye kyonse kabiji batendekele kufunda jikwabo Baibolo, kufunda kwamba ne kunemba mulaka wa Kipunjabi. Ba Alice babatizhiwe mu 2003. Byambo byapeleleko mu nkalata yo banembejile ba Stella, byajinga bya kuba’mba: “Nasanta bingi pa kubyala ino nkunwa mwi amiwa, papita ne myaka 29, kabiji mwankwashishe kulondela byubilo byenu.”
Ki ka kyo mwafwainwa kufunjilako ku bino byamwekele? Pakonsha kupitapo kimye pa kuba’mba nkunwa ya bukine ikome. Pano bino, muntu wipelula uji na muchima wakishinka kabiji wa kukeba kuyuka Lesa, Yehoba ukamukwasha kumvwisha bukine ne kwibutambwila. Akivulukai byambo biji mu kishimpi kya kwa Yesu kya kuba’mba: “Nkunwa imena ne kukoma, bino [ukusa nkunwa] kechi uyuka byo ikoma ne. Mushiji mwine ye umenesha bijimwa pachepache, patanshi lubūla, kufuma lubūla ke mutuntu ne kipelako ke mutwe wa kajo kene.” (Mako 4:27, 28) Kuno kukoma kwiya pachepache kabiji “mushiji mwine ye umenesha.” Kine basapwishi ba Bufumu bonse kechi bayuka byo kikala ne. Onkao mambo, twajijilai kukusa byavula pakuba’mba mukanowe byavula.
Kabiji kange muvulame buneme bwa lulombelo ne. Ba Georgina ne ba Christine batwajijile kulomba kwi Yehoba. “Kelwainga mu lulombelo” kabiji kange mulefulwe “pa kupita moba avula” ne, mu kwingila na ngovu mukafuma bintu byawama.—Loma 12:12; Sapwi. 11:1.
[Kipikichala pa peja 30]
[Kipikichala pa peja 30]
[Kipikichala pa peja 30]
[Kipikichala pa peja 30]
Byo papichile myaka 40 kufuma po batainwe ku kupwila kwa Bakamonyi ba kwa Yehoba, ba Kyriacos babatizhiwe
[Kipikichala pa peja 30]
Ba Alice batumijile nkalata ba Stella. Mu nkalata baambile’mba: “Naketekela musakumvwa bingi bulongo pa kuyuka kuba’mba muntu ye mwafunjishanga Baibolo mu 1974, wabatizhiwe pa kushonkena kwa nkambi kwajingako katataka”
[Mabulañano pa peja 32]
“Nasanta bingi pa kubyala ino nkunwa mwi amiwa, papita ne myaka 29, kabiji mwankwashishe kulondela byubilo byenu.”—Alice