“Kukoka” Ne
“Kechi twikileke kuba kyawama ne.”—NGA. 6:9.
MUSAKUKUMBULA’MBA KA?
Ñanyi bintu byakonsha kwitukwasha kutwajijila kutemwa bukine?
Kuta muchima pa kupopwela Yehoba kwitutundaika kuba ka?
Twafwainwa kuba byepi inge tukeba kuchinchika ne kutwajijila kwikala na kizaku mu mwingilo wa Lesa?
1, 2. Kulanguluka pa bimwesho bya jibumba ja bilengwa byonse ja Yehoba kukosesha byepi luketekelo lwetu?
KULANGULUKA kuba’mba tuji mu jibumba jikatampe ja bilengwa byonse kwitukumisha bingi. Bimwesho byanembwa mu buku wa Ezikyo kitango 1 ne Danyela kitango 7 byalumbulula bingi bulongo Yehoba byo abena kuba pa kufikizha kyaswa muchima wanji. Yesu ubena kutangijila jibumba ja Yehoba ja pano pa ntanda. Ubena kutangijila mwingilo wa kusapwila mambo awama, kufunjisha ne kutundaika boba bengila uno mwingilo, ne kutundaika mpompwelo ya kine ya kwa Yehoba. Kino kitulengela kuketekela mu jibumba ja Yehoba!—Mat. 24:45.
2 Nanchi tubena kwendela pamo na jino jibumba nyi? Nanchi kizaku kyetu kibena kubayilako nyi, inyi kibena kukepelako? Kimye kyo tubena kulanguluka pa ano mepuzho twakonsha kumona’mba twatendeka kukoka nangwa kampe kizaku kyetu kyatendeka kukepa. Kino kyakonsha kumweka. Mu myaka yajingako bena Kilishitu batanshi, mutumwa Paulo watundaikile bena Kilishitu bakwabo kwikala na kizaku kyajingapo ne Yesu. Paulo waambile’mba kuba bino kukebakwasha kubula ‘kukoka ne kulefulwa.’ (Hebe. 12:3) Kyo kimotu ne atweba, kulanguluka pa mutwe wafumako walumbulwile bibena kuba jibumba ja Yehoba, kwakonsha kwitukwasha kutwajijila kubambakana ne kuchinchika.
3. Twafwainwa kuba byepi pa kuba’mba tubule kukoka, kabiji tusa kwisamba pa ka?
3 Bino Paulo waambile ne pa bintu bikwabo byo twafwainwa kuba pa kuba’mba tubule kukoka. Waambile’mba twafwainwa kutwajijila “kuba kyawama.” (Nga. 6:9) Onkao mambo, twafwainwa kwibikako. Pano twayai twisambe pa bintu bitanu byakonsha kwitukwasha kutwajijila kwikala bashikimana ne kwendela pamo na jibumba ja Yehoba. Twafwainwa kwipesa pesa atweba bene nangwa kisemi kyetu ne kumona mbaji yo twafwainwa kwingijilapo.
PWILAINGA PAMO NA KWIKOSESHA NE KUPOPWELA LESA
4. Mambo ka o twafwainwa kwambila’mba kupwila ke kintu kyanema mu bupopweshi bwa kine?
4 Kupwila pamo ke kintu kyanema bingi ku bakalume ba Yehoba. Mu lubaji lwa jibumba janji lubula kumweka, bilengwa bya mupashi bipwila ku meso a Yehoba pa bimye byatongolwa. (1 Mfu. 22:19; Yoba 1:6; 2:1; Da. 7:10) Mu kimye kya bena Isalela, mukoka wafwainwe kukonkananga pamo kuba’mba ‘bomvwenga ne kufunda ne kuteshakotu michima yabo.’ (Mpitu. 31:10-12) Bayudea bajingako mu myaka kitoka kitanshi bayanga ku mashinagoga na kutanga Binembelo. (Luka 4:16; Byu. 15:21) Kunemeka kupwila kwatwajijile ne kimye kyalengelwe kipwilo kya bena Kilishitu, kabiji ne luno ke kintu kyanema mu mpompwelo yetu. Bena Kilishitu ba kine ‘beta muchima bene na bene kuba’mba betundaikenga kumwesha butemwe ne kuba mingilo yawama.’ Twafwainwa kutwajijila na “kwitundaika atwe bene na bene ne kwibikishakotu byo tubena kumona aja juba [ja Yehoba] saka jifwenya pepi.”—Hebe. 10:24, 25.
5. Twakonsha kwitundaika byepi kimye kya kupwila?
5 Jishinda jikwabo janema ja kwitundaikilamo ke kukumbulapo kimye kya kupwila. Tumwesha patoka lwitabilo lwetu kupichila mu kukumbula mukumbu wanembwa, kulumbulula byo twakonsha kwingijisha kinembelo, kushimikizhako pacheche kyamwekele kibena kumwesha buneme bwa kulondela mafunde a mu Baibolo nangwa kukumbulapotu mu jishinda jikwabo. (Sala. 22:22; 40:9) Ne anweba mwafwainwa musa kuswa kuba’mba nangwa kya kuba twapwila pa myaka yavula, tutundaikwa bingi na mikumbu ifuma panshi ya muchima ikumbula balongo ne banyenga, banyike ne bakulumpe.
6. Mu ñanyi mashinda kupwila mo kwitukwashisha kwikala babambakana mu kwingijila Lesa?
6 Ñanyi bishinka bikwabo byalengela Lesa kunemeka kupwila kwetu? Kupwila kwa kipwilo, kubuñana ne kushonkena kwitulengela kusapwila na kuchinchika nangwa kya kuba mu nyaunda yetu muji bantu betukankanya nangwa babula kukeba kuteleka ku mambo awama. (Byu. 4:23, 31) Majashi ne mbaji ikwabo ya kupwila yaimena pa Baibolo itutundaika bingi ne kwitukosesha. (Byu. 15:32; Loma 1:11, 12) Bintu byo tufunda ne kwikosesha atweba bene na bene pa kupwila bitulengela kwikala na lusekelo lwa kine ne ‘kukokoloka mu moba a bya malwa.’ (Sala. 94:12, 13) Kavoto ka Lufunjisho ka mu Jibumba Jitangijila ko katangijila mwingilo wa kunengezha bifunda bantu ba Yehoba pa kupwila mwaya ntanda yonse. Tusanta bingi pa byo tufunda pa kupwila mu milungu yonse pa mwaka pa mwaka.
7, 8. (a) Ñanyi kintu kyakilamo kunema kyo tuyila na kupwila? (b) Kupwila kwimukwasha byepi?
7 Nangwa byonkabyo, kechi tuyatu na kupwila kuba’mba tumwenemo ne. Ene mambo o tuyila na kupwila ke kupopwela Yehoba. (Tangai Salamo 95:6.) Ke jishuko jikatampe bingi ja kutota Lesa wetu. (Kolo. 3:16) Yehoba ukeba’mba tumupopwelenga kimye kyonse. Tutota Yehoba kimye kyonse kupichila mu kutanwa ku kupwila ne kukumbulapo. (Lum. 4:11) O ene mambo o twatundaikilwa ‘kubula kuleka kupwila pamo byonka byuba bantu bamo’!—Hebe. 10:25.
8 Nanchi tumona kupwila kwetu kwa bwina Kilishitu amba lunengezho lwa kwa Yehoba lwa kwitukwasha kuchinchika mu ano moba atama nyi? Inge byo byo twikumona, ko kuba’mba kupwila kukekala pa “bintu byanemesha” nangwa kya kuba tuji na bya kuba byavula. (Fili. 1:10) Twafwainwa kutanwanga ku kupwila kimye kyonse ne kukwatankana na balongo ne banyenga mu kupopwela Yehoba, kanatu kyakatazha.
KEBAIMO BANTU BAKISHINKA
9. Twayuka byepi kuba’mba mwingilo wa kusapwila wanema bingi?
9 Kwingilako pakatampe mu mwingilo wa kusapwila kuketukwasha kwendela pamo na jibumba ja Yehoba. Yesu ye watendekele uno mwingilo kimye kyo ajinga pano pa ntanda. (Mat. 28:19, 20) Kufumatu kyo kya kimye, mwingilo wa kusapwila Bufumu ne kufunjisha bantu kwikala baana ba bwanga ye mwingilo wanemeka bingi jibumba ja Yehoba jonse. Bintu byavula bimweka mu ano moba bimweshatu patoka kuba’mba bamalaika batundaika uno mwingilo ne kwitutangijila ku bantu baji “na michima ya bukishinka ya kukeba bumi bwa myaka.” (Byu. 13:48; Lum. 14:6, 7) Lubaji lwa pano pa ntanda lwa jibumba ja Yehoba lwaikelako kutundaika uno mwingilo wakilamo kunema. Nanchi ne anweba mwanemeka uno mwingilo mu bwikalo bwenu nyi?
10. (a) Ambai kya kumwenako kyamwesha byo twakonsha kutwajijila kutemwa bukine. (b) Kusapwila kwimulengela byepi kubula kukoka?
10 Kwingila mwingilo wa kusapwila na mukoyo kuketulengela kutwajijila kutemwa bukine. Akilangulukai pa byaambile mulongo Mitchel, mukulumpe mu kipwilo wabanda kabiji painiya wa kimye kyonse. Waambile’mba: “Natemwa bingi kubulako bantu bukine. Ndanguluka pa mutwe uji mu Kyamba kya Usopa nangwa mu Labainga! kabiji ntemwa bingi pa kumona maana ajimo ne buwame bwa magazini yense. Nkeba kuya mu mwingilo na kumona bantu byo basa kuba ne byo nakonsha kwibalengela kutako muchima. Mwingilo wa kusapwila wandengela kushikimana. Mmona kuba’mba kafwako bintu byo nguba pa kimye kyo natanchika kya kuya mu mwingilo ne.” Ne atweba umvwe twapayankana mu mwingilo wetu wazhila uketukwasha kutwajijila kwikala bashikimana mu ano moba apelako.—Tangai 1 Kolinda 15:58.
MWENAINGAMO MU BINTU BYANENGEZHA LESA
11. Mambo ka o twafwainwa kutangilanga mabuku etu ne kulanguluka langulukapo?
11 Yehoba witukosesha kupichila mu mabuku avula o tutambula. Kampe muvulukapo kimye kimo kyo mwatangile buku ne kwamba’mba: ‘Byo byo nabakebelenga bye! Kijitu nobe Yehoba wanembejiletu amiwa.’ Kino kechi jishukotu ne. Ano o mashinda Yehoba mo etufunjishisha ne kwitutangijila. Waambile’mba: “Amiwa nkakubula ne kukufunjisha jishinda jo ukayamo.” (Sala. 32:8) Nanchi mwibikako kutanga mabuku onse o tutambula ne kulanguluka langulukapo nyi? Kuba bino kuketukwasha kutwajijila kuchinchika ne kwingila mwingilo wa Lesa na kizaku mu ano moba apelako.—Tangai Salamo 1:1-3; 35:28; 119:97.
12. Ki ka kyakonsha kwitukwasha kunemeka mabuku etu?
12 Kyanema bingi kulanguluka pa mingilo yavwangwamo pa kuba’mba ano mabuku anembwe. Kavoto ka Kunemba ka mu Jibumba Jitangijila katangijila mwingilo wa kupesa pesa, kunemba, kutangamo, kubikamo bipikichala ne kutuntulula mabuku onse apulintwa ne o babika pa intaneti. Misampi paji minkinyi ipulinta mabuku itwala ano mabuku ku bipwilo biji pepi ne biji kwalepa. Mambo ka o bengijila ino mingilo yonse? Bengila ino mingilo pa kuba’mba bantu ba Yehoba batambulenga mikambizho ne mafunjisho a kwibakwasha kutwajijila kwikala bakishinka. (Isa. 65:13) Twayai atweba bonse tutwajijile kumwenamo mu mabuku afuma ku jibumba ja Yehoba.—Sala. 119:27.
TUNDAIKAINGA JIBUMBA JA YEHOBA
13, 14. Bañanyi babena kutundaika jibumba ja Yehoba mwiulu, kabiji twakonsha kwijitundaika byepi pano pa ntanda?
13 Mu kimwesho kyo bamumwesheshe, mutumwa Yoano wamwene Yesu saka aikala pa mbili utoka saka abena kuya na kushinda basatukila Yehoba. (Lum. 19:11-15) Kuyuka kuba’mba Yesu babena kumulondela panyuma ku bamalaika bakishinka kabiji uji na bashingwa bafuma pano pa ntanda batambula kala mfweto yabo mwiulu, kukosesha bingi lwitabilo. (Lum. 2:26, 27) Ku bano tufunjilako byo twafwainwa kutundaikanga boba batangijila mu jibumba ja Yehoba!
14 Ne ba mu jibumba jikatampe nabo batundaika mwingilo wa balongo ba kwa Kilishitu bakiji pano pa ntanda babena kutangijila jibumba ja Lesa lelo jino. (Tangai Zekaliya 8:23.) Atweba bonse pa muntu pa muntu, twakonsha kumwesha byepi kuba’mba tutundaika jibumba ja Yehoba? Jishinda jimo ja kubilamo bino ke kunekenena batangijila. (Hebe. 13:7, 17) Kuba bino kutatwila mu kipwilo monka mo tuji. Nanchi byo twamba pa bakulumpe mu kipwilo bimwesha amba twibanemeka ne kunemeka mingilo yo bengila nyi? Nanchi tutundaika baana betu kunemeka bano banabalume bakishinka ne kumvwina byo bebafundako kufuma mu Binembelo nyi? Abya twisambapo na kisemi pa byo twakonsha kwingijisha mali etu kutundaikilamo mwingilo wa ntanda yonse kupichila mu kupanako bupe nyi? (Mana 3:9; 1 Ko. 16:2; 2 Ko. 8:12) Nanchi twanemeka mingilo ya kuwamisha Nzubo ya Bufumu nyi? Inge ketube bino, Yehoba uketupa mupashi wanji wazhila. Uno mupashi ukatwajijila kwitupa bulume bwa kuchinchika mu ano moba apelako.—Isa. 40:29-31.
IKALAINGA BWIKALO BUTOKESHA LESA KU MUCHIMA
15. Mambo ka o twafwainwa kwibikilako kwikala bwikalo butokesha Yehoba ku muchima?
15 Kyapelako, pa kuba’mba tuchinchike ne kutwajijila kwendela pamo na jibumba ja Yehoba twafwainwa ‘kuyuka kimutokesha Nkambo ku muchima.’ (Efi. 5:10, 11) Na mambo a mubiji wetu wa bundengamambo ne bibena kuba Satana ne ntanda yanji yatama, kitukatazha bingi kuba byaoloka. Balongo ne banyenga yetu bamo bebikako bingi pa juba pa juba pa kuba’mba batwajijile kwikala na bulunda bwawama ne Yehoba. Kuba bino, kumusangajika bingi. Kange mukoke ne. Kwikala bwikalo butokesha Yehoba ku muchima kuketulengela kwikala bwikalo bwa lusekelo ne mpopwelo yetu iketabilwa kwi aye.—1 Ko. 9:24-27.
16, 17. (a) Twafwainwa kuba byepi inge twalenga mambo akatampe? (b) Twakonsha kufunjilako ka ku byaubile Anne?
16 Twafwainwa kuba byepi inge twalenga mambo akatampe? Twafwainwa kukeba bukwasho ponkapotu kwa kubula kutaya kimye ne. Kufya mambo kulengelatu bintu kuya munsunya. Vulukai kuba’mba, Davida waambile’mba, inge wazhindamapo kwa kubula kusolola mambo anji, ‘bikupa byanji byayilenga na kukota na mambo a kubinza kwanji juba jonse.’ (Sala. 32:3) Kya kine, kufya mambo akatampe kuketulengelatu kukoka kabiji kechi tukekala na lusekelo ne, pakuba awa usolola mambo anji, “ukamona lusa.”—Mana 28:13.
17 Akilangulukai pa byaubile Anne.a Saka akijitu mwanyike, uno nsongwakazhi watendekele kwingila bupainiya bwa kimye kyonse. Pano bino, watendekele kuba bintu byatama. Kino kyamulengejile kwikala na jiwi ja mu muchima jazhatwa. Waambile’mba: “Jiwi jami ja mu muchima janzhachishenga bingi. Kechi najinga na lusekelo ne, kabiji moba onse naikalanga wapopomenwa.” Pano waubile byepi? Waambile’mba juba jimo kimye kya kupwila balumbulwile kinembelo kya Yakoba 5:14, 15. Anne wayukile kuba’mba ubena kukebwa kumukwasha kabiji wayile ku bakulumpe mu kipwilo kuba’mba bamukwashe. Uvuluka’mba: “Abya Binembelo bijitu nobe muchi Yehoba ye apana wa kubuka bantu pa kuba’mba bekale na bulunda bwawama ne aye. Uno muchi wakatazha kumutoma, pano bino, ubukañana. Naumvwijile bukwasho bwa mu binembelo, kabiji bwankwashishe bingi.” Pa kupita myaka, Anne pano watendeka kwingijila Yehoba jikwabo na kizaku ne na jiwi ja mu muchima jawama.
18. Twafwainwa kutwajijila kuba ka?
18 Ke kintu kyanema bingi kwikala mu jibumba ja Yehoba mu ano moba apelako. Onkao mambo, kechi twafwainwa kukwata nzenzekela bintu byo tuji nabyo ne. Twafwainwa kwibikako pamo na bisemi byetu kutanwanga ku kipwilo kimye kyonse, kusapwila na mukoyo mu nyaunda yetu ne kutanga mabuku o tutambula. Kabiji twafwainwa kutundaikanga batangijila ne kwikala bwikalo butokesha Lesa ku muchima. Inge ke tube bino, tukatwajijila kwendela pamo na jibumba ja Yehoba kabiji kechi tukakoka ne.
[Tubyambo twa mushi]
a Jizhina japimpulwa
[Kitenguluzha pa peja 29]
MU LUBAJI LWA PANO PA NTANDA LWA JIBUMBA JA YEHOBA MUJI:
1. Jibumba Jitangijila
2. Tuvoto twa Misampi
3. Bakalama benda
4. Mabumba a bakulumpe mu bipwilo
5. Bipwilo
6. Basapwishi
[Kipikichala pa peja 31]
Kwashainga bakwenu kuyuka kuba’mba nabo bakonsha kwikala mu jibumba ja Yehoba