Kupwila ‘Kwitutundaika Kwitemwa ne Kuba Mingilo Yawama’

MYAKA yavula yapitapo, bantu ba Yehoba bapwila pamo mu jishinda jo banengezha bulongo. Mu moba a bena Isalela ba kala, banabalume bonse bayanga ku Yelusalema ku bijiilo bisatu bikatampe. (Mpitu. 16:16) Mu myaka kitota kitanshi, bena Kilishitu bapwilanga pamo kimye kyonse, javula mu nzubo ya muntu. (File. 1, 2) Lelo jino, twiyowa kupwila, kubuñana ne kushonkena. Mambo ka bakalume ba Lesa o bapwijila pamo? Ke na mambo a kuba’mba luno ke lubaji lwanema lwa mpopwelo yetu.—Sala. 95:6; Kolo. 3:16.

² Kabiji kupwila kulengela aba batanwako kumwenamo. Pa mambo a Kijiilo kya Mimba kya butanu na bubiji, bena Isalela bebabuujile’mba: “Mukakonkanye bantu pamo, banabalume, banabakazhi, baana ne bantu bafuma ku kyalo kingi bekala mu mizhi yenu, kuba’mba bakomvwe ne kufunda ne kwakamwa Yehoba Lesa wenu ne kuteshako muchima kulondela byambo byonse bya mu ino Mizhilo.” (Mpitu. 31:12) Kwambatu kine, ene mambo o tupwijila pamo ke ‘kwitufunjisha kwi Yehoba.’ (Isa. 54:13) Kabiji kupwila kwitulengela kwiyuka atwe bene na bene, kwitundaika ne kwikosesha kupichila mu kupwanañena pamo.

KUPWILA

³ Baana ba bwanga bakonkene pamo panyuma ya Pentekosita mu 33 C.E. bebafunjishenga ku batumwa, kabiji “pa juba pa juba bakonkenanga pamo mu nzubo ya Lesa na mulanguluko umo.” (Byu. 2:42, 46) Mu kuya kwa moba, bena Kilishitu byo bapwilanga pamo na kupopwela, batanganga binembelo byanembelwe na lutangijilo lwa mupashi wazhila kuvwangakotu ne makalata anembele batumwa ne baana ba bwanga bakwabo. (1 Ko. 1:1, 2; Kolo. 4:16; 1 Tesa. 1:1; Yako. 1:1) Kabiji kipwilo kyalombelanga pamo. (Byu. 4:24-29; 20:36) Bimye bimo, bashimikizhangapo ne byamwekanga mu mwingilo wa bumishonale. (Byu. 11:5-18; 14:27, 28) Bafunjilenga pa bintu bya mu Baibolo byo baitabilamo ne pa kufika kwa bungauzhi bwanembelwe na lutangijilo lwa mupashi wazhila. Bebafunjishenga mikambizho yaamba pa kwikala na byubilo byawama bya bena Kilishitu ne pa munema wa kunemeka Lesa. Bonse bebatundaikile kwikala na mukoyo wa kusapwila mambo awama.—Loma 10:9, 10; 1 Ko. 11:23-26; 15:58; Efi. 5:1-33.

⁴ Mu ano moba etu, kupwila kwa bena Kilishitu kubiwa byonka byo kwaubiwanga mu moba a batumwa. Tumvwina mukambizho wanembelwe na lutangijilo lwa mupashi wazhila uji pa Bahebelu 10:24, 25 wa kuba’mba: “Twayai twitenga muchima atwe bene na bene . . . , kange tuleke kupwila pamo byonka byuba bantu bamo ne, bino twitundaikenga atwe bene na bene, ne kwibikishakotu byo mubena kumona aja juba saka jifwenya pepi.” Mu ano moba a kupelako akatazha, tukebewa lutundaiko lwiya na mambo a kupwila pamo kimye kyonse pa kuba’mba lwitabilo lwetu lukose ne kulama bulumbuluke bwetu bwa bena Kilishitu. (Loma 1:11, 12) Byo tuji bena Kilishitu, tubena kwikala mukachi ka kisemi kyatama kabiji kyaluwankana. Twakana byubilo bya bumbulwa kwakamwa Lesa ne bya kusakasaka bya pano pa ntanda. (Fili. 2:15, 16; Titu. 2:12-14) Kwepi ko twakonsha kuya kukila kupwanañena pamo na bantu ba Yehoba? (Sala. 84:10) Ñanyi kintu kyawama kukila kufunda ne kwisamba Mambo a Lesa? Twayai twisambe pa kupwila kwapusana pusana ko betunengezhezha.

KUPWILA KWA KU MPELO YA MULUNGU

⁵ Lubaji lutanshi lwa kuno kupwila ke jashi ja mvula bantu jo banengezhezha bantu bavula, bamo kyakonsha kwikala kimye kitanshi kutanwa ku kupwila. Jashi ja mvula bantu janema bingi mambo jikwasha ba katataka ne basapwishi mu kipwilo kwikala na bulunda bwawama ne Lesa.—Byu. 18:4; 19:9, 10.

⁶ Kilishitu Yesu, batumwa banji, ne balunda nabo bapwilanga kupwila kwa mvula bantu nabiji kubiwapo mu bipwilo bya bantu ba Yehoba lelo jino. Kwa kubula nangwa kuzhinaukatu ne, Yesu wajinga ñambi wayile nkuwa pano pa ntanda. Kyaambiwe pe aye amba: “Kafwako muntu nangwa umo wakyambapo kala byamba uno muntu ne.” (Yoa. 7:46) Yesu waambilenga na luusa, ne kulengela jibumba kukumya bingi. (Mat. 7:28, 29) Aba batambwijile byambo byanji bamwenejilemo byawama. (Mat. 13:16, 17) Batumwa balondejile byo aubanga. Pa Byubilo 2:14-36, tutangapo jashi ja lutundaiko jaambile Petelo pa juba ja Pentekosita mu 33 C.E. Bantu bavula bebatundaikile kulondela bino byambo byo baumvwine. Kabiji palutwe kacheche, bantu baitabijile byo baumvwine jashi jaambile Paulo mu Atene.—Byu. 17:22-34.

⁷ Ne mu ano moba etu a lelo, bantu bavula bamwenamo byawama mu majashi a mvula bantu ekalako mu bipwilo mulungu ne mulungu, ne mu majashi a mvula bantu ambiwa pa kubuñana ne pa kushonkena. Majashi a uno mutundu etukwasha kutwajijila kuyuka mafunjisho a bena Kilishitu ne kwikala bashikimana mu mwingilo wa Bufumu. Umvwe ke twiteko bantu baji na lusekelo lwa kukeba kufunda bukine ne bantutu bakwabo, tukakwasha bantu kuyuka mafunjisho atanshi a mu Baibolo.

⁸ Mitwe yo bambapo mu majashi a mvula bantu yapusana pusana. Ano majashi amba pa bintu bya mu Baibolo byo twaitabilamo ne pa bungauzhi, pa mafunde a mu Binembelo, pa kisemi, pa masongola, pa banyike, ne pa byubilo bya bena Kilishitu. Majashi amo amba pa mingilo ya Yehoba ya kukumya ya bilengwa. Majashi akwabo amba pa bantu bapusana pusana bo baambapo mu Baibolo bajinga na lwitabilo, bachinchikile kabiji bajinga ba kishinka ne byo twakonsha kufunjilako lelo jino.

⁹ Umvwe tukeba kumwenamo pakatampe mu majashi a mvula bantu, kyanema bingi kutelekesha, kuzhikula binembelo bibena kutongola ñambi, ne kulondelamo inge ubena kutanga ne kulumbulula. (Luka 8:18) Inge twashiinwa’mba byambo byo babena kwamba bya kine, tukakebesha kukakachila ku bintu byo tubena kufunda ne kwibingijishanga.—1 Tesa. 5:21.

¹⁰ Umvwe kipwilo kiji na bañambi bavula, kwa kubula nangwa kuzhinaukatu ne, mulungu ne mulungu kwikala jashi ja mvula bantu. Javula betako ne bañambi kufuma ku bipwilo bya kipikipi. Inge kya kuba pa kipwilo paji bañambi bacheche, ano majashi afwainwa kwikalako inge kyakonsheka.

¹¹ Lubaji lwa bubiji lwa kupwila kwa ku mpelo ya mulungu ke Lufunjisho lwa Kyamba kya Usopa. Uno ke mwisambo wa mepuzho ne mikumbu wa kwisamba pa mitwe yanembwa mu Kyamba kya Usopa kya kufundamo. Yehoba wingijisha Kyamba kya Usopa kwitunengezhezha kajo ka ku mupashi pa kimye kyafwainwa.

¹² Mitwe ya kufundamo javula yamba pa bya kwingijisha mafunde a mu Baibolo mu bwikalo bwa pa juba pa juba. Ino mitwe ikwasha bena Kilishitu kukaana “mupashi wa pano pa ntanda” ne byubilo byatama. (1 Ko. 2:12) Lufunjisho lwa Kyamba kya Usopa lusamisha kyeya pa mafunjisho a mu Baibolo ne pa bungauzhi, ne kukwasha bonse kumvwisha bukine ne kutwajijila kwenda mu jishinda ja baoloka. (Sala. 97:11; Maana 4:18) Kutanwa ku Lufunjisho lwa Kyamba kya Usopa ne kukumbulapo kwakonsha kwitukwasha kusekela mu luketekelo lwa kwikala mu ntanda ipya muji bololoke bwa Yehoba. (Loma 12:12; 2 Pe. 3:13) Kupwanañena pamo na bena Kilishitu bakwetu kwitukwasha kwikala na bipangwa bya mupashi ne kwitutundaika kwingijila Yehoba na mukoyo. (Nga. 5:22, 23) Kabiji kwitukwasha ne kuchinchika meseko ne kushimika “kitendekesho kyawama kya kulutwe” pa kuba’mba ‘tukwachishe ku bumi bwa kine kine.’—1 Timo. 6:19; 1 Pe. 1:6, 7.

¹³ Twakonsha kuba byepi pa kuba’mba tumwenengamo mu kano kajo ka ku mupashi ko betunengezhezha? Twafwainwa kunengezhezhanga jimo lufunjisho pamo na kisemi nangwa bunke bwetu, kutanga binembelo bijimo, ne kukumbulapo mu byambo byetu. Kuba bino kukalengela bukine kutwela mu muchima wetu, kabiji bakwetu nabo bakamwenamo bingi pa kumvwa mikumbu yetu imwesha lwitabilo lwetu. Umvwe ketutelekeshe ku mikumbu ya bakwetu, kiketulengela kumwenamo mu lufunjisho mulungu ne mulungu.

KUPWILA KWA MUKACHI KA MULUNGU

¹⁴ Mulungu ne mulungu, kipwilo kikala na kupwila kwa Bwikalo ne Mwingilo Wetu wa Bwina Kilishitu pa Nzubo ya Bufumu. Kuno kupwila kuji na mbaji isatu yo banengezha kwitukwasha “kufikilamo bulongo” byo tuji ba mingilo ba Lesa. (2 Ko. 3:5, 6) Bintu byo tufunda pa kupwila kwa mukachi ka mulungu bikala mu Mutanchi wa Kupwila kwa Bwikalo ne Mwingilo Wetu wa Bwina Kilishitu wa pa ñondo pa ñondo. Mu Mutanchi wa Kupwila kwa Bwikalo ne Mwingilo muji ne mashinda amwesha bya kwisamba na bantu mu mwingilo.

¹⁵ Lubaji lutanshi lwa kuno kupwila lutelwa’mba Bya Buneme Biji mu Mambo a Lesa, lwitukwasha kuyuka byo kyajinga ne mwatala mashimikila a mu Baibolo ne kufunda bya kwiengijisha mu bwikalo bwetu. Mu kuno kupwila mwikala jashi, kutanga Baibolo ne kwisamba pa binembelo bya kutanga Baibolo mu yewo mulungu. Mu Mutanchi wa Kupwila kwa Bwikalo ne Mwingilo muji bipikichala ne pa kunemba bishinka. Jino jishinda mwa kufunjila Baibolo jitukwasha mu bwikalo ne pa kufunjisha, pa kuba’mba ‘twikale bafikilamo, benengezha bulongo kwingila mingilo yonse yawama.’—2 Timo. 3:16, 17.

¹⁶ Lubaji lwa bubiji lwa kuno kupwila lwa kuba’mba, Taiko Muchima ku Mwingilo wa Kusapwila belunengezha kwitufunjisha bya kwingila mwingilo wa kusapwila ne kuwamishako busendwe bwetu bwa kufunjisha bantu. Kununga pa majashi a baana ba sukulu, tutamba mavidyo amwesha bya kuba pa kwisamba na bantu. Luno lubaji lwa kupwila lwitukwasha kwikala na “lujimi wa boba bo bafunjisha” pa kuba’mba tuyuke “byambo byawama bya kwamba ku bantu bakooka.”—Isa. 50:4.

¹⁷ Lubaji lwa bubiji lwa kuba’mba, Byafwainwa Kwikala Bena Kilishitu lwamba pa bya kwingijisha mafunde a mu Baibolo mu bwikalo bwa pa juba pa juba. (Sala. 119:105) Kipungu kikatampe kiji mu luno lubaji ke Lufunjisho lwa Baibolo lwa Kipwilo. Byonka bikala Lufunjisho lwa Kyamba kya Usopa, Lufunjisho lwa Baibolo lwa Kipwilo ke mwisambo wa mepuzho ne mikumbu.

¹⁸ Pa ñondo pa ñondo, inge twatambula Mutanchi wa Kupwila kwa Bwikalo ne Mwingilo, ukwatankanya mingilo ya jibumba ja bakulumpe nangwa mukulumpe mukwabo umukwashako, ukapitulukamo ne kunengezha mutanchi. Mulungu ne mulungu, mukulumpe wayuka kufunjisha ye baswisha ku jibumba ja bakulumpe ye ukekala wakumupando pa kupwila. Mingilo yanji yavwangamo kumona’mba kupwila kwatendeka ne kupwa na kimye. Kabiji usanchila ne kufundako bonse baji na majashi a baana ba sukulu.

¹⁹ Byo tunengezha jonse kutanwa ne kukumbulapo pa kupwila kwa Bwikalo ne Mwingilo, kwitukwasha kuyuka Binembelo, kukwatakanya mafunde a mu Baibolo, kusapwila mambo awama kwa kubula kukankazhama ne kuyuka bya kukwasha bantu kwikala baana ba bwanga. Aba batanwako bakyangye kwikala Bakamonyi babatizhiwa nabo bamwenamo mu kupwila ne mu misambo ikosesha bulunda bwetu ne Lesa. Pa kuba’mba tunengezhenga bulongo kuno kupwila ne kukwabotu, twafwainwa kwingijishanga Butala bwa Mabuku a Bakamonyi ba kwa Yehoba, JW Library^®, BUTALA BWA MABUKU PA INTANETI^™ (umvwe ko buji mu mulaka wenu), ne butala bwa mabuku bwa pa Nzubo ya Bufumu. Mu butala bwa mabuku bwa pa Nzubo ya Bufumu mwikala mabuku onse a Bakamonyi ba kwa Yehoba nabiji, Watch Tower Publications Index nangwa Buku Wakukwasha Bakamonyi ba kwa Yehoba Kupesapesa ne ma Baibolo akwabo, concordance, dikishonale ne mabukutu akwabo mo twakonsha kutaana bishinka. Uji yense wakasuluka kwingijisha buno butala bwa mabuku kupwila saka kukyangye kutendeka nangwa panyuma ya kupwila.

KUSAMBAKANA KWA KUYA MU MWINGILO

²⁰ Pa bimye byapusana pusana mukachi ka mulungu ne ku mpelo ya mulungu, mabumba a basapwishi asambakana kuya mu busapwishi. Kuno kusambakana javula kubiwa pa mazubo a balongo nangwa pa mapunzhatu akwabo pawama. Nzubo ya Bufumu nayo bakonsha kwiingijisha. Kwikala na mabumba avula mu mapunzha apusana pusana mu nyaunda ya kipwilo, kupelela basapwishi kwenda kuya ku kusambakana kwa kuya mu mwingilo ne mu nyaunda. Basapwishi bakonsha kwibabanya bukiji ne kuya mu nyaunda kwa kubula kutaya kimye. Kalama wa jibumba uta muchima aba baji mu jibumba janji. Nangwa kya kuba kyawama mabumba kwiikela, kuji bintu bimweka byakonsha kulengela mabumba avula kusambakena pamo. Umvwe basapwishi bachechetu bo baya mu mwingilo mukachi ka mulungu, kyakonsha kuwama kuvwanga mabumba nangwa bonsetu kusambakena pa Nzubo ya Bufumu nangwa ku mpunzha ikwabo kwawama. Inge kyaikala bino, basapwishi bakekala na wa kwingila nanji. Kabiji kipwilo kyakonsha kusambakena pa Nzubo ya Bufumu pa moba a kukokoloka. Nangwa kipwilo kyakonsha kusalapo kusambakena pamo kuya mu busapwishi panyuma ya Lufunjisho lwa Kyamba kya Usopa.

²¹ Inge mabumba asambakana bunke bunke, kalama wa jibumba ye utangijila mwisambo pa kuya mu busapwishi. Pa kimye pa kimye, kalama wa jibumba wakonsha kwambila nkwasho wanji nangwa mulongo wafikilamo kutangijila mwisambo pa kuya mu mwingilo. Ubena kutangijila wafwainwa kunengezha bulongo bintu byakonsha kukwasha basapwishi mu mwingilo. Kwikala kunengezha bya kwingila mwingilo wa mu bujimi, kabiji umo mu jibumba ulomba. Inge bapwisha kulomba, ponkapotu basapwishi bafwainwa kuya mu nyaunda na kusapwila. Uno mwisambo wafwainwa kwikala wa maminiti atanu kufika ku maminiti atanu na abiji, pano bino inge kya kuba waikalako panyuma ya kupwila kechi wafwainwa kubanda ne. Bafwainwa kutundaika, kwamba bintu byakonsha kukwasha basapwishi mu mwingilo wa kusapwila. Ba katataka ne bakwabo babena kukeba bukwasho bakonsha kwingijila pamo na basapwishi bapijilwa pa kuba’mba bebafunjishe bya kusapwila.

LUNENGEZHO LWA BIPWILO BYA KATATAKA NANGWA BIPWILO MUJI BANTU BACHECHE

²² Bantu bavula byo babena kwikala ke baana ba bwanga, bipwilo nabyo bibena kuvujilako. Javula kalama wa mwanzo utuma pepala wa kwipwizhapo kipwilo kya katataka. Kimye bimo, jibumba jicheche bakonsha kwijitangijilanga ku kipwilo kiji pepi.

²³ Bimye bimo, bipwilo bicheche byakonsha kwikalatu na banyenga bonka bonka. Umvwe kyaikala bino, nyenga ubena kulomba mu kipwilo nangwa kutangijila kupwila wafwainwa kuvwala kitambala, kwesakana na lunengezho lwa mu Binembelo. (1 Ko. 11:3-16) Javula wikala saka atala ku jibumba. Banyenga kechi bamba majashi a mvula bantu pa kupwila ne. Batangatu ne kwambapo pa byambo byanengezha jibumba ja Lesa, nangwa umvwe bakeba kupimpulako, bakonsha kwisamba na luonde nangwa kwingijisha kimwesho. Ofweshi wa musampi ukatongolapo nyenga umo wa kutambwilanga ne kutumanga makalata ku ofweshi ne kutangijilanga kupwila. Mu kupita kwa kimye, inge balongo bafikilamo, bo bakengilanga ino mingilo.

KUBUÑANA KWA MWANZO

²⁴ Pa mwaka pa mwaka banengezha kuba’mba bipwilo biji mu mwanzo umo bikekale na kubuñana kwa mwanzo kwa juba jimo kubiwa jibiji mu mwaka. Abino bimye bya lusekelo bipa bonse kimye kya ‘kushinkula michima [yabo]’ ne kupwila pamo na bena Kilishitu. (2 Ko. 6:11-13) Kulanguluka pa bibena kukebewa, jibumba ja Yehoba jinengezha bishina bya mu Binembelo ne majashi apusana pusana a pa kuno kubuñana. Kwikala mbaji yapusana pusana nabiji majashi, bimwesho, byamwekele, muntu ubena kwamba bunke ne misambo ya mepuzho. Luno lufunjisho lwa pa kimye kyafwainwa lukosesha bonse batanwako. Pa kuno kubuñana, baana ba bwanga ba katataka babatizhiwa ne kumwesha kwipana kwabo kwi Yehoba.

KUSHONKENA KWA KIJIIJI

²⁵ Pa mwaka jimo, kwikala kupwila kukatampe. Pa kuno kupwila paji ne kushonkena kwa kijiiji kwa moba asatu, kupwizha pamo bipwilo biji mu myanzo yavula. Misampi icheche yakonsha kunengezha kuba’mba bipwilo byonse biji mu nyaunda ya musampi bishonkene pa mpunzha imo. Kuno kushonkena bekunengezha mu mashinda apusana pusana kwesakana na biji bintu mu kyokyo kyalo, nangwa kwesakana na mikambizho yafuma ku jibumba ja Lesa. Pa kimye pa kimye, kwikala kunengezha kushonkena kukatampe mu byalo bimo kabiji kwakonsha kutanwa Bakamonyi bavula bingi kufuma mu byalo byapusana pusana. Pa myaka yavula yapitapo, bantu bavula bafunda mambo awama a Bufumu na mambo a kwita bantu kwiya ku kuno kupwila kukatampe kwa Bakamonyi ba kwa Yehoba.

²⁶ Pa kushonkena, bantu ba Yehoba bakwatankana pamo ne kupopwela Yehoba na lusekelo. Kushonkena kukwasha kusamisha kyeya kya bukine. Pa kushonkena kumo, balupula mabuku a kufundamo pa muntu pa muntu nangwa pa kupwila, ne a kwingijisha mu mwingilo. Kabiji pa kushonkena pekala ne babatizhiwa. Kushonkena kwanema bingi mambo kukosesha bulunda bwetu ne Lesa. Kupana kiyukilo kya kuba’mba kine bantu ba Yehoba bakwatankana mu bulongo bwa ntanda yonse bwa bena Kilishitu bepana, baji na kayukilo ka baana ba bwanga ba kwa Yesu Kilishitu.—Yoa. 13:35.

²⁷ Kutanwa ku kupwila, ku kubuñana ne ku kushonkena kwitutundaika kuba kyaswa muchima wa Yehoba. Kabiji kwituzhikijila ku bintu bya ino ntanda byakonsha konauna lwitabilo lwetu. Kupwila konse kwa uno mutundu kuleta lukumo ne lutotelo kwi Yehoba. (Sala. 35:18; Maana 14:28) Twafwainwa kusanta kuba’mba mu ano moba a kupelako Yehoba wanengezhezha bantu banji bepana bino bimye bikosesha lwitabilo lwabo.

KIJIILO KYA NKAMBO KYA MABANGA

²⁸ Pa mwaka jimo, pa juba jafwile Yesu Kilishitu, bipwilo byonse bya Bakamonyi ba kwa Yehoba kuzhokoloka ntanda bikala na Kivuluko kya Lufu lwa Kilishitu, nangwa’mba Kijiilo kya Nkambo kya Mabanga. (1 Ko. 11:20, 23, 24) Kuno ko kupwila kwanema bingi pa kupwila konse kwikala na bantu ba Yehoba mu mwaka. Betukambizha kuvulukanga kino Kivuluko.—Luka 22:19.

²⁹ Kivuluko kikalako pa jonka juba jo baikelangapo na Kijiilo kya Lupitailo kala, kabiji jino juba jatongolwa mu Binembelo. (Lupu. 12:2, 6; Mat. 26:17, 20, 26) Kijiilo kya Lupitailo kyajinga kivuluko kyaubanga bena Isalela pa mwaka pa mwaka, pa kuvuluka byo bebafumishe mu Ijipita mu mwaka wa 1513 B.C.E. Yehoba ye watongwele juba ja Lupitailo. Pa kyokya kimye, wabuujile bena Isalela amba pa juba ja bu 14 mu ñondo mutanshi, bakaje mwana mukooko wa Kijiilo kya Lupitailo ne kufuma mu buzha mu Ijipita. (Lupu. 12:1-51) Jino juba jiyukanyikwa pa kubala moba 13 kufuma pa kutentama kwa ñondo ku mpelo ya March nangwa kuntatwilo ya April byonka byo bamumona mu Yelusalema. Kivuluko kikalako kimye ñondo kyo ekelamo wa kizhingu ku mpelo ya March nangwa kuntatwilo ya April.

³⁰ Pa Mateo 26:26-28 paji byambo byaambile mwine Yesu pa mambo a jishinda jafwainwa kuvulukilamo Kivuluko. Kechi kisho kya bintu bya bapashi ne, bino ke kijiilotu kya kifwanyikizho kya boba bo baita kwikala banswanyi pamo ne Yesu Kilishitu mu Bufumu bwa mwiulu. (Luka 22:28-30) Bena Kilishitu bashala bonse ne bantu baji na lusekelo lwa kukeba kufunda bukine batundaikwa kutanwako ku Kijiilo kya Nkambo kya Mabanga. Inge batanwako, bamwesha byo banemeka luno lunengezho lo anengezha Yehoba Lesa kuba’mba bantu bonse bamwenemo kupichila mu Mwananji aye Yesu Kilishitu. Juba ja Kivuluko saka jikyangye kufika, kwikala jashi jilondankana na Kivuluko jo banengezha kutundaika bantu kutanwa ku Kivuluko ne kwibatundaika kukeba kufunda Baibolo.

³¹ Bakamonyi ba kwa Yehoba batengela bingi na lusekelo bimye bya kupwila pamo ko ‘twita muchima atwe bene na bene kuba’mba twitundaikenga kwitemwa atwe bene na bene ne kuba mingilo yawama.’ (Hebe. 10:24) Kalume wa kishinka kabiji wa maana watako bingi muchima kunengezha kuno kupwila kwitukwasha kwesakana na bintu byo tupitamo. Bakalume ba Yehoba bonse kuvwangakotu ne bantu baji na lusekelo lwa kukeba kufunda bukine bebakambizha kutanwangako ku kuno kupwila kimye kyonse. Bakalume ba Lesa bakwatankana na mambo a kunemeka bintu bitunengezhezha Yehoba kupichila mu jibumba janji. Kyakila pa byonse, tutota ne kutumbijika Yehoba.—Sala. 111:1.