‘Yukai Bintu Byanemesha’

“Muyuke bintu byanemesha.”—FILI. 1:10.

BISHINKA BYA KULANGULUKAPO

Bimwesho byamwene Isaya, Ezikyo ne Danyela bitulengela kuketekela ka?

Kulanguluka pa mwingilo watapo muchima lubaji lwa pano pa ntanda lwa jibumba ja Yehoba kwitufunjishapo ka?

Uno mutwe wimulengela kufuukulapo kuta muchima pa ka?

1, 2. Ñanyi bungauzhi bwaamba pa moba apelako bwakumishe bingi batumwa ba kwa Yesu, kabiji mambo ka?

PETELO, Yakoba, Yoano ne Andeleo bajinga na Nkambo yabo kwa bunke. Byaambile Yesu kuba’mba nzubo ya Lesa bakeyonauna bibaletejile bingi milanguluko. (Mako 13:1-4) Onkao mambo, baipwizhe’mba: “Tubulai, abino bintu bikamweka ñanyi kimye kabiji kiyukilo kya kwikalapo kwenu ne kya mpelo ya buno bwikalo kyo kyepi?” (Mat. 24:1-3) Yesu watendekele kwibabula bintu bikamweka bikapimpula bintu pa ntanda ne kumwesha kuba’mba tubena kwikala mu moba apelako a buno bwikalo bwatama bwa kwa Satana. Kintu kimo Yesu kyo ebabujile kibakumishe bingi. Byo apwishishe kwibabula’mba kukekala makondo, bipowe bya nzala ne kuvujilako kwa bubi, Yesu waambijile jimo ne kuba’mba kukobiwa ne kintu kyawama kikamwesha’mba tuji mu moba apelako. Waambile’mba: “Ano mambo awama a Bufumu akasapwilwa pano pa ntanda ponse kuba amba ba mu bisaka byonse bya bantu bakeomvwe, apa bino mpelo ikafike.”—Mat. 24:7-14.

² Baana ba bwanga ba kwa Yesu baingijile bingi mwingilo wa kusapwila mambo awama a Bufumu pamo ne Kilishitu. (Luka 8:1; 9:1, 2) Bafwainwa bavulukile ne byambo byaambile Yesu bya kuba’mba: “Bujimi kine bwabaya, pakuba bamingilo bakepa. Onkao mambo, lombai Mwine mwina bujimi kutuma bamingilo mu bujimi bwanji.” (Luka 10:2) Pano bafwainwe kusapwila byepi “pano pa ntanda ponse” ne kuba’mba ba mu “bisaka byonse bya bantu” beomvwe? Kabiji bamingilo bafwainwe kufuma pi? Batumwa byo bajinga ne Yesu jo ja juba bafwainwa balangulukilenga pa byo kikekala kulutwe. Kwa kubula nangwa kuzhinaukatu ne, bafwainwa bakuminye bingi pa kulanguluka pa buno bungauzhi bo tutanga mu Mateo 24:14 byo bukafika.

3. Nga byambo biji mu Luka 21:34 bibena kufika byepi mu ano moba, kabiji twafwainwa kwipesa pesa byepi atweba bene?

³ Tubena kwikala mu kimye kibena kufika bungauzhi bwa kwa Yesu. Biumbi na biumbi bya bantu byakwatankana mu kusapwila mambo awama a Bufumu ntanda yonse. (Isa. 60:22) Nangwa byonkabyo, Yesu waambile kuba’mba bamo kikebakatazha bingi kutwajijila na kusapwila mu ano moba apelako. Mambo ‘bakatesha michima yabo’ ku bintu bikwabo ne kulabikwa. (Tangai Luka 21:34.) Tubena kwimwena kufika kwa bino byambo. Bantu ba Lesa bamo babena kulabikwa. Kino kimwekela mu byo bafuukulapo pa mambo a nkito, kufunda kufika palepa, ne kukebesha bintu bya ku mubiji, kabiji ne kimye kyo bataya ku makayo ne bya kisangajimbwe. Bakwabo bakoka na mambo a makatazho ne bijikila bya mu bwikalo. Iipuzhai anweba bene’mba: ‘Mbena kwingila byepi? Kabiji byo mfuukulapo bimwesha’mba nata muchima pa ka mu bwikalo bwami?’

4. (a) Ñanyi bintu Paulo byo alombejileko bena Kilishitu ba mu Filipai, kabiji mambo ka? (b) Ñanyi bintu byo tusakwisambapo mu uno mutwe ne mu walondelapo, kabiji mambo ka?

⁴ Bena Kilishitu bajingako mu myaka kitota kitanshi bebikangako bingi pa kuba’mba batangizheko mwingilo wa Lesa mu bwikalo bwabo. Mutumwa Paulo wamwene’mba wafwainwe kulombelako bena Filipai kuba’mba ‘bayuke bintu byanemesha.’ (Tangai Filipai 1:9-11.) Byonka byajinga mutumwa Paulo, bavula pa kyokya kimye bachinchikile byo baambilenga “mambo a Lesa kwa kubula moyo.” (Fili. 1:12-14) Ne atweba lelo jino tubena kusapwila Mambo a Lesa kwa kubula moyo. Nanchi kulanguluka pa bintu bibena kwingijiwa mu jibumba ja Yehoba kwakonsha kwitukwasha kuta muchima pa mwingilo wakilamo kunema wa kusapwila nyi? Ee, kwakonsha. Mu uno mutwe tusakwisamba pa bintu byanengezha Yehoba pa kuba’mba bungauzhi buji mu Mateo 24:14 bufike. Jibumba janji jata muchima pa ka, kabiji kuyuka kino kwakonsha kwitutundaika byepi atweba bene ne bisemi byetu pamo? Mu mutwe walondelapo, tukesamba pa bintu byakonsha kwitukwasha kuchinchika ne kutwajijila kwendela pamo na jibumba ja Yehoba.

LUBAJI LWA MWIULU LWA JIBUMBA JA YEHOBA

5, 6. (a) Mambo ka Yehoba o amwesheshe bimwesho bya lubaji lwa mwiulu lwa jibumba janji? (b) Ñanyi kintu kyamwene Ezikyo mu kimwesho?

⁵ Kuji bintu byavula Yehoba byo abujile kukeba kuba’mba binembwe mu Mambo anji. Kya kumwenako, kechi walumbulwile bingila bongo nangwa bingila bya mwiulu ne. Pakuba witulumbulwila kyaswa muchima wanji ne bya kwikala bwikalo bumutokesha ku muchima. (2 Timo. 3:16, 17) Ke kintu kileta bingi lusekelo pa kuyuka kuba’mba Baibolo witulumbulwilako pacheche biji lubaji lwa mwiulu lwa jibumba ja Yehoba! Tumvwa bingi bulongo pa kutanga mashimikila anembwa mu Isaya, Ezikyo, Danyela, ne mu Lumwekesho lwa kwa Yoano alumbulula lubaji lwa mwiulu lwa jibumba ja Yehoba. (Isa. 6:1-4; Ezi. 1:4-14, 22-24; Da. 7:9-14; Lum. 4:1-11) Kijitu nobe Yehoba wavwetula kipembe kya mwiulu pa kuba’mba tumone bijimo. Mambo ka o etubujila bino bintu?

⁶ Yehoba waubile bino mambo kechi ukeba atweba kuvulama kuba’mba tuji mu jibumba ja bilengwa byonse ne. Lubaji lwa jibumba ja Yehoba lubula kumweka lubena kwingila na ngovu kuba kyaswa muchima wanji. Kya kumwenako, Ezikyo wamwene lubaji lwa jibumba ja Yehoba lubula kumweka lwaimenejilwengako na kalaki mukatampe wa mwiulu. Uno kalaki waendelenga bingi lubilo kabiji waalulukilengatu mu kimye kicheche. (Ezi. 1:15-21) Bitanga bya uno kalaki inge byazhokoloka, waendelenga museke walepa bingi. Mu kimwesho, Ezikyo wamwene ne waikele pa uno kalaki. Waambile’mba: “Namwene nobe lubemba ye batubula, uji mukachi ka mujilo wamuzhokoloka; . . . kyamwekele akya kyapashañene nobe lukumo lwa Yehoba.” (Ezi. 1:25-28) Kyamweka Ezikyo waumvwine bingi moyo pa kumona kino kimwesho. Wamwene Yehoba saka atangijila jibumba janji na mupashi wanji wazhila. Kino ke kya kukumya kyaimejilengako lubaji lwa mwiulu lwa jibumba ja Yehoba jibena kwenda!

7. Kimwesho kyo bamwesheshe Danyela kitulengela byepi kwikala na luketekelo?

⁷ Danyela naye wamwene bintu bikosesha luketekelo lwetu. Bamuswishishe kumona Yehoba wamwekelenga nobe “Wa-kala-kene” saka aikala pa jitanda jalakaukilenga mujilo. Jino jitanda jajinga pa bitanga. (Da. 7:9) Yehoba wakebelenga Danyela kuyuka’mba jibumba janji jenda pa kuba’mba jifikizhe kyaswa muchima wanji. Danyela wamwene ne “umo wapashañene nobe mwana muntu,” aye Yesu, saka bamupa luusa lwa pa jibumba ja Yehoba ja pano pa ntanda. Bukalama bwawama bwa kwa Kilishitu kechi bukekalakotu myaka icheche ne. Bukekala “bundamabyalo bwa myaka ne myaka, bukabula kupwa, ne bufumu bwanji bo bufumu bo bakabula konauna.” (Da. 7:13, 14) Kino kitutundaika kuketekela mwi Yehoba ne kuyuka byo abena kuba. Wapaine “bundamabyalo, ne lukumo” ku Mwananji Yesu waesekelwe ne kumwesha’mba wafikilamo. Yehoba waketekela Mwananji. Onkao mambo, ne atweba twafwainwa kuketekela buntangi bwa kwa Yesu.

8. Bimwesho bya jibumba ja Yehoba byalengejile Ezikyo ne Isaya kuba byepi, nga atweba byafwainwa kwitulengela kuba ka?

⁸ Nga bino bimwesho bya jibumba ja Yehoba ja mwiulu jibula kumweka byakonsha kwitulengela kuba ka? Byonka byaubile Ezikyo, ne atweba tutundaikwa bingi pa kumona bibena kuba Yehoba. (Ezi. 1:28) Kulanguluka languluka pa jibumba ja Yehoba kwitulengela kuba byonka byaubile Isaya. Kimye byo kyafikile kya kuba’mba abule bantu bintu bibena kuba Yehoba, wafikenejiletu kuswa. (Tangai Isaya 6:5, 8.) Isaya waketekejile kuba’mba Yehoba ukamukwasha kabiji kafwako kikamulengela kukankalwa kwingila mwingilo ye bamupele ne. Po pamotu ne atweba, kuyukako pacheche biji lubaji lubula kumweka lwa jibumba ja Yehoba kwitutundaika kwingila na ngovu mu mwingilo wa Lesa. Kulangulukapo bulongo pa jino jibumba kwitutundaika bingi ne kwitulengela kuta muchima pa kuba kyaswa muchima wa Yehoba.

LUBAJI LWA PANO PA NTANDA LWA JIBUMBA JA YEHOBA

9, 10. Mambo ka lubaji lumweka lwa jibumba ja Yehoba o lwakebewenga?

⁹ Kupichila mu Mwananji, Yehoba walengele lubaji lwa pano ntanda lwa jibumba janji lwingijila pamo na lubaji lwa mwiulu lubula kumweka. Mambo ka lubaji lumweka o lukebewa kwingila mwingilo uji pa Mateo 24:14? Langulukai pa bino bishinka bisatu.

¹⁰ Kitanshi, Yesu waambile’mba baana banji ba bwanga bakengila uno mwingilo wa kusapwila “monse mwapela ntanda.” (Byu. 1:8) Kya bubiji, kwakebewenga jibumba ja kunengezha kajo ka ku mupashi ne kukwasha boba bakengilanga uno mwingilo. (Yoa. 21:15-17) Kya busatu, kwafwainwe kwikala lunengezho lwa boba bakasapwilanga mambo awama lwa kupwila pamo na kupopwela Yehoba ne kwibafunjisha bya kwingila uno mwingilo. (Hebe. 10:24, 25) Bino byonse kechi byafwainwe kwiyakotu bine ne. Baana ba bwanga bwa kwa Kilishitu pa kuba’mba bengile bulongo, bafwainwe kukwatankana.

11. Twakonsha kutundaika byepi mitanchi yanengezha jibumba ja Yehoba?

¹¹ Twakonsha kutundaika byepi mitanchi yanengezha jibumba ja Yehoba? Jishinda jimo ja kubila bino ke kuketekela boba Yehoba ne Yesu bo bapa mwingilo wa kwitutangijila pa kusapwila. Mu ntanda muji bintu byavula bingi byakonsha kuba bano balongo betutangijila. Pano ñanyi mwingilo watapo muchima lubaji lwa pano pa ntanda lwa jibumba ja Yehoba?

BATA MUCHIMA PA “BINTU BYANEMESHA”

12, 13. Bakulumpe mu kipwilo bengila byepi mwingilo wabo, kabiji mambo ka kino o kimutundaikila?

¹² Bakulumpe mu kipwilo baibijila mwaya ntanda yonse bebapa mwingilo wa kunengezha bya kwingila ne kutangijila mwingilo wa kusapwila Bufumu mu byalo mo bengijila. Byo bendela pamo na jibumba ja Yehoba jiji nobe kalaki ne kuyuka byo bafwainwa kuba, bano banabalume bakishinka kabiji bepelula balondela lutangijilo lwa Yehoba ne Yesu. Onkao mambo, bano balongo saka bakyangye kufuukulapo bya kuba, bapesa pesa mu Mambo a Lesa ne kwialengela kwikala ‘lampi wa maulu abo ne kyeya kya mu jishinda jabo,’ kabiji balomba Yehoba kwibatangijila.—Sala. 119:105; Mat. 7:7, 8.

¹³ Byonka byaubanga banabalume batangijilanga mu myaka kitota kitanshi, bakulumpe mu kipwilo batangijila mwingilo wa kusapwila lelo jino, bata muchima pa “mwingilo wa kusapwila mambo a Lesa.” (Byu. 6:4) Basekela bingi pa kumona uno mwingilo wa kusapwila mambo awama byo abena kwenda ku mpuzha ko bengijila ne kuzhokoloka ntanda yonse. (Byu. 21:19, 20) Kabiji kechi balengela bantu ba Lesa mizhilo yavula ne. Mu kifulo kya kuba byobyo, balondela byaamba Binembelo ne lutangijilo lwa mupashi wazhila wa Lesa pa kulenga mitanchi ikebewa pa kuba’mba mwingilo wa kusapwila endenga bulongo. (Tangai Byubilo 15:28.) Umvwe ke bobe bino, bakulumpe mu kipwilo bakalengela ba mu kipwilo bonse kulondela byo boba.—Efi. 4:11, 12.

14, 15. (a) Ñanyi bintu bibena kubiwa pa kuba’mba mwingilo wa kusapwila endenga bulongo mwaya ntanda yonse? (b) Mumvwa byepi pa kutundaika mwingilo wa kusapwila Bufumu?

¹⁴ Mingilo ikwabo ingila balongo ibula kumweka ku bantu ke kunengezha mabuku etu, kupwila ne kushonkena. Bamingilo bepana bavula bengila na ngovu mwingilo wa kutuntulula kano kajo ka ku mupashi mu milaka 600 pa kuba’mba bantu bavula bafunde pa “mingilo ikatampe ya Lesa” mu milaka yabo. (Byu. 2:7-11) Balongo ne banyenga bakyanyike bengila mwingilo wa kupulinta ne kulenga mabuku na mashinyi ulenga mabuku avula bingi pa kimye kimo. Ano mabuku beatwala ku bipwilo biji pepi ne byaikela kwalepa bingi.

¹⁵ Kuji bintu byavula bingi byo banengezha bya kwitukwasha pa kuba’mba twingile bulongo mwingilo wa kusapwila mambo awama mu bipwilo mo tuji. Kya kumwenako, bavula bepana kukwasha mu mwingilo wa kushimika Mazubo a Bufumu ne a Kubuñenamo, kukwasha baponenwa na bya malwa, baji na bikola bikebewa kwibakwasha bukiji, kunengezha kubuñana ne kushonkena, kufunjisha masukulu a mwingilo ne bintutu bikwabo bibula kumweka bilengela bintu kwenda bulongo. Mambo ka o bengijila ino mingilo? Ke na mambo a kutundaika mwingilo wa kusapwila mambo awama, kukwasha bengila uno mwingilo kwikala na bulunda bwawama na Lesa ne kutundaika mpopwelo ya kine. Nanchi lubaji lwa pano pa ntanda lwa jibumba ja Yehoba lwatwajijila kuta muchima pa bintu byanemesha nyi? Ee.

LONDELAINGA JIBUMBA JA YEHOBA

16. Ñanyi bintu byo mwafwainwa kufundapo bunke bwenu nangwa na kisemi kyenu?

¹⁶ Nanchi bimye bimo tulangulukapo pa bibena kwingila jibumba ja Yehoba nyi? Bamo pa kupopwela kwa kisemi nangwa pa lufunjisho lwa pa bunke bapesa pesa pa bino bintu ne kulangulukapo. Nabiji kufunda pa bimwesho byamwene Isaya, Ezikyo, Danyela ne Yoano kwakonsha kwimukwasha bingi. Buku wa Kizungu wa kuba’mba Jehovah’s Witnesses—Proclaimers of God’s Kingdom ne mabukutu akwabo nangwa maselechi a DVD alumbulula bulongo biji jibumba ja Lesa.

17, 18. (a) Ñanyi bintu byo mwamwenamo mu uno mwisambo? (b) Ñanyi mepuzho o twafwainwa kwiipuzha?

¹⁷ Kulanguluka languluka pa bibena kuba Yehoba kupichila mu jibumba janji kwawama bingi. Pamo na jino jibumba, twayai ne atweba bonse tutwajijile kuta muchima pa bintu byanemesha. Kuba bino kuketulengela kwikala na mukoyo wajingapo ne Paulo. Wanembele’mba: ‘Byo tuji na uno mwingilo monka mwayila lusa lo betumwesheshe, kechi tubwela panyuma ne.’ (2 Ko. 4:1) Kabiji watundaikile bakwabo bamwingilo amba: “Kechi twikileke kuba kyawama ne, mambo mu kimye kyafwainwa tukanowa umvwe twabula kukoka.”—Nga. 6:9.

¹⁸ Nanchi atweba bonse pa muntu pa muntu nangwa mu bisemi kujipo mo twafwainwa kupimpulako pa kuba’mba tuteshe muchima ku bintu byanemesha mu bwikalo bwetu nyi? Abya twafwainwa kupezhako bwikalo bwetu nangwa kukepeshako bya kutabataba pa kuba’mba tuteshe muchima pa mwingilo wakilamo kunema wa kusapwila nyi? Mu mutwe walondelapo, tukesamba pa bintu bitanu biketukwasha kutwajijila kwendela pamo na jibumba ja Yehoba.

[Kipikichala pa peja 22]

[Kipikichala pa peja 24]