“Monai Kipikichala!”

Bimye binga byo mwaambapo kala bino byambo nangwa kubula bakwenu inge mwazhikula Kyamba kya Usopa kya katataka? Bipikichala byo banengezha bulongo bebibikamo kuba’mba tufunjileko. Bitulengela kulangulukapo. Kabiji byakonsha kwitukwasha kikatakata pa kunengezha nangwa pa kukumbulapo pa lufunjisho lwa Kyamba kya Usopa.

Kya kumwenako, akilangulukai pa ene mambo kipikichala kitanshi kikala pa mutwe wa kufundamo o bekibikilapo. Kimwesha ka? Kikwatankana byepi na mutwe wa kibaba nangwa na kinembelo paimena mutwe? Kabiji langulukai pa byo kyakwatankana na bipikichala bikwabo, byo kyakwatankana na byo mubena kwisambapo ne byo kyakonsha kwimukwasha mu bwikalo bwenu.

Utangijila Lufunjisho lwa Kyamba kya Usopa wafwainwa kwambila baji mu luonde kwambapo pa bipikichala byonse, kwambapo byo byakwatankana na lufunjisho nangwa byo bibakwasha pa muntu pa muntu. Kimye kimo, munshi ya kipikichala mwikala byambo bitongola jifuka jakwatankana na kipikichala. Bipikichala bikwabo, utangijila lufunjisho ye wafwainwa kumona jifuka jakwatankana na kyo kyo kipikichala. Kupichila mu kuba bino, bonse bakamwenamo bingi mu bintu byakonsha kwitukwasha kulanguluka pa mafunjisho aji mu Mambo a Lesa.

Mulongo umo waambile’mba, “Inge napwisha kutanga kibaba kyo banemba bulongo, bipikichala bikala nobe bintu byo babika ku keke pa kuba’mba atobale.”