MUTWE WA KUFUNDA 18
Itundaikainga Anweba Bene na Bene Inge Mwapwila Pamo
“Twayai twitenga muchima [atweba] bene na bene . . . , twitundaikenga [atweba] bene na bene.”—HEBE. 10:24, 25.
LWIMBO 88 Mbuulai Mashinda Enu
BIJI MU UNO MUTWEa
1. Mambo ka o tukumbwilapo pa kupwila?
MAMBO ka o tuyila ku kupwila? Tuya na kutota Yehoba. (Sala. 26:12; 111:1) Kabiji tutaanwa ku kupwila pa kuba’mba twitundaike atweba bene na bene mu bino bimye byakatazha. (1 Tesa. 5:11) Umvwe twakumbulapo, tutota Lesa ne kutundaika bakwetu.
2. Ñanyi kimye kyo twakonsha kukumbulapo?
2 Twafwainwa kukumbulangapo pa kupwila kimye kyonse. Ku mpelo ya mulungu twakonsha kukumbulapo pa Lufunjisho lwa Kyamba kya Usopa. Kabiji pa kupwila kwa mukachi ka mulungu twakonsha kukumbulapo pa Kukeba Bishinka Bikwabo Byanema, Lufunjisho lwa Baibolo lwa Kipwilo ne mbajitu ikwabo ya misambo.
3. Ñanyi bintu byakonsha kwitulengela kubula kukumbulapo, kabiji byambo biji pa Bahebelu 10:24, 25 byakonsha kwitukwasha byepi?
3 Atweba bonse tukeba kutota Yehoba ne kutundaika bapopweshi bakwetu. Bino kuji bintu byakonsha kwitulengela kubula kukumbulapo, nabiji kumvwa moyo inge ketukebe kukumbulapo nangwa kampe tukeba kukumbulapo bimye byavula pano bino kechi betutongola ne. Ñanyi kintu kyakonsha kwitukwasha? Byambo Paulo byo anembejile Bahebelu byakonsha kwitukwasha kukumbula buno bwipuzho. Byo aambile pa ene mambo kupwila pamo o kwanemena, waambile’mba twafwainwa kuta muchima pa ‘kwitundaika atweba bene na bene.’ (Tangai Bahebelu 10:24, 25.) Umvwe twavuluka’mba twakonsha kutundaika bakwetu ne kumwesha lwitabilo lwetu patoka na byambo bicheche, kechi tukomvwanga moyo wa kukumbulapo ne. Kabiji inge kechi twakumbulapo bimye byavula ne, twafwainwa kumvwa bulongo mambo bakwabo mu kupwilo bakumbulapo.—1 Pe. 3:8.
4. Ñanyi bintu bisatu byo tusakwisambapo mu uno mutwe?
4 Mu uno mutwe, patanshi tusakwisamba pa byo twakonsha kwitundaika atweba bene na bene mu kipwilo muji bantu bacheche bakonsha kukumbulapo. Kepo tusakwisamba pa byo twakonsha kwitundaika atweba bene na bene mu kipwilo muji bantu bavula bakonsha kukumbulapo. Kabiji tusakwisamba pa byo twakonsha kutundaika bakwetu na mikumbu yetu.
ITUNDAIKAINGA ANWEBA BENE NA BENE MU KIPWILO MUJI BANTU BACHECHE
5. Twakonsha kwitundaika byepi atweba bene na bene inge twapwilatu bantu bacheche?
5 Mu kipwilo muji bantu bacheche nangwa jibumba kechi mwikala bantu bavula bakonsha kukumbulapo ne. Kimye kimo, pabanda bingi pa kuba’mba muntu asuntule kuboko amba akumbule. Inge kyaikala bino, twakonsha kukankalwa kwitundaika atweba bene na bene. Pano twakonsha kuba byepi? Mwakonsha kukumbulangapo javula. Inge saka muba bino, mukatundaika bakwenu nabo kukumbulangapo javula.
6-7. Twakonsha kukepeshako byepi moyo inge tubena kukumbulapo?
6 Ñanyi bintu byo mwakonsha kuba inge mumvwa bingi moyo kukumbulapo? Bavula bomvwa bingi moyo. Bino pa kuba’mba mutundaikenga balongo ne banyenga mwafwainwa kumonapo mashinda a kukepesheshamo moyo. Ñanyi bintu byo mwafwainwa kuba?
7 Mwakonsha kutaana mashinda akonsha kwimukwasha aji mu magazini a kunyuma a Kyamba kya Usopa.b Jishinda jimo ke kunengezha bulongo. (Maana 21:5) Inge mwayuka bulongo biji mu mutwe ye mubena kufundapo kyakonsha kwimupeelela bingi kukumbulapo. Kabiji mwakonsha kukumbulatu mukumbu mwipi. (Maana. 15:23; 17:27) Mukumbu mwipi ukepeshako moyo. Mukumbu mwipi kampe wa mukuku umo nangwa ibiji wakonsha kulengela balongo ne banyenga kumvwisha kishinka kyo mubena kwambapo ne kubula kulubamo. Kukumbulapo mu byambo byenu bicheche kumwesha’mba mwanengezha bulongo kabiji mwaumvwisha bishinka biji mu yewo mutwe.
8. Nanchi Yehoba umvwa byepi ku muchima byo twibikako kukumbulapo?
8 Ñanyi bintu byo mwakonsha kuba inge mwaeseka ano mashinda onse bino mwatwajijilatu na kumvwa moyo wa kukumbulapo jibiji nangwa javula? Yukai’mba Yehoba usanta bingi pa byo mwibikako kukeba kukumbulapo. (Luka 21:1-4) Kabiji Yehoba kechi ukeba atweba kuba kintu kyo ayuka’mba twakonsha kukankalwa kwikyuba ne. (Fili. 4:5) Monaipo kintu kimo kyo mwafwainwa kuba. Lombai pa kuba’mba mwikale na kyubilo kya kutekanya. Kintu kitanshi kyo mwafwainwa kuba ke kukumbulapo jimo mukumbu mwipi.
ITUNDAIKAINGA ANWEBA BENE NA BENE MU KIPWILO MUJI BANTU BAVULA
9. Mambo ka o kyakonsha kukatezha kukumbulapo mu kipwilo muji bantu bavula?
9 Umvwe mu kipwilo kyenu muji basapwishi bavula kyakonsha kwimukatazha bingi kukumbulapo. Kampe balongo ne banyenga bavula bakeba bingi kukumbulapo kya kuba anweba kechi bemutongolapo ne. Danielle umvwa bingi bulongo kukumbulapo.c Umona kukumbulapo kuba’mba jo jishinda jimo jo apopwelamo Yehoba, kutundaikilamo bakwabo ne kukosesha lwitabilo lwanji mu bintu byo afunda mu Baibolo. Bino byo avilukijile mu kipwilo mwajinga bantu bavula kechi wakumbulangapo javula ne. Kimo kimye kupwila kwipwilangatu kwa kubula kumutongolapo. Waambile’mba: “Nalefwilwe bingi. Nalangulukilenga’mba paji kintu kyo mbena kushalapo. Kino inge kyatwajijila kimweka nobe babena kubilamotu.”
10. Ñanyi bintu byo mwakonsha kuba pa kuba’mba mukumbulengapo?
10 Nanchi mwakyumvwapo byonka byaumvwine Danielle ku muchima nyi? Umvwe ibyo, kampe mwakonsha kutatula kulanguluka’mba kyawama kwikilekatu ne kutelekanga kupwila konse ne byo kupwa. Pano bino, kechi mwafwainwa kuleka kukumbulapo ne. Ñanyi bintu byo mwafwainwa kuba? Mwafwainwa kunengezhanga mikumbi yavula pa kupwila konse. Inge kechi mwakumbulapo ku ntatwilo ya lufunjisho ne, mwakonsha kukumbulapo mu mafuka alondelapo. Umvwe mubena kunengezha Lufunjisho lwa Kyamba kya Usopa langulukai pa mafuka byo akwatankana na kishina kya mutwe ye mubena kufunda. Inge mwauba bino, mukayuka mikumbu yavula yo mwakonsha kukumbulapo mu lufunjisho lonse. Kabiji mwakonsha kunengezha kukumbulapo mu mafuka aamba pa bukine bwazhika bwakonsha kukatazha kulumbulula. (1 Ko. 2:10) Mambo ka? Mambo kampe bantu bakonsha kusuntula maboko kuba’mba bakumbulepo bakonsha kwikalatu bacheche. Mwakonsha kuba byepi inge kya kuba mwaeseka ano mashinda onse bino kechi bemupapo kimye kya kukumbulapo ne? Kupwila saka kukyangye kutendeka mwakonsha kwisamba na utangijila lufunjisho ne kumubuula bwipuzho bo mukeba kukumbulapo.
11. Ñanyi lutundaiko luji pa Filipai 2:4?
11 Tangai Filipai 2:4. Mutumwa Paulo bamutangijile ku mupashi wazhila kutundaika bena Kilishitu kuta muchima ku bintu bya bakwabo. Twakonsha kwingijisha byepi luno lutundaiko mu kimye kya kupwila? Twakonsha kuvulukanga’mba bakwetu nabo bakeba kukumbulapo byonkatu ne atweba byo tukeba.
Twakonsha kupako bakwetu kimye kya kukumbulapo pa kupwila byonkatu byo twakonsha kupako bakwetu kimye kya kwambapo inge tubena kwisamba (Monai jifuka 12)
12. Ñanyi jishinda jawama ja kutundaikilamo balongo ne banyenga mu kimye kya kupwila? (Monai kipikichala)
12 Akilangulukai pa kino. Umvwe mubena kwisamba na bakwenu, nanchi yenu mukeba kwambangatu bakwenu kwakubula kwambapo nyi? Ine. Mukeba bakwenu nabo saka bambapo pa kuba’mba balanguluke’mba mwibata muchima. Kyo kimotu ne pa kupwila, tukeba kupako bakwetu kimye kya kukumbulapo. Kwambatu kine, jishinda jawama kutundaikilamo balongo ne banyenga ke kwibapako kimye kya kukumbulapo pa kuba’mba balumbulule lwitabilo lwabo patoka. (1 Kolinda 10:24) Twayai tumone byo twakonsha kuba bino.
13. Ñanyi bintu byo twafwainwa kuba pa kuba’mba bonse bakumbulepo?
13 Kintu kimo kyo twafwainwa kuba ke kukumbulapo mu byambo bicheche pa kuba’mba bavula bakumbulepo. Bakulumpe mu kipwilo ne basapwishi bayuka bulongo kukumbula bakonsha kulengela bakwabo nabo kufunjilako. Nangwatu mu mukumbu wenu mwipi kechi mwafwainwa kwamba pa bishinka byavula ne. Umvwe mwaamba byonse biji mu jifuka mwakonsha kulengela bakwenu kubula bya kwambapo. Mu jino jifuka twaamba pa bintu bibiji byo twafwainwa kuba. Mukumbu wenu wafwainwa kwikala mwipi kabiji mwafwainwa kuchinuzhuka kwamba bishinka byonse biji mu jifuka. Inge yenu batanshi kukumbulapo mu jojo jifuka, ambaitu kishinka kimo.
Ñanyi kimye kyo twakonsha kufuukulapo kubula kusuntula kuboko kimye kya kupwila? (Monai jifuka 14f)
14. Ñanyi kintu kyakonsha kwitukwasha kufuukulapo bulongo bimye byo twakonsha kusuntula kuboko? (Monai kipikichala)
14 Ingijishai milangwe inge mukeba kuyuka bimye binga byo mwafwainwa kukumbulapo. Umvwe ke tusuntule maboko bimye byavula, twakonsha kulengela ubena kutangijila kutongolangatu atweba nangwa kya kuba bakwetu kechi bakikumbulapo ne. Kino kyakonsha kulengela bakwetu kuleka kusuntula maboko.—Sapwi. 3:7.
15. (a) Twakonsha kuba byepi inge kya kuba kechi betutongolapo kuba’mba tukumbulepo ne? (b) Mulongo ubena kutangijila lufunjisho wakonsha kumwesha byepi amba wanemeka bonse? (Monai kakitenguluzha ka kuba’mba “Inge Mubena Kutangijila Lufunjisho.”)
15 Umvwe basapwishi bavula basuntula maboko kimye kya lufunjisho, kechi twafwainwa kusuntula’mba kanatu twambepo byonka byo tukelwa kuba ne. Kimo kimye utangijila kechi wakonsha kwitutongola kimye kyonse kyo twasuntula ne. Kino kyakonsha kulengela twalefulwa. Bino kechi twafwainwa kuzhingila inge kya kuba kechi betutongolapo ne.—Sapwi. 7:9.
16. Twakonsha kutundaika byepi bakwetu bakukumbulapo pa kupwila?
16 Umvwe kechi kyakonsheka kukumbulapo bimye byavula ne, mwafwainwa kutelekesha mikumbu ya bakwenu ne kwibasanchila pa mikumbu yabo inge mwapwisha kupwila. Balongo ne banyenga batundaikwa bingi umvwe mwibasanchila byonkatu byo mwakonsha kwibatundaika inge yenu mwajikukumbula. (Maana 10:21) Kusanchila bakwetu ke jishinda jimo jo twakonsha kwitundaikilamo atweba bene na bene.
MASHINDA AKWABO A KWITUNDAIKILAMO ATWEBA BENE NA BENE
17. (a) Bansemi bakonsha kukwasha byepi baana babo kunengezha mikumbu? (b) Kwesakana na vidyo, ñanyi bishinka bina byo twakonsha kulondela pa kunengezha mukumbu? (Monai tubyambo twa munshi.)
17 Ñanyi jishinda jikwabo jo twakonsha kwitundaikilamo atweba bene na bene kimye kya kupwila? Umvwe mwi bansemi, kwashai baana benu kunengezha mikumbu kwesakana na jifumbi jabo. (Mat. 21:16) Kimye kimo twisamba pa bintu byazhika nabiji makatazho a mu masongola nangwa byubilo byawama, bino pakonsha kwikala jifuka jimo nangwa abiji mwana po akonsha kukumbulapo. Kabiji kwashai baana benu kuyuka’mba kechi kimye kyonse kyo bakonsha kwibatongola inge basuntula kuboko ne. Kwibalumbulwila bino kwakonsha kwibakwasha kubula kulefulwa inge kya kuba babula kwibatongola ne kutongola bakwabo.—1 Timo. 6:18.d
18. Twakonsha kuchinuzhuka byepi kwitota mu mikumbu yetu? (Byambo bya Maana 27:2)
18 Atweba bonse twafwainwa kunengezhanga mikumbu yakonsha kunemeka Yehoba ne kutundaika bena Kilishitu bakwetu. (Maana 25:11) Kampe twakonsha kwambapo pacheche bintu bimo byo twapichilemo, pano bino kechi twafwainwa kwambangatu byavula pe atweba bene ne. (Tangai Byambo bya Maana 27:2; 2 Ko. 10:18) Pakuba twafwainwa kwambanga pe Yehoba, pa Mambo anji ne pa jibumba janji. (Lum. 4:11) Bino mu jifuka inge bashikisha’mba mwambepo bintu bimo byo mwapichilemo po po mwafwainwa kuba byobyo, byonka byo baipuzha mu jifuka jalondelapo.
19. (a) Ñanyi kintu kyakonsha kumweka inge twaleka’mba bakwetu nabo bakumbulepo? (Loma 1:11, 12) (b) Pa bunke bwenu kukumbulapo mwikumona byepi?
19 Nangwa kya kuba kafwako mizhilo yaamba pa byo twakonsha kukumbula ne, twafwainwa kwibikangako kukumbula mikumbu yakonsha kutundaika bakwetu. Kino kibena kulumbulula’mba twafwainwa kukumbulangapo kimye kyonse. Kabiji amba twafwainwa kutondwa na bimye byonka byo twakumbulapo ne kuyuka’mba bakwetu nabo bakeba kukumbulapo. Umvwe twata muchima bakwetu kimye kyo tubena kupwila ‘tukekoseshanga atweba bene na bene.’—Tangai Loma 1:11, 12.
LWIMBO 93 Peshai Kupwila Kwetu
a Twitundaika atweba bene na bene umvwe saka tukumbulapo kimye kya kupwila. Nangwa byonkabyo, bamo bomvwa moyo kukumbulapo. Bakwabo bomvwa bingi bulongo kukumbulapo kabiji bakeba kukumbulapo javula. Umvwe tumvwa moyo nangwa tumvwa bulongo kukumbulapo twakonsha kumwesha byepi amba tubena kwilangulukilako atweba bene ne bene pa kuba’mba bonse twitundaike? Kabiji mikumbu yetu yakonsha kutundaika byepi balongo ne banyenga kutemwa bakwabo ne kuba mingilo yawama? Uno mutwe usakulumbulula.
b Umvwe mukeba kuyukilapo mashinda akwabo, monai Kyamba kya Usopa kya January 2019, ma. 8-13 ne kya September 1, 2003, ma. 19-22.
c Jizhina japimpulwa.
d Tambai vidyo wa kuba’mba Ikala Mulunda na Yehoba—Inengezhe Kukumbulapo uji pa jw.org.
e Monai Kyamba kya Usopa kya July 15, 2013, ji. 32; ne kya kizungu kya September 1, 2003, ma. 21-22.
f KULUMBULULA KIPIKICHALA: Mu kipwilo muji bantu bavula, mulongo wakumbulapo ne kupako bakwabo kimye kya kukumbulapo.