MEPUZHO A MU BAIBOLO A KUMBULWA

Nanchi Lesa umvwa milombelo yetu nyi?

Lesa uteleka ku milombelo ya bantu ba mu bisaka byonse. (Salamo 145:18, 19) Mambo anji Baibolo etutundaika kumubula byonse bibena kwitukatazha. (Filipai 4:6, 7) Pano bino, milombelo imo kechi itokesha Lesa ku muchima ne. Kyakumwenako, milombelo ya kubwezhabwezhapo bintutu bimo, kechi imutokesha ku muchima ne.—Tangai Mateo 6:7.

Kabiji Yehoba washikwa milombelo ya bantu babula kulondela mizhilo yanji kyanshiji. (Byambo bya Mana 28:9) Kyakumwenako, mu kimye kya kala Lesa wakaine kuteleka ku bena Isalela bazhachilwe na mambo a kwipayañana. Pa kuba’mba Lesa omvwe milombelo yetu, twafwainwa kulondela byo akeba.—Tangai Isaya 1:15.

Twafwainwa kuba byepi pa kuba’mba Lesa omvwe milombelo yetu?

Kwakubula lwitabilo, Lesa kechi wakonsha kumvwa milombelo yetu ne. (Yakoba 1:5, 6) Twafwainwa kusumininwa kuba’mba ko aji ne kuba’mba wituta muchima. Twakonsha kukosesha lwitabilo lwetu kupichila mu kufunda Baibolo, mambo lwitabilo lwa kine lwaimena pa Mambo a Lesa.—Tangai Bahebelu 11:1, 6.

Twafwainwa kulombanga kimye kyonse saka twipelula. Ne mwana Lesa aye Yesu wipelwile kimye kyo alombelenga. (Luka 22:41, 42) Mu kifulo kya kubuula Lesa byo afwainwa kuba, twafwainwa kwibikako kuyuka byo akeba kupichila mu kutanga Baibolo. Umvwe twauba bino, popo tukalombanga monka mwayila kyaswa muchima wa Lesa.—Tangai 1 Yoano 5:14.

Umvwe mukeba kuyukilapo byavula, monai kitango 17 mu uno buku wanembwa na Bakamonyi ba kwa Yehoba

Mwakonsha ne kukopolola pa www.jw.org

[Kipikichala pa peja 16]

Mambo ka milombelo imo kyo ibujila kutokeshesha Lesa ku muchima?