FWENYAI KWIPI NE LESA

‘Yehoba Wimulekejileko Mambo’

“Awa ubula kulekelako bakwabo mambo onauna kyabu kya kwabukilapo mwine.” Bino byambo wibyambile ke shayuka wa mpito aye Edward Herbert mwina Britain wa mu kitota kya myaka kya mu 17. Waambile pa kintu kitulengela kulekelako bakwetu mambo, mambo ne atweba tulomba lulekelo lwa mambo kwi abo. (Mateo 7:12) Bino kuji ne bintu bikwabo byafwainwa kwitulengela kulekelangako mambo bakwetu. Akimonai byambo bya mutumwa Paulo byanembwa pa Kolose 3:13.—Tangai.

Na mambo a kuba twi bambulwakoloka, kimo kimye twakonsha kuba bintu byakonsha kuzhingijisha bakwetu, kabiji nabo bakonsha kuba byonkabyo kwi atweba. (Loma 3:23) Twakonsha kwikala byepi na mutende na bantu bakwetu bambulwakulumbuluka? Paulo byo atangijilwe na mupashi wa Lesa, witujimwineko kuba’mba twafwainwa kulekelangako mambo bakwetu. Nangwa kya kuba papita myaka 2,000, po byanembejilwe bino byambo, ne luno byanema. Twayai twisambe pa byambo bya kwa Paulo.

“Saka mwitekenya anwe bene na bene.” Byambo bya kuba’mba “saka mwitekenya” byaamba pa kyambo kya Kingiliki kilumbulula kukooka muchima. Buku umo waamba kuba’mba bena Kilishitu bamwesha kino kyubilo kupichila mu “kulekelako mambo boba baji na byubilo bibazhingijisha.” Byambo bya kuba’mba “anweba bene na bene” ko kuba’mba kwilekelako mambo kya kine kine. Kino kibena kulumbulula kuba’mba umvwe twavuluka kuba’mba tuji na byubilo byakonsha kuzhingijisha bakwetu kechi tukaswisha bintu byo twashikwa biji mu bakwetu konauna mutende ye tuji nanji ne. Ibyepi umvwe bakwetu betulenga mambo?

“Kwilekelako mambo umvwe umo uji na mambo na mukwabo.” Kwesakana na shayuka umo, kyambo kya Kingiliki kyatuntululwa kuba ‘mba “kwilekelako mambo” “kechi kyambo kyo bengijisha inge babena kwamba pa kulekelako mambo ne, bino ke kyambo kyo bengijisha pa kulekelako mambo kya kine kine.” Buku mukwabo waamba’mba kino kyambo kyakonsha ne kulumbulula “kupana kintu kileta lusekelo, kyawama, ne kumwenamo.” Tumwesha lusa kupichila mu kulekelako muntu mambo kufuma panshi ya muchima nangwatu “umvwe umo uji na mambo na mukwabo.” Mambo ka o twafwainwa kwilekelako mambo? Mambo ne atweba twafwainwa kukeba kwitulekelako mambo ku bo tulenga mambo.

“Byonkatu Yehoba byo emulekejileko mambo, ne anweba byo byo mwafwainwa kubanga.” Kino kyo kine kintu kitulengela kulekelako bakwetu mambo: Mambo Yehoba witulekelako mambo. (Mika 7:18) Akilangulukai pa lusa lukatampe lwa Yehoba lo amwesha ku bandengamambo balapila. Yehoba wapusanako ne atweba mambo kechi ulenga mambo ne. Yehoba ulekelako bandengamambo nangwa kyakuba wayuka kuba’mba kechi bakamubilapo kintu kya uno mutundu ne. Yehoba ye wakumwenako wawama mu kulekelako mambo bandengamambo.

Lusa lwa Yehoba lwitulengela kufwenya kwipi ne aye ne kukeba kumulondela. (Efisesa 4:32–5:1) Twakonsha kwishikisha amba, ‘Byo kiji kuba’mba Yehoba ummwesha lusa kupichila mu kundekelako mambo, nakonsha kubula kulekelako byepi mukwetu ndengamambo walapila kya kine kine kwi amiwa?’—Luka 17:3, 4.

KUtanga BAibolo mu October

Ngalatiya 1-6; Efisesa 1-6; Filipai 1-4; Kolose 1-4; 1 Tesalonika 1-5; 2 Tesalonika 1-3; 1 Timoti 1-6–2 Timoti 1-4

[Mabulañano pa peja 11]

Yehoba ye yenkatu ulekela kya kine bandengamambo