BAIBOLO UPIMPULA BWIKALO BWA BANTU
“Bantu Bavula Banshikilwe”
Byashimikizha ba Waldo Moya
MWAKA WA KUSEMWA: 1978
KYALO: CHILE
MWAPITA BWIKALO BWABO: WAKANWA
MWAPITA BWIKALO BWABO: Nakomejile mu Santiago muzhi mukatampe uji mu kyalo kya Chile mu kimasamasa mwavujile bizhima, mabumba a bantu babula kumvwa ne bumbanzhi. Byo nafikizhe myaka itanu, batata bebepayile. Panyuma ya bino, bamama baikalanga na mwanamulume wakanamine bingi. Javula witupumanga, kabiji ne lunotu nkivuluka byo twamanamanga.
Byo nakomene, najinga bingi na kanwa. Natelekanga ku nyimbo ya kyongo, kutoma bingi, kabiji pa bimye bimo naingijishanga bizhima. Javula natanwanga mu malwañano a mu mukwakwa na bantu bapoteshanga bizhima mambo bakebanga kungipaya. Juba jimo, jibumba ja malwañano ja bantu banshikilwe baobwele mwanamulume umo kuba’mba angipaye, bino wakozhezhetu pacheche ne kunyema nanyema. Kimye kikwabo, jibumba japoteshanga bizhima bakebelenga kungipaya na buta.
Mu mwaka wa 1996, natemenwe mwanamukazhi umo wa jizhina ja Carolina kabiji mu mwaka wa 1998, na musongwele. Panyuma ya kusema mwanetu mubeji wamulume, naumvwine moyo mambo najinga bingi na kanwa kabiji nachiinenga kuba’mba nkekelatu na kanwa nobe batata bashinjile ne kumanamika kisemi kyami. Nayile ku kifulo ko bakwasha bantu baji na bino byubilo. Nangwa kya kuba bampeleko muchi, bino kechi wankwashishe ne. Nazhingilangatu ne pa tubintu tucheche. Pa kuba’mba nekileke kumanamika kisemi kyami, nakebelenga kwiipaya. Bino kechi neyipaile ne.
Pa myaka yavula kechi naitabijile mwi Lesa ne, bino nakebeshe kwitabila mwi Lesa. Natendekele kuya ku bupopweshi bwa evangelical. Pa kimye kimotu, mukazhami wafunjilenga Baibolo na Bakamonyi ba kwa Yehoba. Nashikilwe bingi Bakamonyi kabiji naambanga bintu byatama bingi pe abo. Bino bakumbulanga bingi bulongo, byo nabujilenga ne kuketekela ne.
Juba jimo, Carolina wañambijile kutanga pa Salamo 83:18 mu Baibolo wami. Kino kyepelo kyaamba kuba’mba jizhina ja Lesa Yehoba. Mu bupopweshi mo nayanga twafundangatu pe lesa bino kechi pe Yehoba ne. Ku ntendekelo ya mwaka wa 2000, natendekele kufunda Baibolo na Bakamonyi.
BAIBOLO BYO APIMPWILE BWIKALO BWAMI: Byo natwajijile na kufunda, naumvwine bingi bulongo pa kuyuka kuba’mba Yehoba wa lusa kabiji ulekelako mambo. Kyakumwenako, pa Kulupuka 34:6, 7 Baibolo waamba kuba’mba Yehoba ke “Lesa wa lusa ne wa bibusa, ubanda kuzhingila, wayula na butemwe bubula kwaluka ne bukishinka, umwesha butemwe bubula kwaluka ku biumbi bya bantu, ne kulekela bantu bumbulwakoloka bwabo ne mizhilulwila yabo ne bubi bwabo.”
Bino kechi kyapelele kutendeka kulondela bintu byo nafunjile ne. Nashiinwe kuba’mba kechi nkayuka ne bya kuba na bukaji bwami ne. Inge nazhingila, Carolina wantekeneshanga. Waambanga amba Yehoba wayuka byo mbena kwibikako kuleka bukaji. Wantundaikainga bingi kabiji kino kyandengejile kutwajijila kutokesha Yehoba ku muchima nangwa naumvwanga nobe nalengululwa.
Juba jimo, bafunjishanga Baibolo ba Alejandro, bañambijile kutanga Ngalatiya 5:22, 23. Kino kinembelo kyaamba pa bipangwa bya mupashi nabiji “butemwe, lusekelo, mutende, kubula kuzhingila bukiji, lusa, buwame, lwitabilo, kukoka muchima ne kwikanya.” Ba Alejandro baambile kuba’mba pa kuba’mba ngikale na bino bipangwa, nafwainwa kuketekela mwi Lesa ne mupashi wazhila wanji, kechi mu bulume bwami ne. Kino kishinka kyandengejile kupimpula bwikalo bwami.
Pa kupitapo moba, nashinkilwe ku kushonkena kwa Bakamonyi ba kwa Yehoba. Mutende, butooto ne kupwañana kwajingako kwandengejile kushiinwa kuba’mba natana bupopweshi bwa kine. (Yoano 13:34, 35) Nabatizhiwe mu February 2001.
BYO NAMWENAMO: Najinga na kanwa kala, pano ne wa mutende na mambo a kuba Yehoba wapimpula bwikalo bwami. Ñumvwa nobe Yehoba wamfumya mu makatazho o najinga nao. Bantu bavula banshikilwe, bino kechi ne bapamo mambo ne. Luno ne yowa bingi kwingijila Yehoba pamo na baana bami babiji babalume ne mukazhami.
Balunda nami ba kala ne balongo bami bakumya bingi pa byo napimpula byubilo byami. Kino kyalengela bavula kufunda bukine bwa mu Baibolo. Ne amiwa nakwashako bantu bakwabo kuyuka Yehoba. Kindetela bingi lusekelo pa kumona bukine bwa mu Baibolo byo bwalula bwikalo bwabo nabo.
[Mabulañano pa peja 13]
Najinga bingi na lusekelo pa kuyuka kuba’mba Yehoba ke Lesa wa lusa kabiji ulekelako mambo
[Kipikichala pa peja 13]
Ñumvwa bingi bulongo kufunjishako bakwetu bintu byo nafunda
[Kipikichala pa peja 13]
Tubena kwingijila Yehoba pamo na kisemi kyami