BYA KUPWISHA LUPATO

4 | Shindai Lupato Na Bukwasho Bwa Lesa

Lufunjisho lwa mu Baibolo:

“Bipangwa bya mupashi ke butemwe, lusekelo, mutende, kutekanya, lusa, buwame, lwitabilo, kukooka muchima ne kwikanya.”—NGALATIYA 5:22, 23.

Byo Kilumbulula:

Twakonsha kushinda lupato na bukwasho bwa Lesa. Mupashi wanji wazhila wakonsha kwitukwasha kwikala na byubilo byo twakonsha kubula kwikala nabyo atweba bene. Onkao mambo, twafwainwa kuketekela mu bukwasho bupana Lesa pa kuba’mba tushinde lupato, kechi kuketekela mu bulume bwetu ne. Umvwe twauba bino, tukamba byonka byaambile mutumwa Paulo wanembele’mba: “Mambo bintu byonse nji na ngovu ya kwibyuba na mambo a yewa umpa bulume.” (Filipai 4:13) Kya kine, tukakonsha kwamba’mba: “Bukwasho bwami bufuma kwi Yehoba.”—Salamo 121:2.

Byo Mwakonsha Kuba:

“Najinga na kanwa kala, pano ne wa mutende na mambo a kuba Yehoba wapimpula bwikalo bwami.”—BA WALDO

Lombai kwi Yehoba kuba’mba emupe mupashi wanji wazhila. (Luka 11:13) Mulombai kuba’mba emukwashe kwikala na byubilo byawama. Fundai byaamba Baibolo pa byubilo byakonsha kwimukwasha kushinda lupato, nabiji butemwe, mutende, kutekanya, ne kwikanya. Monaingapo mashinda mo mwakonsha kumweshesha bino byubilo mu bwikalo bwenu. Kabiji pwanañanainga na bantu bebikako kwikala na bino byubilo. Bantu ba uno mutundu bakonsha kwitukwasha “kwitemwa atwe bene na bene ne kuba mingilo yawama.”—Bahebelu 10:24.

Jishimikila ja Bwikalo—BA WALDO

Bashinjile Bukapondo ne Lupato

Nkomeno ya ba Waldo kechi yawamine ne, kabiji ibalengejile kwikala na lupato. Bashimikizhe’mba: “Javula natanwanga mu malwañano a mu mukwakwa na bantu bapoteshanga bizhima . . . Juba jimo, jibumba ja malwañano ja bantu banshikilwe baobwele mwanamulume umo kuba’mba angipaye, bino wakozhezhetu pacheche ne kunyema nanyema.”

Ba Waldo kechi batemenwe kimye bakazhi babo kyo batendekele kufunda Baibolo na Bakamonyi ba kwa Yehoba ne. Baambile’mba: “Nashikilwe bingi Bakamonyi kabiji naambanga bintu byatama bingi pe abo. Bino bakumbulanga bingi bulongo.”

Mu kuya kwa moba, ba Waldo nabo batendekele kufunda Baibolo. Baambile’mba: “Kechi kyapelele kutendeka kulondela bintu byo nafunjile ne. Nashiinwe kuba’mba kechi nkayuka ne bya kuba na bukaji bwami ne.” Pano bino, kuji kintu kimo kyo bafunjile mu Baibolo kibalengejile kupimpula bwikalo bwabo.

Ba Waldo balumbulwile’mba: “Juba jimo, bamfunjishanga Baibolo ba Alejandro, bañambijile kutanga Ngalatiya 5:22, 23. . . . Ba Alejandro baambile kuba’mba pa kuba’mba ngikale na bino bipangwa, nafwainwa kuketekela mwi Lesa ne mupashi wanji wazhila, kechi mu bulume bwami ne. Kino kishinka kyandengejile kupimpula bwikalo bwami.”

Kuketekela mwi Lesa kwakwashishe ba Waldo kushinda lupato mu bwikalo bwabo. Baambile’mba: “Balunda nami ba kala ne balongo bami bakumya bingi pa byo napimpula byubilo byami.” Banungilepo’mba: “Najinga na kanwa kala, pano ne wa mutende na mambo a kuba Yehoba wapimpula bwikalo bwami.”