MEPUZHO A MU BAIBOLO A KUMBULWA

Mambo ka Kilishitu oa kabwelela?

Yesu Kilishitu saka akyangye kuya mwiulu mu 33 C.E., walayile kuba’mba ukabwela. Wiesakenye ku mwana wa ku bufumu wayile pa myaka yavula ne pa kubwela bamupele bulume bwa kwikala mfumu. Ene mambo Yesu o akabwelela ke kuleta kafulumende wawama ku bantu.—Tangai Luka 19:11, 12.

Kilishitu ukabwela na mubiji wa mutundu ka? Wasangwilwe kwikala kilengwa kya mupashi. (1 Petelo 3:18) Wayile mwiulu ne kwikala ku kuboko kwa kilujo kwa Lesa. (Salamo 110:1) Pa kupitapo kimye, Yesu wamwekele kwi Yehoba Lesa, aye “Wa-kala-kene,” awo wapeele Yesu bulume bwa kulama bantu. Onkao mambo, Yesu ukabwela nobe Mfumu ubula kumweka kechi mu bumuntu ne.—Tangai Danyela 7:13, 14.

Yesu ukoba ka umvwe wabwela?

Yesu inge wabwela nobe kilengwa kya mupashi pamo ne bamalaika banji, ukeya na kuchibila bantu mambo. Ukonauna bantu batama ne kupana bumi bwa myaka ne myaka ku boba baketekela mu Mfumu.—Tangai Mateo 25:31-33, 46.

Kimye Yesu kyo akalamanga nobe Mfumu ukalula ino ntanda ke Paladisa. Ukasangula bafu kuba’mba bakekale na bumi pano pa ntanda.—Tangai Luka 23:42, 43.

Umvwe mukeba kuyukilapo byavula, monai mapa 73-85 mu uno buku, Nanchi Baibolo Kine Ufunjisha’mba ka?, wanembwa na Bakamonyi ba kwa Yehoba

Mwakonsha ne kukopolola pa www.jw.org

[Kipikichala pa peja 16]

Yesu ukaleta kafulumende wawama ku bantu