Ñanyi Mwingilo Wingila Banabakazhi pa Kufikizha Byafuukula Yehoba?

1, 2. (a) Ñanyi bupe Lesa bo apele Adama? (b) Mambo ka Lesa kyo apelejile Adama mwanamukazhi? (Monai kipikichala kitanshi.)

PAJI KINTU kyalengejile’mba Yehoba alenge ntanda. Wiilengele kuba’mba, ke ya “kwikalapo bilengwa byanji.” (Isa. 45:18) Muntu mutanshi ye alengele wajinga Adama, wajinga walumbuluka, kabiji Lesa wamupele mwa kwikala mwawama bingi ko kuba’mba mu bujimi bwa Edena. Adama waumvwanga bingi bulongo pa kumona bichi, tukola twapichilenga mema, ne banyama byo bakayanga! Pano bino, kwajinga kintu kimo kyanema kyo abujile kwikala nakyo. Yehoba wamwesheshe kino kintu mu byambo byo ambile’mba: “Kechi kyawama muntu kwikala bunke ne; nkamulengela nkwasho wamufwainwa.” Kepo Lesa amulengejile Adama kulaala tulo tukatampe, kabiji byo alaajile wamwangachile “lubavu . . . ye aalwile ke mwanamukazhi.” Adama byo abukile, waumvwine bingi bulongo ne kwamba’mba: “Pano uno kyo kikupa kya ku bikupa byami, kabiji ye mubiji wa ku mubiji wami; kabiji ukatelwa’mba: Mwanamukazhi, mambo bamwangata mu mwanamulume.”—Nte. 2:18-23.

² Mwanamukazhi wajinga bupe Lesa bo apele Adama, mambo wajinga nkwasho walumbuluka kwi aye. Kabiji wafwainwe ne kutatula kusema baana. Onkao mambo, “Adama wamutumbile mukazhanji jizhina amba: Evwa, mambo wajinga inabo bonse bomi.” (Nte. 3:20) Buno ke bupe bwa kukumya Lesa bo apele bamulume ne mukazhi batanshi! Bano bamulume ne mukazhi bajinga na bulume bwa kusema baana balumbuluka. Kino inge kyalengejile ino ntanda kwikala ke paladisa mwafwainwe kuyula bantu balumbuluka ne kwikala na bunkambo pa bilengwa byonse.—Nte. 1:27, 28.

3. (a) Ba Adama ne Evwa bafwainwe kuba ka pa kuba’mba Lesa ebapeshe, bino ki ka kyamwekele? (b) Ñanyi mepuzho o tusakwisambapo?

³ Ba Adama ne Evwa bafwainwe kukookela Yehoba ne kuyuka bukalama bwanji. Inge baubile bino, inge baikele balunda ne Lesa. (Nte. 2:15-17) Bino byobyo bafwainwe kuba pa kuba’mba bafikizhe byafuukwile Lesa. Kyataminekotu ke kya kuba’mba, bebajimbaikile ku “muloolo wa kala,” Satana ne kumulenga mambo Lesa. (Lum. 12:9; Nte. 3:1-6) Buno bunsatuki bwakunza byepi banabakazhi? Ñanyi bintu byaubile banabakazhi baakamwanga Lesa mu moba a kala? Kabiji mambo ka banabakazhi ba mu ano moba o bebatongwela’mba “jibumba jikatampe”?—Sala. 68:11.

BYAFUMA MU BUNDENGAMAMBO

4. Ñanyi walengele mambo pa bantu batanshi?

⁴ Byo bamwipwizhe pa byo aubile, Adama wikangaizhe ne kwamba’mba: “Awa mwanamukazhi yenka ye mwampele, ye wajikumpa bipangwa bya ku kyokya kichi, ne kuja naja.” (Nte. 3:12) Adama kechi waswile mambo anji ne, bino wapelengamo mambo mwanamukazhi ne Mpanyi wa butemwe. Adama ne Evwa balengele mambo, pano bino buno bundengamambo bwashinkamine bingi Adama. O ene mambo, mutumwa Paulo kyo anembejile’mba, “bundengamambo bwatwelele pano pa ntanda mu muntu umo [Adama], ne lufu nalo lwaishijile mu bundengamambo.”—Loma 5:12.

5. Ñanyi bintu byafuma mu bukalama bwa bantu?

⁵ Bantu batanshi bebalengejile kulanguluka’mba Yehoba kechi wafwainwa kwikala Kalama wabo ne. Kino kyaletele bwipuzho pa bumfumu bwa Lesa bwa kuba’mba: Ñanyi uji na luusa lwa kulama? Pa kuba’mba mukumbu wa buno bwipuzho bukumbulwe, Lesa waswishishe bantu kwilama abo bene. Wayukile kuba’mba bintu bikafumamo bikamwesha’mba bantu kechi bakonsha kwilama abo ne. Myaka yavula yapitapo, buno bukalama bwa bantu bwaleta bya malwa byavula bingi ku bantu. Myaka 100 yapitapo, bantu nobe mamilyonyi 100 bo bafwa mu makondo kabiji kubikapotu ne mamilyonyi a bantu babula ne mambo banabalume, banabakazhi ne baana. Onkao mambo, bino bishinka bibena kumweshatu patoka’mba, “aye mwine muntu kechi uji na bulume bwa kwenda monka mwafwainwa ne.” (Yele. 10:23) Kuyuka kino, kwitulengela kunemeka bingi Bukalama bwa Yehoba.—Tangai Byambo bya Mana 3:5, 6.

6. Mu byalo byavula, banabakazhi bebamona byepi?

⁶ Bonse banabalume ne banabakazhi babena kupita mu bintu byatama bya mu ino ntanda iji mu bulume bwa kwa Satana. (Sapwi. 8:9; 1 Yoa. 5:19) Nangwa byonkabyo, banabakazhi bebamanyika bingi. Kuzhokoloka ntanda yonse, banabakazhi bavula bebamanyika ku bamwatawabo nangwa ku basambe babo. Mu mapunzha amo, banemeka bingi baana ba balume kukila baana ba bakazhi, mambo balanguluka’mba baana ba balume inge bakoma bakalamanga bansemi babo ne bankambo yabo ne kutwajijila kwingijisha jizhina ja kisemi. Mu byalo bimo, baana ba bakazhi kechi bebanemeka ne, banabakazhi inge baimita kabiji bayuka kuba’mba baimita mwana wa mukazhi bafumya mavumo, bino inge bayuka’mba baimita mwana wa mulume kechi bafumya mavumo ne.

7. Ñanyi ntatwilo yawama Lesa yo apele mwanamulume ne mwanamukazhi?

⁷ Lesa kechi umvwa bulongo banabakazhi byo bebamanyika ne. Yehoba wanemeka bingi banabakazhi. Kino kyamwekejile mu byo alengele mwanamukazhi mutanshi. Wajinga walumbuluka kabiji wajinga nkwasho wawama kwi Adama kechi muzha ne. O ene mambo pa kupwisha kulenga bintu pa moba atanu na jimo, Lesa “wibimwene byonsetu byo alengele, kabiji byonsetu byaji byawamishatu.” (Nte. 1:31) Kya kine bintu “byonsetu” Yehoba byo alengele byajinga “byawamishatu.” Ba Adama ne Evwa bajinga na ntatwilo yawama ya bwikalo.

BANABAKAZHI BO BATUNDAIKANGA KWI YEHOBA

8. (a) Lumbululai byubilo bya bantu byo biji. (b) Mwapita bwikalo bwa bantu, bañanyi Lesa bo amwesha lusa?

⁸ Kufumatu kimye bantu batanshi kyo basatukile mu bujimi bwa Edena, banabalume bamanyika bingi banabakazhi. Kabiji pa myaka yavula yapitapo, banabakazhi bakizhamo bingi kwi bamanyika. Baibolo waambijile jimo amba byubilo byatama bikavula bingi mu “moba akapelako.” Byubilo byatama bibena kuba bantu mwaya ntanda bibena kumwesha kuba’mba tubena kwikala mu “bimye byakatazha.” (2 Timo. 3:1-5) Nangwa byonkabyo, mwapita bwikalo bwa bantu “Nkambo Lesa” waubila lusa banabalume ne banabakazhi baketekela mwi aye, bakookela mizhilo yanji, ne kukookela Bukalama bwanji.—Tangai Salamo 71:5.

9. Bantu banga bapulukile Muyulo, kabiji ki ka kyalengejile’mba bapuluke?

⁹ Mu moba ajingako Nowa, Yehoba waonawine ntanda mwajinga byubilo byatama na Muyulo wa mema, bantutu bacheche bo bapulukile. Inge balongo banji bajingako pa kyo kya kimye, nabo bafwile na muyulo wa mema. (Nte. 5:30) Pano bino, banabakazhi bana ne banabalume bana bobapulukile Muyulo. Bapulukile bajinga Nowa, mukazhanji, baana banji basatu, ne bakazhi babo. Bapulukile mambo bajinga na moyo wa kwakamwa Lesa ne kuba kyaswa muchima wanji. Mabilyonyi a bantu bajiko lelo jino bafuma ku bantu batanu na basatu Yehoba bo atemenwe bingi.—Nte. 7:7; 1 Pe. 3:20.

10. Mambo ka bakazhi ba bashakulu baakamwanga Lesa kyo bebakwashishenga kwi Yehoba ne kwibazhikijila?

¹⁰ Byo papichile myaka, bakazhi ba bashakulu ba kishinka bajinga na moyo wa kwakamwa Lesa, wibakwashanga ne kwi bazhikijila. Kechi bejizhañenyenga na mambo a bwikalo bwabo ne, kabiji Lesa wibapesheshe. (Yuda 16) Pa bano banabakazhi pajinga ne Sala, byo bebambijile kusha nzubo yawama ne bwikalo bwawama mu Ula ne kuya na kwikala mu matente, kechi wijizhañenye ne. Bino ‘Sala wakookejilenga Abalahama ne kumwita amba nkambo.’ (1 Pe. 3:6) Akilangulukai pe Libeka, wajinga bupe bwafumine kwi Yehoba bo amupele Izaka ne kwikala mukazhanji wawama bingi. Baibolo waamba’mba Izaka ‘wamutemenwe, byonkabyo Izaka bamutekeneshe ku lufu lwa inanji.’ (Nte. 24:67) Mu ano moba twatokwa bingi kwikala na banabakazhi ba kishinka baji byonka byajinga Sala ne Libeka.

11. Nga banabakazhi basemeshi Bahebelu, bachinchikile byepi?

¹¹ Pa myaka yo bajinga mu buzha mu Ijipita, bena Isalela batendekele kuvula bingi. Felo waambile’mba, baana ba balume ba Bahebelu bebepayenga pa kusemwa. Nangwa byonkabyo, bano banabakazhi Bahebelu basemeshi ba Shifula ne Puwa, kechi baswile kuba bibabujile Felo kuba’mba bepayenga baana ba balume ba bena Isalela ne. Na mambo a kuba’mba baakamwanga Yehoba, bano basemeshi bachinchikile ne kukana bibabujile Felo. Byo papichile kimye Yehoba wibapele ba mu mazubo abo.—Lupu. 1:15-21.

12. Ñanyi bintu byawama byaubile Debola ne Yaela?

¹² Mu moba ajingako ba mitonyi mu bena Isalela, Lesa watongwele Debola kwikala ngauzhi. Watundaikile Balaka wajinga Mutonyi ne kukwasha bena Isalela kwibafumya mu lumanamo, kabiji waambijile jimo kuba’mba munema wa kushinda bena Kenana kechi ukaya kwi Balaka. Bino Lesa ukoba bino kupichila mu kupana nzhita ya bena Kenana yatangijilwanga ne Sisela “mu kuboko kwa mwanamukazhi.” Abino byobyo kyamwekele kimye mwanamukazhi wa jizhina ja Yaela wabujile mwina Isalela byo a mwipayile.—Mito. 4:4-9, 17-22.

13. Baibolo waambapo amba ka pe Abigaila?

¹³ Kabiji akilangulukai pa mwanamukazhi wa kishinka aye Abigaila wajingako myaka 1,100 Kilishitu saka akyangye kusemwa. Wajinga bingi na milangwe, pano bino mwatawanji Nabala wakanamine bingi kabiji kechi wajinga na maana ne. (1 Sam. 25:2, 3, 25) Na mambo a kuba’mba Davida wazhikijile banabalume ba kwa Nabala, Davida watumine bantu kuya na kulomba kajo ne bintutu bikwabo. Bino Nabala ‘wibakajipijile’ kabiji kechi wibapelepotu nangwa kintu ne. Kino kyazhingijishe bingi Davida ne kufuukula kuya na kwipaya Nabala ne bantu banji. Abigaila byo aumvwine kino, watwajile kajo ne bya kutoma kwi Davida ne bantu banji, kino kyalengejile kubula kumwipaya Nabala. (1 Sam. 25:8-18) Davida waambijile Abigaila amba: “Atotwe Yehoba, Lesa wa Isalela, wajikukutuma ja lelo na kuntundaila.” (1 Sam. 25:32) Nabala byo afwile Davida wasongwele Abigaila.—1 Sam. 25:37-42.

14. Byonka byajinga baana ba bakazhi ba kwa Shaluma, ñanyi mwingilo ubena kwingila banabakazhi bena Kilishitu lelo jino?

¹⁴ Banabalume bavula, banabakazhi ne baana, bafwile kimye nzhita ya bena Babilona kyo yaonawine Yelusalema ne nzubo ya Lesa mu mwaka wa 607 Kilishitu saka akyangye kusemwa. Nsakwa ya uno muzhi beishimukulwile mu mwaka wa 455 Kilishitu saka akyangye kusemwa. Nehemiya ye watangijilenga uno mwingilo. Pa bantu bebakwashishe kushimukulula nsakwa pajinga ne baana ba bakazhi ba kwa Shaluma wajinga mwana wa mfumu ku lubaji lumo lwa nkambi ya mu Yelusalema. (Ne. 3:12) Bepaine ne kwingilako uno mwingilo. Kino kituvululamo banabakazhi bena Kilishitu bengilako mwingilo wa buntungi kuzhokoloka ntanda yonse.

BANABAKAZHI BAJINGA NA MOYO WAKWAKAMWA LESA MU MYAKA KITOTA KITANSHI

15. Ñanyi mwingilo wawama Maliya ye bamupele?

¹⁵ Mu myaka kitota kitanshi, Yehoba wapesheshe banabakazhi bamo kupichila mu kwibapa mingilo yanema bingi. Umo pa bano banabakazhi ke Maliya wajinga kisungu. Saka bamwipanguzha kala kwi Yosefwa, Maliya waimichile jimi mu jishinda ja kukumya na mupashi wazhila. Mambo ka Lesa o asajijile uno mwanamukazhi kwikala inanja Yesu? Mambo wajinga na byubilo byawama byakebewenga pa kuba’mba akomeshe bulongo mwana walumbuluka. Wajinga bingi na jishuko ja kwikala inanja Yesu, muntu waya nkuwa pano pa ntanda ponse.—Mat. 1:18-25.

16. Ambaipo pa byaubile Yesu bimwesha byo amonanga banabakazhi.

¹⁶ Yesu waubilanga bingi lusa banabakazhi. Akilangulukai pa byo aubile na mwanamukazhi wajinga na kikola kya mukunko myaka 12. Waishile kunyuma ya kwa Yesu mu jibumba ja bantu ne kukwata ku kivwalo kyanji. Yesu kechi wamukainye ne, wa mubijile lusa ne kwamba’mba: “Mwanami, lwitabilo lobe lwa kulengela kubukwa. Yanga mu mutende, kabiji kikola kyobe kyatama kipwe.”—Mako 5:25-34.

17. Ñanyi kya kukumya kyamwekele pa Pentekosita mu mwaka wa 33?

¹⁷ Banabakazhi bamo bajinga baana ba bwanga ba kwa Yesu, bamukwashishenga mu bintu bimo ne batumwa banji. (Luka 8:1-3) Kabiji pa Pentekosita mu mwaka wa 33 banabalume ne banabakazhi 120 batambwile mupashi wa Lesa mu jishinda ja kukumya. (Tangai Byubilo 2:1-4.) Yehoba waambijile jimo kuba’mba: “Nketulwila Mupashi wami pa bantu bonse; ne bana benu ba balume ne ba bakazhi bakaulanga na Mupashi . . . Nketulwila mupashi wami pa ba mwingilo ba balume ne ba bakazhi.” (Yoe. 2:28, 29) Lesa wafumishepo mupashi wanji pa bena Isalela basendukile mu lwitabilo ne kutendeka kutundaika banabakazhi ne banabalume baikele “bena Isalela ba Lesa.” (Nga. 3:28; 6:15, 16) Pa banabakazhi bena Kilishitu bajingako mu kitota kitanshi baingijilenga mwingilo wa kusapwila, pajinga ne baana babakazhi bana ba kwa Filipa wajinga musapwishi.—Byu. 21:8, 9.

“JIBUMBA JAKATAMPE” JA BANABAKAZHI

18, 19. (a) Ñanyi mwingilo Yehoba ye apa banabalume ne banabakazhi? (b) Nyimbi wa salamo waambilepo amba ka pa banabakazhi basapwila mambo awama?

¹⁸ Ku mpelo ya mwaka wa 1800, banabalume bachechetu ne banabakazhi bajinga bingi na kizaku mu mpopwelo ya kine. Bajinga batanshi batendekele mwingilo wa kusapwila pa byambo byaamba pe Yesu. Bafikizhe bungauzhi bwa kuba’mba: “Kabiji ano mambo awama a Bufumu akasapwilwa pano pa ntanda ponse kuba amba ba mu bisaka byonse bya bantu bakeomvwe, apa bino mpelo ikafike.”—Mat. 24:14.

¹⁹ Jibumba jicheche ja Bafundanga Baibolo, lelo jino jabaya bingi, mambo Bakamonyi ba kwa Yehoba luno baji 7,900,000. Bantu kukila pa 11,300,000 babena kumwesha lusekelo lwa kukeba kufunda Baibolo ne mu mwingilo wetu byo batanwako ku Kivuluko kya lufu lwa kwa Yesu pa mwaka pa mwaka. Mu byalo byavula, bantu bavula batainweko ku kivuluko bajinga banabakazhi. Pa baji mu mwingilo wa kimye kyonse 1,000,000 bataya mbila ya Bufumu ntanda yonse, bavula ke banabakazhi. Lesa wapana mwingilo wanema bingi ku banabakazhi ba kishinka wa kwingila. Nyimbi wa salamo waambilepo amba: ‘Nkambo ukambizha: Banabakazhi bamba mambo jo jibumba jikatampe.’—Sala. 68:11.

BANABAKAZHI BAKAMWA LESA BAKATAMBULA MFWETO

20. Ñanyi mitwe yo twafwainwa kwisambangapo pa Kupopwela kwa kisemi?

²⁰ Kechi twakonsha kwambatu pa bonse banabakazhi ba kishinka banembwa mu Baibolo ne. Pana bino, atweba bonse twakonsha kutanga mashimikila abo mu Baibolo ne mu bibaba byanembwa mu mabuku etu. Twakonsha kutanga ne kulangulukapo pa bukishinka bwa kwa Luta. (Luta 1:16, 17) Kutanga buku wa mu Baibolo wa kwa Eshita ne bibaba byaamba pe aye kwakonsha kukosesha lwitabilo lwetu. Inge twatanchika bulongo ne kutendeka kufunda pa bano banabakazhi pa Kupopwela kwetu kwa Kisemi tukamwenemo bingi. Inge twikalatu bunke, twafwainwa kufundanga pa ino mitwe pa lufunjisho lwa pa bunke.

21. Banabakazhi bakamwa Lesa, bamwesha byepi bukishinka kwi Yehoba mu kimye kya lumanamo?

²¹ Yehoba upesha banabakazhi ba kishinka bengila mwingilo wa kusapwila ne kwibazhikijila mu bimye bya malwa. Mu kimye kyajingako nkondo mu kyalo kya German ba mu kipanyi kya Nazi ne byalo bimo byatangijilwanga na bashilikale, bayanjishanga bingi banabakazhi ba kishinka baakamwanga Lesa bavula, kabiji bamo bebepayile na mambo kukookela Lesa. (Byu. 5:29) Byonkatu byo kyajinga ne kala, banyenga yetu ne bapopweshi bakwetu banemeka bumfumu bwa Lesa. Byobyo kyajinga ne ku bena Isalela ba kala, ne lelo jino Yehoba ukwata ku maboko abo a kilujo ne kwibambila’mba: “Kuba moyo ne, mambo amiwa nji nobe.”—Isa. 41:10-13.

22. Ñanyi bintu byawama byo tubena kutengela?

²² Katatakatu banabalume ne banabakazhi ba kishinka bakekale mu paladisa ne kukwasha mamilyonyi a bantu bakasangulwa ne kwibafunjisha bintu byawama Yehoba byo akobila bantu banji. Onkao mambo, nangwa twi banabalume nangwa banabakazhi, twayai atweba bonse tunemekenga mwingilo Lesa ye etupa ne ‘kumwingijila na muchima umotu.’—Zefwa. 3:9.