MEPUZHO A MU BAIBOLO AKUMBULWA

Nanchi bubi bufuma pi?

Bantu bakeba bingi kwikala mu mutende na bakwabo, kwikala ba kishinka ne kifyele. Mambo ka o kwaikela bukapondo, nshiji ne kukanama? Masawakya atama akumbanatu konse. Nanchi paji muntu ubena kulengela bantu kuba bintu byatama nyi?—Tangai 1 Yoano 5:19.

Nanchi Lesa walengele bantu kubanga bintu byatama nyi? Ine, Yehoba Lesa walengele bantu mu kipasha kyanji ne kwikala na butemwe bujipo ne Lesa. (Ntendekelo 1:27; Yoba 34:10) Nangwa byonkabyo, Lesa wapa bantu luusa lwa kwifuukwila. Bansemi betu batanshi byo baubile bintu byatama, bakaine kumwesha byubilo bya Lesa kabiji baikele ke bambulwa kulumbuluka. Kulenga mambo twikufunda kwi abo.—Tangai Mpitulukilo ya mu Mizhilo 32:4, 5.

Nanchi bantu bakatwajijilatu kuba bintu byatama nyi?

Lesa ubena kukeba’mba tubulenga kuba bintu byatama. (Byambo bya Maana 27:11) O ene mambo o abena kwitufunjisha bya kuchinuzhuka bintu byatama ne byo twafwainwa kwikala na lusekelo lwa kine. Pano bino, luno kechi twakonsha kwikala na butemwe bwalumbuluka bujipo ne Lesa ne.—Tangai Salamo 32:8.

Nangwa kya kuba bubi bwavula bingi, Lesa wibuswishatu pa kakimye kacheche pa kuba’mba bantu bonse bamone bintu byatama bifumamo. (2 Petelo 3:7-9) Katatakatu pano pa ntanda pakakumbane bantu baji na lusekelo kabiji bakookela Lesa.—Tangai Salamo 37:9-11.