Mambo ka o Twafwainwa Kupwila Pamo na Kupopwela Lesa?

1-3. (a) Bena Kilishitu bamwesha byepi amba bakebesha bingi kupwila pamo? (Monai kipikichala kitanshi.) (b) Tusakwisamba pa ka mu uno mutwe?

KIMYE Corinna kyo ajinga na myaka 17, bainanji bebakwachile ne kwibatwala ku kampu yajinga kwalepa ko bakengijilenga mingilo ya buzha. Pa kupitapo moba, Corinna naye bamutwajile ku Siberia kwalepa bingi kufuma ko aikalanga. Akwa, waingijilenga pa fwamu kabiji bamulaminenga nobe muzha. Bimye bimo bamukanjikizhanga kwingijila pangye mu mashika kwa kubula bivwalo byalumbuluka ne. Nangwa byonkabyo, Corinna ne nyenga mukwabo bebikileko kuba’mba bafume pa fwamu ne kuya na kupwila.

² Corinna waambile’mba: “Pa fwamu po twaingilanga twafuminepo mabanga ne kwenda makilomita 25 kuya kwa kukanjijila shitima. Shitima wanyamukile pa 2 koloko wa bufuku, ne kwenda maola 6 kufika po twaikijile, kabiji kufuma pa kiteshenyi twaendele makilomita 10 kufika pa kipwilo.” Corinna wasangalele bingi na mambo a kuba wayile na kupwila. Waambile’mba: “Pa kupwila, twafunjile Kyamba kya Usopa ne kwimba nyimbo ya Bufumu. Kuno kupwila kwitutundaikile bingi ne kukosesha lwitabilo lwetu.” Bano banyenga babiji babwelele ku fwamu panyuma ya moba asatu, bino mwina fwamu kechi wayukile ne kuba’mba bafuminepo ne.

³ Kufumatu ne kala, bantu ba Yehoba bakebesha bingi kupwila pamo na bakwabo. Kya kumwenako, bena Kilishitu batanshi bakebanga bingi kupwila pamo na kupopwela Yehoba ne kufunda pe aye. (Byubilo 2:42) Ne anwebatu mukebesha bingi kutaanwa ku kupwila. Bino kimo kimye, kyakonsha kwimukatazha kutaanwa ku kupwila, byonka byo kikatazha ku balongo ne banyenga bonse. Kampe mwingila kimye kyabaya ku nkito nangwa mwingila mingilo yavula nangwa mukooka bingi. Pano ki ka kiketukwasha kupwilanga kimye kyonse?^[1] (Monai byambo bikwabo.) Twakonsha kutundaika byepi bantu bo tufunjisha Baibolo ne bantutu bakwabo kutaanwa ku kupwila kimye kyonse? Uno mutwe usakulumbulula (1) byo tumwenamo, (2) byo tukwasha bakwetu, ne (3) byo tusangajika Yehoba, inge twataanwa ku kupwila.^[2]—Monai byambo bikwabo.

TUMWENAMO BINGI MU KUPWILA

4. Kupwila pamo kwitukwasha byepi kufunda pe Yehoba?

⁴ Kupwila kwitufunjisha. Kupwila konse kwitukwasha kufunjilapo byavula pe Yehoba. Kya kumwenako, katataka papo, bipwilo byavula byafunjilenga mu buku wa Fwenyai Kwipi ne Yehoba pa Lufunjisho lwa Baibolo lwa Kipwilo. Mwaumvwine byepi kimye kyo mwisambilenga pa byubilo bya Yehoba ne byo mwaumvwine balongo benu saka bamba byo batemwa Yehoba? Kino kyafwainwa kimulengejile kutemwa bingi Yehoba. Pa kupwila, tufunjilako byavula bya mu Baibolo kupichila mu kuteleka ku majashi, ku bimwesho, ne pa kutanga Baibolo. (Nehemiya 8:8) Langulukai ne pa bintu byavula byo tufunda kimye kyo tunengezha kutanga Baibolo kwa mulungu ne mulungu, ne pa kumvwa bakwetu saka bamba byo bafunjilako.

5. Kupwila kwimukwasha byepi kulondela byo mufunda mu Baibolo ne kuwamishako mwingilo wenu wa kusapwila?

⁵ Kupwila kwitufunjisha bya kwingijisha bintu byo tufunda mu Baibolo mu bwikalo bwetu. (1 Tesalonika 4:9, 10) Kya kumwenako, nanchi mwakifundapo bintu bimo mu Lufunjisho lwa Kyamba kya Usopa bimulengejile kukeba kwingijilako Yehoba pakatampe, kuwamishako milombelo yenu, nangwa kulekelako mambo mulongo nangwa nyenga nyi? Kupwila kwetu kwa mukachi ka mulungu kwakonsha kwitufunjisha bya kusapwila mambo awama ne bya kukwasha bantu kuyuka bukine bwa mu Baibolo.—Mateo 28:19, 20.

6. Kupwila kwitutundaika byepi ne kwitukwasha kukosa?

⁶ Kupwila kwitutundaika. Ntanda ya kwa Satana ikeba kukookesha lwitabilo lwetu, kwituletela bijikila ne kwitulefula. Pano bino, kupwila kwetu kwitutundaika ne kwitukosesha kutwajijila kwingijila Yehoba. (Tangai Byubilo 15:30-32.) Javula, tufunda pa bungauzhi bwa mu Baibolo byo bwafika. Kino kyakonsha kwitulengela kushiinwa’mba milaye ya Yehoba ya kulutwe ikafika. Balongo betu ne banyenga betutundaika bingi kimye kyo bamba majashi, inge babena kukumbulapo, ne kimye kyo bemba nyimbo ya kutota Yehoba na muchima yense. (1 Kolinda 14:26) Kabiji inge tubena kwisamba nabo saka tukyangye kutendeka kupwila ne panyuma ya kupwila, tutundaikwa bingi mambo tuyuka’mba tuji na balunda bavula betuta muchima.—1 Kolinda 16:17, 18.

7. Mambo ka o kyanemena kutaanwa ku kupwila?

⁷ Pa kupwila, mupashi wazhila wa Lesa witukwasha. Yesu wingijisha uno mupashi wazhila kutangijila bipwilo. Kabiji witubuula’mba ‘tumvwe bibena kwamba mupashi ku bipwilo.’ (Lumwekesho 2:7) Mupashi wazhila wakonsha kwitukwasha kushinda meseko ne kusapwila kwa kubula moyo. Kabiji wakonsha kwitukwasha kufuukula bintu bulongo. O ene mambo o twafwainwa kwibikilangako kutaanwa ku kupwila ne kutambula bukwasho bwa mupashi wazhila wa Lesa.

TUKWASHA BAKWETU PA KUPWILA

8. Bapopweshi bakwetu batundaikwa byepi inge betumona na kupwila, kukumbulapo, ne kwimba? (Monai ne kakitenguluzha ka kuba’mba “Bomvwako Bulongo Kimye Kyonse Panyuma ya Kupwila.”)

⁸ Kupwila kwitukwasha kumwesha balongo ne banyenga amba twibatemwa. Bavula mu bipwilo byetu babena kuchinchika makatazho akatampe. Mutumwa Paulo wanembele’mba: “Twayai twitenga muchima atwe bene na bene.” (Bahebelu 10:24, 25) Twakonsha kumwesha’mba twatemwa balongo betu kupichila mu kupwila pamo nabo ne kwitundaika atwe bene na bene. Inge twaya na kupwila, tumwesha balongo betu amba tukeba kwikala pamo nabo, kwisamba nabo, ne kukeba kuyuka inge baji bulongo nangwa ne. Kabiji inge baumvwa mikumbu yetu ne byo twimba na muchima yense, kibatundaika bingi.—Kolose 3:16.

9, 10. (a) Lumbululai byambo bya kwa Yesu biji pa Yoano 10:16 byo bitukwasha kuyuka ene mambo o kyanemena kupwila pamo na balongo betu. (b) Inge saka tutaanwa ku kupwila kimye kyonse, twakonsha kukwasha byepi muntu ye bakana ku kisemi kyanji?

⁹ Inge tubena kutaanwa ku kupwila, tukwasha kipwilo kukwatankena pamo. (Tangai Yoano 10:16.) Yesu wiesakenye aye mwine ku kafunga, ne baana banji ba bwanga ku mikooko. Langulukai pa kino: Inge mikooko ibiji iji pa kyulu, ikwabo ibiji iji mu kinkunenke, kabiji mukwabo umo ukajitu kungi, nanchi twakonsha kwamba’mba ino mikooko itanu ke jitanga jimo nyi? Ine, mambo jitanga jikala pamo ne kulondela kafunga. Mu jishinda jimotu, kechi twafwainwa kwipaatula ku balongo betu kupichila mu kubula kutaanwa ku kupwila ne. Twafwainwa kupwila pamo pa kuba’mba twikale “jitanga jimo” jibena kulondela “kafunga umo.”

¹⁰ Kupwila kwetu kwitukwasha kukwatankena pamo nobe kisemi ne kwitemwa atwe bene na bene. (Salamo 133:1) Bamo bo tupwila nabo bebakana ku ba mu kisemi kyabo, nabiji ku bansemi babo nangwa ku bakolojabo nangwa bankasabo. Bino Yesu walayile’mba ukebapa kisemi kikebatemwa ne kwibata muchima. (Mako 10:29, 30) Inge kemutaanwe ku kupwila kimye kyonse, mukekala nobe bansemi, nangwa bakolo nangwa bankasa ku bamo mu kipwilo. Inge twalanguluka pa kino, twibikishako kutaanwa ku kupwila konse.

TUSANGAJIKA YEHOBA

11. Kupwila kwitukwasha byepi kupa Yehoba bintu byamufwainwa?

¹¹ Kimye kyo tupwila, tupa Yehoba bintu byamufwainwa. Na mambo a kuba ye Mulenga wetu, twafwainwa kumusanchila, kumunemeka, ne kumutota. (Tangai Lumwekesho 7:12.) Twakonsha kuba bino pa kupwila kimye kyo tulomba kwi Yehoba, kumwimbila ne kwamba pe aye. Kine tuji na jishuko jawama bingi ja kupopwela Yehoba mulungu ne mulungu.

12. Yehoba umvwa byepi inge wamona byo tukookela mukambizho wanji wa kutaanwa ku kupwila?

¹² Yehoba ye witulengele, onkao mambo twafwainwa kumukookela. Witukambizha kupwila pamo, kikatakata byo tubena kunangijila ku mpelo. Onkao mambo, inge twakookela uno mukambizho, Yehoba usangalala. (1 Yoano 3:22) Umona byo tukebesha kupwila, kabiji usanta bingi pa byo twibikako kutaanwako.—Bahebelu 6:10.

13, 14. Tufwenya byepi kwipi ne Yehoba ne Yesu pa kupwila?

¹³ Inge twaya na kupwila, tumwesha Yehoba amba tukeba kufwenya kwipi ne aye ne Mwananji. Pa kupwila, tufunda Baibolo kabiji Yehoba witufunjisha byo twafwainwa kuba ne byo twafwainwa kwikala. (Isaya 30:20, 21) Nangwatu bantu babula kupopwela Yehoba inge baiya na kupwila, bamona amba Lesa ubena kwitutangijila. (1 Kolinda 14:23-25) Yehoba utangijila kupwila kwetu na mupashi wanji wazhila, kabiji byo tufunda bifuma kwi aye. Onkao mambo, inge twaya na kupwila, tuteleka ku bibena kwamba Yehoba, kumvwa butemwe bwanji bo etutemwa, ne kufwenya kwipi ne aye.

¹⁴ Yesu, Mutwe wa kipwilo waambile’mba: “Ponse paji babiji nangwa basatu bapwila mu jizhina jami, ne amiwa nji nabo.” (Mateo 18:20) Baibolo waamba ne kuba’mba Yesu “upitañana mukachi” ka bipwilo. (Lumwekesho 1:20–2:1) Kyamwekatu patoka amba Yehoba ne Yesu baji ne atweba kabiji betukosesha kimye kyo tupwila. Akilangulukaipotu, nanchi Yehoba umvwa byepi inge wamona’mba mubena kwibikako bingi kufwenya kwipi ne aye ne Mwananji?

15. Inge twaya na kupwila, tumwesha byepi kukookela Lesa?

¹⁵ Inge twaya na kupwila, tumwesha Yehoba amba tukeba kumukookela. Yehoba kechi witukanjikizha kuba byo akeba ne. (Isaya 43:23) Onkao mambo, inge twakookela mukambizho wanji wa kutaanwa ku kupwila, tumwesha amba twamutemwa kabiji twaswa kuba’mba ye uji na luusa lwa kwitubuula bya kuba. (Loma 6:17) Kya kumwenako, twakonsha kuba byepi inge bakulumpe pa nkito betukanjikizha kwingila kimye kyabaya kya kuba bimye bimo ketukankalwe ne kupwila? Nangwa inge kafulumende waamba’mba yense ye bakataana na kupopwela Yehoba bakamulipilisha mali, kumukasa, nangwa kumukambula kyatama. Nangwa apo kampe twakonsha kukebatu kubapo bintu bikwabo mu kifulo kya kuya na kupwila. Mu bino byonse, twafwainwa kwifuukwila bya kuba. (Byubilo 5:29) Bino kimye kyonse kyo tufuukulapo kukookela Yehoba, tumusangajika.—Byambo bya Maana 27:11.

TWAJIJILAI KUPWILA PAMO NA BALONGO BENU

16, 17. (a) Twayuka byepi amba bena Kilishitu batanshi banemekele bingi kupwila? (b) Mulongo George Gangas waumvwanga byepi pa kupwila kwa bwina Kilishitu?

¹⁶ Panyuma ya kupwila pamo pa Pentekosita mu mwaka wa 33, bena Kilishitu batwajijile kupwila pamo na kupopwela Yehoba. “Batwajijile kufunda ku batumwa, saka bapwanañana pamo.” (Byubilo 2:42) Kabiji nangwatu kimye kyo bebamanyikilenga ku kafulumende wa bena Loma ne ku bantangi ba bupopweshi bwa Bayudea, kechi balekele kupwila pamo ne. Nangwa kya kuba kyakatezhe, bino bebikangako bingi kutwajijila kupwila pamo.

¹⁷ Ne lelo jino, bakalume ba Yehoba batemwa bingi kupwila kabiji kwibaletela bingi lusekelo. Ba George Gangas, bajinga mu Jibumba Jitangijila pa myaka 22 baambile’mba: “Kupwila pamo na balongo kyo kintu kindetela bingi lusekelo kabiji kintundaika bingi. Natemwa kwikala mutanshi kufika pa Nzubo ya Bufumu, ne kupelako kufumapo inge kyakonsheka. Ñumvwa bingi bulongo inge mbena kwisamba na bantu ba Lesa. Inge nji na balongo, nkasuluka bingi kwikala na kino kisemi kyami, ko kuba’mba mu paladisa wa ku mupashi.” Banungilepo’mba: “Kintu kyo nkebesha na muchima wami yense ke kutaanwa ku kupwila.”

18. Kupwila kwetu mwikumona byepi, kabiji mwafuukulapo kuba ka?

¹⁸ Nanchi ne anweba byobyo mumvwa pa kupopwela Yehoba nyi? Inge ibyo, twajijilai kwibikako kupwila pamo na balongo nangwa kya kuba bintu byakatazha. Mumweshai Yehoba amba mumvwa byonka byaumvwanga Mfumu Davida waambile’mba: “Anweba Yehoba, natemwa nzubo yenu yo mwikalamo.”—Salamo 26:8.