Mutanchi wa Kisemi—Kupwila kwa Kipwilo
1 Umvwe mwi nsemi mwina Kilishitu, mukeba baana benu kukoma mu butemwe bwa kutemwa Yehoba ne kumwingijila kabiji ne kumona bumi bwa myaka ne myaka mu ntanda ipya yo alaya. Mwakonsha kwibakwasha byepi kutangizhako kupopwela Yehoba mu bwikalo bwabo? Jishinda jikatampe ke kya kumwenako kyenu. (Mana. 20:7) Byo avulukile kya kumwenako kya bainanji Bakamonyi, nyenga umo waambile’mba: “Kechi pajingapo luzhinauko lwa kuba’mba kana tusa kuya na kupwila nangwa kubula kuya ne.” Kino kya mwikele bingi ku muchima.
2 Nanchi kisemi kyenu kyumvwisha nkebelo ya kupwila kwa kipwilo nyi? Mikambizho yo tufunjishiwa pa kuno kupwila itukosesha bingi kutwajijila na kuba kyaswa muchima wa Lesa, kabiji twikosesha bingi pa kupwanañena pamo na balongo betu. (Isa. 54:13; Loma 1:11, 12) Nangwa byonkabyo, nkebelo ine ikatampe ya kuno kupwila ke ya kutota Yehoba “monka mu bipwilo.” (Sala. 26:12) Kupwila kwa bwina Kilishitu kwitupa jishuko ja kumwesheshamo butemwe bo twatemwa Yehoba kabiji ne kumupopwela.
3 “Tajijishai Bulongo”: Kunemeka buzhile bwa kupwila kwetu kuketukwasha ‘kutajijisha bulongo’ pa kuba’mba tubulenga kutendeka kukomesha kisela kya kushala ku kupwila na mambotu a bintu byabula kunema. (Efi. 5:15, 16; Hebe. 10:24, 25) Umvwe ke mulenge mutanchi wenu wa kisemi, mwakonsha kutendekelapo kunemba bimye bitatwilamo kupwila kwa kipwilo. Kabiji mwafwainwa kumona’mba bintu bikwabo kechi bibena kulubankanya uno mutanchi ne.
4 Nanchi kechi kitusangajika pa kumvwa balongo betu byo babena kushinda mikika pa kuba’mba batanwenga ku kupwila kwa kipwilo ne ku kupwila kukatampe nenyi? Nangwa kya kuba bwikalo bwenu bumwekana nobe bwawamako, ne anweba mwafwainwa mupita mu makatazho. Satana ubena kukosako bingi kumona kuba’mba bantu ba Lesa kibakatazhenga kupopwela Yehoba. Nangwa kiji bino, yukai kuba’mba baana benu kwakubula nangwa kuzhinaukatu ne, bakamona kisemi kyenu byo kibikako kutanwa ku kupwila kwa kipwilo. Ee, umvwe kemube bino, mukabyala kya bupe kya ku mupashi mwi abo kyo bakabula kulubamo.