Mepuzho Afuma Ku Batanga

Mu kimwesho kyamwene Ezikyo, mwanamulume wajinga na fukuta mwajinga bya kunembako munembeshi ne banabalume batanu na umo bajinga na bya kwipayañenako bemenako bañanyi?

Bemenako mazhita a mwiulu aonawine Yelusalema kabiji akeya na konauna ino ntanda yatama ya kwa Satana pa Amagedonyi. Ino yo ndumbulwilo ya katataka. Mambo ka o kyakebewenga kupimpulako?

Mwaka wa 607 B.C.E. saka akyangye kufika, Yehoba wamwesheshe Ezikyo bintu bikamweka mu Yelusalema saka bakyangye kumonauna. Mu kino kimwesho, Ezikyo wamwene bintu byatama byavula byamwekelenga. Kabiji wamwene banabalume batanu na umo, bonse pa muntu pa muntu bajinga na “kya kwipayañenako mu maboko abo.” Kabiji kwajinga mwanamulume mukwabo “wavwajile kisapi kya linenyi” kabiji wajinga na “bya kunembako munembeshi.” (Ezikyo 8:6-12; 9:2, 3) Uno mwanamulume bamubuujile kuya mu muzhi na ‘kubika tuyukilo pa bilungi bya bantu bajinga na bulanda, babinzhilenga na mambo a bya bunya byaubiwenga mu muzhi.’ Kepo banabalume batanu na umo bajinga na bya kwipayañenako bebabuujile kwipaya bonse mu muzhi babujile tuyukilo. (Ezikyo 9:4-7) Ñanyi bintu byo twakonsha kufunjilako ku kino kimwesho, kabiji mwanamulume wajinga na bya kunembako munembeshi ye ñanyi?

Ezikyo wamwene kino kimwesho mu 612 B.C.E. Buno bungauzhi bwafikile patanshi pa kupitapo myaka itanu kimye Yehoba kyo aswishishe nzhita ya bena Babilona konauna Yelusalema. Yehoba waingijishe bena Babilona kukambula bantu banji babujile lukookelo. (Yelemiya 25:9, 15-18) Pano kyajinga byepi ku Bayudea baoloka babujile kwivwanga mu byubilo byatama byamwekelenga mu muzhi? Yehoba wibapulwishe.

Mu kimwesho, Ezikyo kechi wabikilepo kayukilo pa muntu nangwa umo ne, kabiji kechi wivwangilemo mu konauna muzhi ne. Pakuba bamalaika bo batangijilenga mwingilo wa konauna Yelusalema. Onkao mambo, buno bungauzhi bwitukwasha kuyuka bintu bimweka mwiulu. Yehoba wabuujile bamalaika kunengezha’mba bonaune babi ne kupulusha baoloka.a

Buno bungauzhi bukafika ne kulutwe. Kala twaambanga’mba mwanamulume wajinga na bya kunembako munembeshi wimenako bashingwa bakiji pano pa ntanda. Kabiji twaambanga’mba bantu batambula tuyukilo twa lupulukilo umvwe baumvwa ne kuswa mambo awama o tusapwila. Pano bino twamwene kuba’mba twafwainwa kupimpulako mo twalumbulwilanga buno bungauzhi. Byambo byaambile Yesu biji pa Mateo 25:31-33 bitufunjisha’mba Yesu ye uchibila bantu mambo. Ukoba bino kulutwe kimye kya malwa akatampe. Pa kyokya kimye, aba bakekala nobe mikooko bakapuluka, kabiji aba bakekala nobe bambuzhi bakebonauna.

Onkao mambo, ñanyi bintu byo twafunjilako ku kimwesho kya kwa Ezikyo? Twafunjilako bintu bitanu:

1. Yelusalema saka bakyangye kumonauna, Ezikyo, Yelemiya ne Isaya bajimwineko bantu pa bintu byamwekejile muzhi. Bajinga nobe bakasopa. Lelo jino, Yehoba ubena kwingijisha kajibumba kacheche ka bashingwa kufunjisha bantu banji ne kujimunako bakwabo malwa akatampe saka akyangye kufika. Bantu ba Lesa bonse, ko kuba’mba ba mu nzubo ya kwa Kilishitu babena kwingila uno mwingilo wa kujimunako bantu.—Mateo 24:45-47.

2. Ezikyo kechi wabikile tuyukilo pa bantu bakapuluka ne. Nangwatu bantu ba Lesa lelo jino kechi babika tuyukilo pa bantu ne. Basapwilatu ku bantu ne kwibajimunako pa bintu bikamweka kulutwe. Uno mwingilo wa kusapwila ntanda yonse, ubena kwingijiwa na bukwasho bwa ba malaika.—Lumwekesho 14:6.

3. Aba bapulukile mu kimye kya Ezikyo, kechi bajinga na tuyukilo pa bilungi byabo ne. Ne lelo jino, aba bakapuluka kechi bakekala na tuyukilo. Bantu bafwainwa kuba byepi pa kuba’mba bakapuluke malwa akatampe? Inge baumvwa lujimuno, bafwainwa kulondela Kilishitu ne kwipana abo bene kwi Lesa ne kukwasha balongo ba kwa Kilishitu mu mwingilo wa kusapwila mambo awama. (Mateo 25:35-40) Kimye kya malwa akatampe, bano bantu bakebapa tuyukilo, ko kuba’mba bakebapulusha.

4. Mwanamulume uji na bya kunembako munembeshi wimenako Yesu. Kimye kya malwa akatampe, Yesu ukabika tuyukilo pa jibumba jikatampe kimye kyo akebasala kwikala nobe mikooko. Kepo bakekala myaka ne myaka pano pa ntanda.—Mateo 25:34, 46.b

5. Lelo jino, banabalume batanu na umo baji na bya kwipayañenako, bemenako nzhita ya mwiulu ayo itangijilwa ne Yesu. Katatakatu ikonaune bisaka bya bantu ne kupwisha bubi bonse.—Ezikyo 10:2, 6, 7; Lumwekesho 19:11-21.

Kino kimwesho kibena kwitufunjisha’mba Yehoba kechi ukonauna baoloka pamo na babi ne. (2 Petelo 2:9; 3:9) Kabiji kintu kikwabo kyo tubena kufunjilako ke kya kuba’mba mwingilo wa kusapwila wanema bingi mu ano moba. Bantu bonse bafwainwa kumvwa lujimuno mpelo saka ikyangye kufika!—Mateo 24:14.