Kyubilo kya Lesa Kyanema Kukila Daimani

Musapwishi wabula kubatizhiwa wa jizhina ja Haykanush wa ku kyalo kya Armenia, wataine kitupa kya kwingijisha pa kuya mu kyalo kingi kwipi na nzubo yanji. Mukachi ya kino kitupa mwajinga tubikachi twa ku banki ne mali avula bingi. Wabuujile mwatawanji wajinga musapwishi wabula kubatizhiwa bintu byo ataine.

Bano bamulume ne mukazhi kechi bajinga na mali ne, kabiji bajinga ne na nkongole. Bino batwajile ano mali ku keyala wanembelwe pa kitupa kya kwingijisha pa kuya mu kyalo kingi. Mwanamulume waelele bino bintu pamo ne kisemi kyanji bakuminye bingi. Haykanush ne mwatawanji balumbulwile’mba bintu byo bafunjilenga mu Baibolo byo bibalengejile kwikala ba kishinka. Kepo baingijishe kino kimye kwamba pa Bakamonyi ba kwa Yehoba kabiji kino kisemi bekipeele ne mabuku.

Kino kisemi kyapeele Haykanush mali amo a kumufweta, bino wakaine. Juba jalondejilepo, mukazhi wa yewa mwanamulume waelele mali, wayile na kumona Haykanush ne mwatawanji pa nzubo, kabiji pa kuba’mba amwesha’mba wasanchile bingi wibakanjikizhe kuba’mba baswe kutambula kambalaminwe ka daimani.

Byonka byaubile kino kisemi, bantu bavula bakonsha kukumya bingi pa bukishinka bwamwesheshe Haykanush ne mwatawanji. Nanchi Yehoba naye wakuminye nyi? Wamwene byepi bukishinka bwabo? Nanchi mu bukishinka bwabo mwafumine byawama nyi?

BYUBILO BYANEMA KUKILA BUNONSHI

Kechi kyakatazha kutaana mikumbu ya ano mepuzho ne. Mambo ka? Mambo bakalume ba Lesa bayuka’mba kwikala na byubilo bya Yehoba kwanema kwi aye kukila daimani, ngolode, nangwa bya bunonshi bikwabo. Kya kine, bintu byanemeka Yehoba byapusana na byanemeka bantu. (Isaya 55:8, 9) Kabiji bakalume banji bamona kuba’mba kwikala na byubilo bya Yehoba kwanema.

Twayuka bino na mambo a byaamba Baibolo pa milangwe ne maana. Byambo bya Maana 3:13-15 byaamba’mba: “Ye mwine wa lusekelo muntu utaana maana ne muntu utambula milangwe; kutaana maana kwawama kukila kutaana siliva, kabiji kwikala nao kwanema kukila kwikala na ngolode. Anema kukila makolale; kafwako kintu kyo ukeba kyakonsha kwesakana nao ne.” Kya kine, Yehoba wanemeka bingi bino byubilo kukila bya bunonshi byonse.

Pano bukishinka bo buka?

Yehoba wa kishinka. Ke “ Lesa ubula kubepa.” (Titusa 1:2) Watangijile mutumwa Paulo kunembela bena Kilishitu Bahebelu mu myaka kitota kitanshi amba: “Saka mwitulombelako, mambo twaketekela’mba tuji na jiwi ja mu muchima ja kishinka, byo tukebesha kwikala ba kishinka mu bintu byonse.”—Bahebelu 13:18.

Yesu Kilishitu naye wajinga wa kishinka. Ñanga Mwine Mukatampe aye Kaifasa byo aambile’mba, “Nakuchipisha mu jizhina ja Lesa mumi namba witubuule umvwe wi Kilishitu, Mwana Lesa!,” Yesu mu bukishinka wisolwele kuba’mba ye Mesiasa. Waambile kishinka nangwa kya kuba wayukile’mba kije kya Saniedilini kisakumupamo mambo a kuba mwenga ne kumwipaya.—Mateo 26:63-67.

Nga atweba kiji byepi? Inge twatanwa mu bintu byakonsha kwitulengela kumwenamo kupichila mu kubepa bubela nangwa kwalulako bishinka bimo, abya tukatwajijila kwikala ba kishinka nyi?

ENE MAMBO O KIKATEZHA KWIKALA BA KISHINKA

Kyakatazha bingi kwikala ba kishinka mu ano moba akupelako mambo bantu bavula ‘betemwatu abo bene, kabiji batemwa mali.’ (2 Timoti 3:2) Inge mali nangwa makito akatazha kutaana, kilengela bantu bavula kwiba ne kuba bintu bya kubula bu kishinka. Bavula balanguluka’mba pa kuba’mba bekale na bintu, kechi bafwainwa kwikala ba kishinka ne. Bena Kilishitu bamo nabo kechi bafuukulapo bulongo ne, kabiji na mambo a “lwiso lwa mali ne bintu,” bebapanga mu kipwilo.—1 Timoti 3:8; Titusa 1:7.

Bena Kilishitu bavula balondela Yesu. Bayuka’mba kwikala na byubilo bya Lesa kwanema kukila bunonshi bonse. O ene mambo bena Kilishitu banyike o babujila kubepa pa kuba’mba bobe bulongo ku sukulu. (Byambo bya Maana 20:23) Javula kechi tutambula mfweto kupichila mu kwikala ba kishinka byonka byo kyajinga kwi Haykanush ne. Pano bino, Lesa witubuula’mba kwikala ba kishinka ko kwawama, kabiji kwitulengela kwikala na jiwi ja mu muchima jatoka, kintu kyanema kukila bya bunonshi.

Kyamwekejile Gagik kimwesha kino kishinka. Waambile’mba: “Saka nkyangye kwikala mwina Kilishitu, naingilanga ku kampanyi wabulanga kupana misonko kupichila mu kumwesha’mba kampanyi kechi ubena kulenga mali avula ne. Na mambo a kuba’mba najinga mukulumpe wa nkito pa uno kampanyi, yami najinga na mukwekele wa ‘kumvwañana’ na watalanga pa misonko kupichila mu kumupa mazhikakanwa pa kuba’mba abulenga kutako muchima ku byubilo bya bujimbijimbi pa kampanyi. Kyafuminemo, nayukanyikilwe’mba kechi ne wa kishinka ne. Byo nafunjile bukine, nalekele ino nkito nangwa kya kuba nafolanga muzema wa mali. Onkao mambo, natendekele kuba busulu bwami. Kabiji kimyetu kitanshi kyo natendekele busulu bwami, nanembeeshe kampanyi wami kabiji mpaana misonko yonse.”—2 Kolinda 8:21.

Gagik waambile’mba: “Namwenengatu mali acheche, onkao mambo kyankatezhe kumwena kisemi kyami. Pano bino, nji bingi na lusekelo. Nji na jiwi ja mu muchima jatooka kwi Yehoba. Nji na byubilo byawama bibena kufunjilako baana bami babalume babiji, kabiji nafikilamo ne kwingila mingilo mu kipwilo. Luno bangyuka’mba ne wa kishinka ku bantu bo ñingila nabo ne batala pa misonko.”

YEHOBA WITUKWASHA

Yehoba watemwa bantu baleta lutotelo kwi aye kupichila mu kulondela byubilo byanji byawama kubikapotu ne bu kishinka. (Titusa 2:10) Witulaya kwitukwasha inge twauba bino mu bwikalo bwetu. Yehoba watangijile Mfumu Davida kwamba’mba: “Najinga mwanyike pano luno nakota, bino kechi nakimonapo kala muntu waoloka bamulekelela, nangwa baana banji saka bapitamo na kukeba kajo ne.”—Salamo 37:25.

Bintu byapichilemo muntu wa kishinka aye Luta, bimwesha’mba bino byambo bya kine. Watwajijile kwikala wa kishinka ku muko wanji aye Naomi, kechi wamushiile na mambo a kuba’mba wakotele ne. Luta wavilukijile ku Isalela ko apopwelanga Lesa wa kine. (Luta 1:16, 17) Wajinga wa kishinka kabiji waingijilenga na ngovu mwingilo wa kupupula monka mwaambijile Muzhilo wa kukwasha bayanji. Byonkatu byo kyajinga kwi Davida, Yehoba kechi washiile Luta ne Naomi ne. (Luta 2:2-18) Kabiji wamubijile bintu byavula bingi. Wamusajile kwikala umo wa mu ndonda ya kisemi kya kwa Mfumu Davida mwasemekejilwe Mesiasa.—Luta 4:13-17; Mateo 1:5, 16.

Bakalume ba Yehoba bamo bakonsha kukankalwa kumona mali a kupotamo bikebewa. Pano bino bengila na ngovu, kechi bengijisha bujimbijimbi pa kuba’mba bataane mali ne. Inge bauba bino, bamwesha’mba byubilo byawama bya Lesa byanema kukila bya bunonshi byo bakonsha kwikala nabyo.—Byambo bya Maana 12:24; Efisesa 4:28.

Byonkatu byaubile Luta, bena Kilishitu mwaya ntanda baketekela’mba Yehoba wakonsha kwibakwasha. Baketekela mu mulaye wa Lesa wa kuba’mba: “Kechi nkakusha ne, kabiji kechi nkakulekelela ne.” (Bahebelu 13:5) Yehoba wamwesha javula amba ukwasha bonse bamwesha bukishinka kimye kyonse. Watwajijila kufikizha mulaye wanji wa kukebela bakalume banji bikebewa.—Mateo 6:33.

Bantu banemeka daimani ne bya bunonshi bikwabo. Bino atweba twashiinwa’mba Shetu wa mwiulu wanemeka bu kishinka ne byubilo bikwabo byawama kukila mabwe a buneme.