Nanchi Baibolo Waamba’mba Ka?

Nanchi bantu bakekalapo mutende pano pa ntanda nyi?

Mwakonsha kukumbula amba ka?

• Ee

• Ine

• Kampe

Byamba Baibolo

Mu bukalama bwa kwa Yesu Kilishitu, “mutende ukavula moba onse kufikatu ne ñondo byo akabula kwikalako.” Kino kibena kulumbulula’mba myaka ne myaka.—Salamo 72:7.

Ñanyi bintu bikwabo byo tufunda mu Baibolo?

• Bantu batama bakebafumyapo pano pa ntanda, kino kikalengela bantu baoloka ‘kusangalala mu kuvula kwa mutende.’—Salamo 37:10, 11.

• Lesa ukapwisha makondo onse pano pa ntanda.—Salamo 46:8, 9.

Nanchi bantu bakonsha kwikala na mutende wa mu milanguluko nyi?

Bantu bamo baitabila kuba’mba . . . uno mutende wa mu milanguluko bantu kechi bakonsha kwikala nanji mu ino ntanda mwavula buyanji ne nshiji ne. Mwalangulukapo amba ka?

Byamba Baibolo

Nangwatu luno, balunda na Lesa beyowa “mutende wa Lesa wakila milanguluko ya bantu.”—Filipai 4:6, 7.

Ñanyi bintu bikwabo byo tufunda mu Baibolo?

• Lesa walaya kufumyapo buyanji ne nshiji, walaya’mba, “mbena kulenga bintu byonse kwikala ke bipya.”—Lumwekesho 21:4, 5.

• Twakonsha kwikala na mutende inge twaikala na “muchima wa kukeba kuyuka Lesa.”—Mateo 5:3.