“Mambo Ka Lesa O Aswishisha Kino Kumweka?”

INGE KWAMWEKA BYA MALWA, NANCHI MWISHIKISHA’MBA, ‘MAMBO KA LESA O ASWISHISHA BINO BINTU KUMWEKA’ NYI? INYI KAMPE MWAKIPITAPO MU BYA MALWA NE KULANGULUKA’MBA LESA KECHI WIMUTA MUCHIMA NE?

Kampe mwakonsha kuswisha byambo byaambile Sheila, wikala mu United States. Sheila wakomejile mu kisemi kyatemenwe Lesa, kabiji waambile’mba: “Kufumatu ku bwanyike, nakebanga bingi kufunda pe Lesa mambo ye Mulenga wetu. Bino kechi nalangulukangapo’mba wantemwa ne. Namonanga nobe ummwenatu palepa kwa kubula kunta muchima. Ibyo, kechi namonanga’mba Lesa wanshikwa ne. Bino nazhinaukanga inge kine wanta muchima.” Mambo ka Sheila o azhinaukilanga? Walumbulula’mba: “Kisemi kyetu kyapichile mu bya malwa byavula byalondankene, kabiji kyamwekeletu nobe Lesa kechi wituta muchima ne.”

Ne anweba kampe mwaitabila’mba Lesa koaji, byonka byaitabila Sheila. Bino mwakonsha kuzhinauka amba Lesa kechi wimuta muchima ne. Mwanamulume wa kishinka, aye Yoba, waitabijile’mba Mulenga koaji kabiji uji na bulume ne maana. Pano bino, naye pa kimye kimo wazhinaukile. (Yoba 2:3; 9:4) Yoba byo apichile mu bya malwa byavula pa kimye kimotu, washikishe Lesa amba: “Mambo ka o mufiila kilungi kyenu ne kummona nobe ne mulwanyi wenu?”—Yoba 13:24.

Nga Baibolo waambapo’mba ka? Nanchi Lesa ye uleta bya malwa nyi? Nanchi pajipo bishinka bitukwasha kushiinwa’mba Lesa wituta muchima nyi? Kabiji twakonsha kushiinwa byepi amba Lesa wituta muchima, kabiji umvwa bulanda ne kwitukwasha kimye kyo tupita mu makatazho?

Mu mitwe yalondelapo, tusakumona bilengwa na Lesa byo bitufunjisha kuba’mba Lesa wituta muchima. (Loma 1:20) Kabiji tusakumona ne Baibolo byo amwesha’mba Lesa wituta muchima. Inge mwafunjilako ku bintu byo alenga ne kutanga Mambo anji, ‘mukamuyuka’ bulongo byo aji kabiji mukashiinwa’mba kine “wimuta muchima.”—1 Yoano 2:3; 1 Petelo 5:7.