Bukishinka Bwenu Busangajika Muchima wa Yehoba

‘Mwanami, wikale wa maana, usangajike muchima wami, namba mmone mwa kumukumbwila awa uñendeleka.’—MANA. 27:11.

1, 2. (a) Buku wa Yoba walumbulula ñanyi mambo akolomwene Satana? (b) Ki ka kimwesha kuba’mba Satana watwajijile kwendeleka Yehoba ne panyuma ya moba a kwa Yoba?

YEHOBA waswishishe Satana kweseka bukishinka bwa kwa Yoba kalume wanji wa kishinka. Ne kyafuminemo, bilelwa bya kwa Yoba byafwile, wafwishishe baana banji, kabiji ne aye mwine wakolelwe. Satana byo azhinaukile bukishinka bwa kwa Yoba, kechi walangulukilenga pe Yoba bunke ne. Satana waambile’mba: “Kikoba pa kikoba kikwabo, byonse byo aji nabyo muntu ukebipana mu kupulusha mweo wanji.” Ano mambo akolomwene Satana avwangilemo ne bantu bakwabo kununga pe Yoba kabiji atwajijiletu ne panyuma ya lufu lwanji.—Yoba 2:4.

² Myaka 600 panyuma ya meseko a kwa Yoba, Solomone wanembele’mba: “Mwanami, wikale wa maana, usangajike muchima wami, namba mmone mwa kumukumbwila awa uñendeleka.” (Mana. 27:11) Kya kine, pa kyokya kimye Satana wakilengulwilenga Yehoba. Mu kimwesho kyo bamwesheshe mutumwa Yoano, Satana wamwekele saka ashinawina bakalume ba Lesa panyumatu ya kumupanga mwiulu mu 1914 kimye kyaikajikilwe Bufumu bwa Lesa. Ee, nangwatu mu ano moba apelako a buno bwikalo bubi, Satana ukizhinauka bukishinka bwa bakalume ba Lesa.—Lum. 12:10.

3. Bintu ka byanema byo twakonsha kufunda mu buku wa Yoba?

³ Akilangulukai, pa bintu bisatu byanema byo tufunda mu buku wa Yoba. Kitanshi, meseko a Yoba amwesha mulwanyi wa bantu kabiji nsulo ya kumanyikwa kwa bantu ba Lesa. Uno mulwanyi ke Satana Diabola. Kya bubiji, nangwa tupite mu meseko a mutundu ka, kwikala na bulunda bwakosa ne Lesa kuketulengela kutwajijila na bukishinka bwetu. Kya busatu, umvwe twatanwa mu malwa ne kwesekwa mu mashinda apusana pusana, Lesa witukosesha byonka byo akoseshe Yoba. Lelo jino, Yehoba witukwasha kupichila mu byambo byanji, jibumba janji, ne mupashi wanji wazhila.

Vulukainga Mulwanyi Kimye Kyonse

4. Ñanyi wafwainwa kupamo mambo pa byubilo bya ino ntanda lelo jino?

⁴ Bavula bakana’mba Satana ufwako. Onkao mambo bakonsha kuba moyo na byubilo biji mu ntanda, mambo kechi bamuyuka Satana Diabola ulengela bino ne. Kya kine, Malwa avula bantu o bapitamo bene beletelela. Bansemi betu batanshi ba Adama ne Evwa, basajilepo kwitolwela kufuma kwi Mulenga wabo. Kabiji kufumatu kyokya kimye, bisemi byonse byauba bintu byabula kufwainwa ne. Nangwa byonkabyo, Diabola ye wajimbaikile Evwa kusatukila Lesa. Ye uji mu bantu babula kulumbuluka, ye ubena kutangijila byubilo biji mu ntanda. Satana byo aji “Lesa wa panopantanda,” bantu mu ntanda bamwesha byubilo byonka byo amweshapo nabiji kwitota, bongozhi, kichima, lwiso, bujimbijimbi, ne bunsatuki. (2 Ko. 4:4; 1 Timo. 2:14; 3:6; tangai Yakoba 3:14, 15.) Bino byubilo byaleta malwañano mu bya bumulwila ntanda ne mu bupopweshi, lupato, mazhikakanwa ne kiwowo, abyo byalengela bwikalo bwa bantu kutama.

5. Tukeba kuba ka pa mambo a bintu byanema byo twayuka?

⁵ Atweba bakalume ba Yehoba twayuka bintu byakilamo kunema. Ee, twayuka wafwainwa kupamo mambo pa bintu byatama bya mu ino ntanda. Nanchi kechi tukebesha kwingilako uno mwingilo wa mu bujimi pa kuba’mba tubule bantu pa mambo a uno mulwanyi nenyi? Nanchi kechi twibalusekelo pa kwikala ku lubaji lwa Lesa wa kine Yehoba, ne kulumbulwila bantu byo a konauna Satana ne kupwisha malwa apitamo bantu nenyi?

6, 7. (a) Ñanyi wafwainwa kupamo mambo pa kumanyikwa kwa bapopweshi ba kine? (b) Twafwainwa kulonda byepi kya kumwenako kya kwa Elihu wa ku kala?

⁶ Satana kechi uletatu malwa mu kyalo ne, uleta ne lupato lupitamo bantu ba Lesa. Ukebesha bingi kwitutwala mu lweseko. Yesu Kilishitu waambijile mutumwa Petelo amba: “Shimona, Shimona, talai! Satana wimusakile bonse amba nebolulule nobe kajo.” (Luka 22:31) Byonkabyo, netuwa tulonda mu ngayo ya kwa Yesu tupita mu meseko a misango ne misango. Petelo wapashañenye Diabola ku “bokwe wimba, upitañana na kusaka ye ayuka kuja.” Kabiji Paulo waambile’mba: “Bonse bakeba kwikala na munema wa kunemeka Lesa mwi Kilishitu Yesu, bakapatwanga.”—1 Pe. 5:8; 2 Timo.3:12.

⁷ Twakonsha kumwesha byepi kuba’mba twamuyuka mulwanyi umvwe balongo ne bakwetu ba mu lwitabilo baponena mu bya malwa? Mu kifulo kya kwipatula ku balongo baponenwa na bya malwa, tuba byonka byaubilenga Elihu wajingako kala, awo mu ñambilo wimwesheshe kwikala mulunda wakine wa kwa Yoba. Tukwasha balongo betu kushinda mulwanyi wetu, Satana. (Mana. 3:27; 1 Tesa. 5:25) Kikonkwanyi kyetu ke kya kukwasha mwina Kilishitu mukwetu kutwajijila kulama bukishinka bwanji nangwa kishupepotu byepi, ne mu jino jishinda tusangajika muchima wa Yehoba.

8. Mambo ka Satana kyo akankejilwe kulekesha Yoba kunemeka Yehoba?

⁸ Patanshitu Satana waonawine bilelwa bya kwa Yoba. Banyama banemene bingi, kyamweka mo a mwenanga mali. Kabiji Yoba wibengijishanga ne mu mpopwelo. Yoba byo azhijikile baana banji, ‘wabukilenga lukelokelo mu kulambula milambo ya kusoka; monka mwayijile kuvula kwabo: mambo Yoba waambile’mba: Kampepo baana bami ba balume balenga mambo ne kumuba mwenga Lesa mu michima yabo. Byo byo aubilenga Yoba moba onse.’ (Yoba 1:4, 5) Onkao mambo Yoba walambwilenga banyama kwi Yehoba kimye kyonse. Meseko byo atendekele, kechi wakonsheshe kuba byobyo ne. Yoba kechi wajinga “na bintu” byo akonsheshe kunemekelamo Yehoba ne. (Mana. 3:9) Pano bino wakonsheshe kabiji watumbijikile Yehoba na kanwa kanji.

Ikalai Balunda na Yehoba

9. Ñanyi Kintu kyakilamo kunema mu bwikalo bwetu?

⁹ Kikale twi banonshi nangwa bayanji, banyike nangwa bakulumpe, tuji na butuntulu bwa mubiji bwawama nangwa tukolwa kolwa, twakonsha kwikala balunda na Yehoba. Nangwa kya kuba tubena kupita mu makatazho, kwikala balunda na Lesa kuketulengela kwikala bakishinka ne kusangajika muchima wa Yehoba. Nangwatu bantu bamo babujile kuyukisha bukine bachinchikile ne kulama bukishinka bwabo.

10, 11. (a) Nyenga yetu umo waubilepo byepi pa meseko a bukishinka? (b) Mukumbu ka wawama uno nyenga ye apaine kwi Satana?

¹⁰ Akilangulukai kya kumwenako kya Banyenga Valentina Garnovskaya, bamo pa Bakamonyi bavula mu Russia balamine bukishinka bwabo byonka byajinga Yoba nangwa kya kuba bapichilenga mu meseko. Mu 1945, byo bajinga na myaka ya kusemwa 20, bebasapwijile ku mulongo. Wabweleleko bimye bikwabo bibiji na kwisamba pa mambo a Baibolo, kabiji kechi bamumwenepo jikwabo ne. Nangwa kyajinga byonkabyo, ba Valentina batendekele kusapwila ku ba kinkalankulo. Ne kyafuminemo, bebakwachile ne kwibakasa myaka itanu na isatu mu kampu. Mu 1953 bebakasulwile kabiji ponkapotu batendekele kusapwila jibiji. Kabiji bebakwachile jibiji ne kwibataya pa kazhima myaka jikumi. Panyuma ya myaka yavula mu kampu umo, bebavilwijile kukwabo. Muyenkawa kampu, mwajinga banyenga bamo bajinga na Baibolo. Juba jimo nyenga wamwesheshe ba Valentina Baibolo. A kino byo kibasangajikilepo! Akikilangulukaipotu, Baibolo mukwabo ba Valentina ye bamwenepotu ke yewa wajinga na mulongo wibasapwijile mu 1945.

¹¹ Mu 1967, ba Valentina bebakasulwile kabiji bepaine kwi Yehoba kupichila mu lubatizhilo lwa mu mema. Baingijishe bwana bwabo bwa bene kwingilako na mukoyo kufikatu ne mu1969. Nangwa byonkabyo, mu yenkawa mwaka bebakwachile jikwabo, pa kino kimye bebataile pa kazhima myaka isatu. Ba Val­entina batwajijilepotu kusapwila. Saka bakyangye kufwa mu 2001, bakwashishe bantu 44 kufunda bukine. Baikele myaka 21 mu kaleya ne mu ma kampu. Basankijilepo byonse byo bajinga nabyo, kubikapo ne bwana bwabene, pa kubatu’mba balame bukishinka bwabo. Ku mpelo ya bumi bwabo, ba Valentina baambile’mba: “Kechi najingapo na mpunzha yami pa kwikala ne. Bintu byami byonse byajinga mu ka sutukesi ka kacheche, bino najinga wa lusekelo ne kutondwa mu mwingilo wa kwingijila Yehoba.” A uno byo aikalapo mukumbu wawama ba Val­en­tina ye bapaine kwi Satana, awo wamba kuba’mba umvwe bantu kebapite mu meseko kechi bakonsha kutwajijila kwikala bakishinka kwi Lesa ne! (Yoba 1:9-11) Twafwainwa kusumininwa kuba’mba basangajikile muchima wa Yehoba kabiji ubena kupembelelatu kimye kyo akasangula ba Valentina ne bakwabo bafwile bakishinka.—Yoba 14:15.

12. Butemwe bwingila ñanyi lubaji mu bulunda bwetu na Yehoba?

¹² Bulunda bwetu na Yehoba bwaimena pa kumutemwa. Tukomoka byubilo bya Lesa ne kweseka papelela bulume bwetu kwikela mwayila nkebelo yanji. Kupusanako na byamba Satana, twifuukwila atweba bene kumwesha butemwe bubula kukeba kulipilwa kwi Yehoba. Buno butemwe bwa na muchima yense bwitukwasha kutwajijila bakishinka mu meseko. Yehoba ‘ukalama jishinda ja bazhijikwa banji.’​—Mana. 2:8; Sala. 97:10.

13. Yehoba umona byepi byo tuba kwi aye?

¹³ Butemwe bwitulengela kunemeka jizhina ja Yehoba, nangwa kya kuba twiumvwa nobe kechi twakonsha kwingila pakatampe ne. Umona byubilo byetu byawama kabiji kechi witupamo mambo umvwe twakankalwa kuba byonse byo twafwainwa kusaka kuba ne. Kintu kikatampe kechi kyonka kyo tubatu ne, bino ne ene mambo o twikyubila. Nangwa kya kuba Yoba wamanaminenga kabiji wachinchikile, waambile na balwanyi banji pa byo atemenwe mashinda a Yehoba. (Tangai Yoba 10:12; 28:28.) Mu kitango kyapelako kya buku wa Yoba, Lesa wabukijile bukaji ba Elifwaza, Bilidada, ne Zofwala mambo kechi baambilenga bukine ne. Pa kimye kimotu, Yehoba wamwesheshe amba Yoba waitabilwa byo aambile bimye bina’ mba “muntu wami wa mwingilo” kabiji ne pa kuba’mba ekale wa kumwambilako ku bamutekeneshenga babubela. (Yoba 42:7-9) Twayai netuwa tubilenga bintu mu jishinda jafwainwa pa kuba’mba Yehoba etubile bibusa.

Yehoba Ukwasha Bakalume Banji Bakishinka

14. Yehoba wa kwashishe byepi Yoba kupimpula ndangulukilo yanji?

¹⁴ Yoba walamine bukishinka bwanji nangwa wajinga wabula kulumbuluka. Bimye bimo, mu malwa akatampe, waikalanga na ndangulukilo yatama. Kya kumwenako, waambile kwi Yehoba’mba: “Amiwa nemwita bino anweba kungitaba ne . . . Mwampata na bulume bwenu bonse.” Kabiji Yoba wibingishenga aye mwine byo aambile’mba: “Kechi nazhatwa ne,” kabiji “mu maboko ami kechi muji bukapondo nangwa bucheche ne, ne lulombelo lwami lwalumbulukatu bulongo.” (Yoba 10:7; 16:17; 30:20, 21) Nangwa kikale byonkabyo, Yehoba mu lusa lwanji wamukwashishe Yoba byo amwipwizhe mepuzho amulengejile kuleka kwita muchima. Kabiji amukwashishe kuyuka kuba’mba Lesa ye wa bulume bonse kabiji kafwako muntu nangwa umo wakonsha kwesakana nanji ne. Yoba waswile kutangijilwa kabiji wapimpwile ndangulukilo yanji.—Tangai Yoba 40:8; 42:2, 6.

15, 16. Mu ñanyi mashinda Yehoba mo apaina bukwasho ku bakalume banji lelo jino?

¹⁵ Yehoba upana lutangijilo lwawama ku bakalume banji lelo jino. Kabiji tumwenamo byawama. Kya kumwenako, Yesu Kilishitu wapaine kitapisho kya bukuzhi ne kwala kitendekesho kya lulekelo lwa mambo. Kupichila mu kitapisho, twakonsha kwikala na bulunda bwakosa na Lesa nangwa kya kuba twi bantu babula kulumbuluka. (Yako. 4:8; 1 Yoa. 2:1) Umvwe ketupite mu meseko, netuwa tulomba bukwasho bwa mupashi wazhila wa Lesa kwitukosesha. Kunungapo, tuji na Baibolo, kabiji umvwe twiitanga ne kulanguluka pa bijimo, twinengezhezha jimo ku meseko a lwitabilo lwetu. Lufunjisho lwitukwasha kumvwisha mambo a bumfumu ne a bukishinka bwetu.

¹⁶ Kabiji tumwenamo pakatampe mu kwikala lubaji lwa bwanabwankazhi bwa ntanda yonse Yehoba bo apa kajo ka ku mupashi kupichila mwi ‘kalume wa kishinka kabiji wa maana.’ (Mat. 24:45-47) Kupwila kwikalako mu bipwilo nobe 100,000 bya ba Kamonyi ba kwa Yehoba, kwitufunjisha ne kwitukosesha kutalañana na meseko a lwitabilo lwetu. A kino kyakonshakumwekela mu kya kumwenako kya kwa Sheila, Kamonyi wa myaka 15 wikala mu Germany.

17. Lumbululai kyawamina kukakachila ku mikambizho ya Jibumba ja Yehoba lelo jino.

¹⁷ Juba jimo pa sukulu, Sheila ne bakwabo mo bafunjila bashajile kwakubula wa kwibasopa. Bakwabo bafukwilepo kwingijisha kipabi paji bisopelo byo bengijisha pa kwamba na bafu. Sheila wafumine mu kibamba ponkapotu, kabiji byo aumvwine kyamwekele panyuma ya kufumamo wasangalele bingi. Kimye kyo baingijishenga kano ka kipabi baana ba sukulu bamo baumvwine mo bajinga mwanematu zaki ne kutemañanamo. Nanchi ki ka kyakwashishe Sheila kufuukulapo kufuma mu kibamba ponkapotu? Sheila waambile’mba: “Bino saka bikyangye kumweka, twisambilepo pa kupwila ku Nzubo ya Bufumu pa bifuma mu kwingijisha kipabi paji bisopelo byo bengijisha pa kwamba na bafu. Onkao mambo nayukile bya kuba. Nasakile kusangajika Yehoba, byonka byaamba Baibolo mu Byambo bya Mana 27:11.” Byo kyawamapo kuba’mba Sheila wajingapo pa kupwila ne kutelekesha ku jashi!

18. Ki ka kyo mwafuukulapo anweba bene kuba?

¹⁸ Twayai atweba bonse tukokelenga mikambizho yo tutambwila mu jibumba ja Lesa. Kupichila mu kutanwa ku kupwila kimye kyonse, kutanga Baibolo, kutanga mabuku alumbulula Baibolo, lulombelo, kabiji ne kupwanañana na bena Kilishitu bakoma ku mupashi, tutana kutangijilwa ne bukwasho bo tukeba. Yehoba ukeba atweba kulama bukishinka bwetu, kabiji waketekela’mba tukatwajijila kwikala bakishinka. Kyawama bingi kutota jizhina ja Yehoba, kulama bukishinka, ne kusangajika muchima wa Yehoba!

Mukivuluka nyi?

• Ñanyi bintu ne meseko Satana byo aleta?

• Ki ka kyakilamo kunema kyo tuji nakyo?

• Bulunda bwetu na Yehoba bwaimena pa ka?

• Mashinda ka amo Yehoba mo etukwashisha lelo jino?

[Kipikichala pa peja 8]

Nanchi mutundaikwa kubulako bakwenu maana anema o mwafunda nyi?

[Kipikichala pa peja 9]

Twakonsha kukwasha bapopweshi bakwetu kulama bukishinka bwabo

[Kipikichala pa peja 10]

Ba Valentina basankijilepo byonse byo bajinga nabyo pa kubatu’mba balame bukishinka bwabo