Kufunda Ukusesema kwa kwa Daniele

¹ Kutatula mulungu wa April 17, tukafundanga buku wa Angweniko ku Kusesema kwa kwa Daniele! pa Kupwila kwa Jisambijilo ja Buku. Bavula batanga kala uno buku wawamisha, bino tuji na jishuko ja kwiyowa mfweto ifuma mu kwisambila pamo kwa jibumba mu uno buku. Basapwishi, bakasekela, ne baana bonse mwaitwa, kine, mwatundaikwa kutanwangako kila-mulungu ku jisambijilo ja buku wa Danyela mu Baibolo jibena kwamba pa mbaji yonse ya uno buku.—Mpitu. 31:12, 13.

² Mutanchi wa Jisambijilo ne Mikambizho: Mutanchi yense wa jisambijilo ja buku Ukusesema kwa kwa Daniele wanengezhiwa mu buno Butumwa Bwetu bwa Bufumu. Monai kuba’mba mwasunga kope wa uno mutanchi wa jisambijilo pamo na buku wenu ye mukafundangamo. Mutanchi wamwesha byapitala ne maparagrafu a mu buku kabiji ne mavesi a mu buku wa Danyela, otukafundanga pa kupwila kwa kila-mulungu. Tunembo twamunshi twalondolola mwakubila ne kimye mitwe imo kyo ikafundwapo. Kumpelo ya jisambijilo jonse ja kila-mulungu, utangijila jisambijilo watundaikwa kubwelulukamo pamo na jibumba mu mavesi asalululwa mu buku wa Danyela ao aji pa mutanchi wa yewo mulungu. Inge kimye ko kikiji, mavesi afwainwa kutangiwa ne kwiambapo. Mavesi amo akabwezhiwa bwezhiwangapo pa mulungu umo kufikatu ne mukwabo na mambo a kutwajijila kufunda moayila.

³ Nengezhai Jisambijilo Bulongo: Jisambijilo janengezhiwa kwikala na kimye kikatampe kya kubula kwenda lubilo pa kufunda mitwe ya tanchikwa. Mafunjisho ana epi bingi. Onkao mambo, kumpelo ya jisambijilo ja mulungu wa June 5, utangijila jisambijilo wafwainwa kunungako kupitulukamo mu Danyela 2:1-40. Mu mulungu wa June 26, wafwainwa kupituluka mu Danyela 3:1-30. Jisambijilo ja mulungu wa September 4 jikanungamo kwisamba pa bipikichala ne pa binembelo byonse biji pa peja 139. Chati iji pa mapeja 188 ne 189 yafwainwa kwambiwapo pa jisambijilo ja mulungu wa October 2.

⁴ Kila-mulungu nengezhai bulongo jisambijilo, ne kwiyowa kukumbulapo. Sanchilai jishuko jenu ja kukwatankana na jibumba ja kwa Yehoba jimweka ne kumwenamo mu mana ne milangwe ipanwa na bashingwa banji bakishinka. (Da. 12:3, 4) Tundaikai bantu bakwabo kutanwako ku jisambijilo ja buku kimye kyonse. Lekai atweba bonse tute muchima ku bungauzhi bwa byambo bya kwa Lesa byasololwa mu buku wapuiwamo wa kwa Danyela.—Hebe. 10:23-25; 2 Pe. 1:19.