Nanchi Mubena Kubapo Kimo pa Butemwe bwa kwa Kilishitu Nyi?
1 Mutumwa Yoano byo alangulukilenga pa bwikalo bwa kwa Nkambo yanji wanembele’mba: “Byo atemenwe ba kwanji baji panopantanda, aye wibatemenwe ne ku mpelo.” (Yoano 13:1) Mu kino kimye kya Kivuluko, tubena kulanguluka pa butemwe bukatampe Yesu bo etumwesheshe. Twafwainwa kubapo kimo pa buno butemwe kupichila mu kwikala na luketekelo mu nkuulo, kwikala na kizaku mu mwingilo wa busapwishi, ne kukoselamo “[kufika] ne ku mpelo” byonka byaubile Yesu.—Mat. 24:13; 28:19, 20; Yoano 3:16.
2 Kubapo kimo pa butemwe bwa kwa Kilishitu: Yesu wabambakene bingi mu mwingilo wa busapwishi kimye kya mulungu wapeleleko wa bwikalo bwanji bwa pano pa ntanda. (Mat. 21:23; 23:1; 24:3) Byo tuji ba kulonda Kilishitu, butemwe bwetu bwitulengela ‘kukosakena’ mu mwingilo wa kwa Yehoba. (Luka 13:24) Nanchi mwakonsha kushukilwa kunengezha kwa bailako kwa mwingilo wa busapwishi mu April kupichila mu kunungako kimye kyo mwingijisha mu butumwa nyi?
3 Uno mwaka Kijiilo kya Nkambo kikekalako Pakisatu mabanga, April 19. Banga bakatanwako ku kino kijiilo kikatampe? Ku lubaji lukatampe kino kiji ko tuji. Nanchi mwatanchika mazhina a bonse bo mukeba kuketako nabiji basambi benu Baibolo ne bakasekela bakwabo, balongo benu, bakwenu bo muba nabo busulu, ne bakwenu bo mufunda nabo pa sukulu nyi? Nanchi mwibendelapo kala ne kwibeta ku Kivuluko na muchima yense nyi? Nanchi musakukebavuluko saka kwakishala moba acheche a Kivuluko nyi? Nanchi bafwainwa kukeba bukwasho kufuma kwi anweba pa kuba’mba bakatanweko nyi? Bakulumpe mu kipwilo nabo babena kwita bonse bakoka mu mwingilo wa mu butumwa kuba’mba nabo bakatanweko. Nangwa kya kuba’mba juba ja Kivuluko jaikela mukachi ka mulungu mabanga mu kifulo kya ku mpelo ya mulungu, kechi kyalumbulula kuba’mba tukabule kutanwako ne.
4 Ikokozhezhai Jimo pa Kwiya: Ke kintu kikatampe bingi kwikala bekokozhezha jimo kabiji ne kwikala na mulanguluko wawama kimye kyo tuji ku Kivuluko. Paulo wajimwine bakwabo baitabila kuvuluka buneme bwa kino kijiilo. (1 Ko. 11:20-26) Mwafwainwa kutanga byapitala 13 kufika ku 17 bya Mambo awama a kwa Yoano kimye kyo mubena kusambijila jisambijilo ja Baibolo ja kisemi ne kwipuzha kila-kinungwa wa mu kisemi kwamba pa kitapisho kya kwa Yesu byo kyanema ko aji. Kabiji kange mulubeko kutanga Baibolo kwa pa juba pa juba mu yewo mulungu wa Kivuluko ne!
5 Butemwe bwetu pe Kilishitu kechi bukapwilatu pa April 19 ne, bukatwajijila kikupu. Onkao mambo twasakisha kumwesha butemwe bwetu kwi aye myaka ne myaka! Kusekelela Kivuluko kya uno mwaka kwakonsha kwitukwasha kukosesha buno butemwe.