“Kasa Muba Bibye mu Kundanguluka Amiwa”

Kuvuluka Lufu lwa kwa Yesu pa 2 April

1. Mambo ka juba ja pa 2 April, 2007 o janemena?

¹ Pa 2 April, 2007 bantu bavula kuzhokoloka ntanda yonse bakapwila na kuvuluka lufu lwa kwa Yesu. Yesu wafwile na mambo a kutumbijika bumfumu bwa Shanji wa mwiulu ne kumwesha kuba’mba Satana Diabola wabepele byo aambile’mba bantu bengijila Lesa na mambo a bintu byo Ebapa. (Yoba 2:1-5) Kabiji Kijiilo kya Nkambo kya Mabanga kituvululako’mba kupichila mu lufu lwanji byo ajinga muntu walumbuluka, wabula bundengamambo, Yesu wapaine bumi bwanji ke ‘kya kukuula bavula.’ (Mat. 20:28) Onkao mambo, Yesu wakambizhe baana banji ba bwanga’mba: “Kasa muba bibye mu kundanguluka amiwa.” (Luka 22:19) Nanchi lusanchilo lwa buno bupe bwanema bwa Lesa, lwimulengela kutendeka kunengezha kuba’mba mukavuluke kino kyubilo kikatampe kya butemwe nyi?—Yoa. 3:16.

2. Twakonsha kunengezha byepi muchima wetu kuba’mba tukavuluke kino Kivuluko?

² Nengezhai Muchima Wenu: Umvwe ketulanguluke pa bintu byamwekelenga mu moba apeleleko a bwikalo bwa kwa Yesu panopantanda, twakonsha kunengezha muchima wetu kuba’mba tukavuluke kino kivuluko. Pa kuba’mba kitukwasheko kuba kino, mu kabuku ka Kubalaulabalaula mu Binembelo pa Juba pa Juba—2007 ne mu Kalenda wa 2007 muji mutanchi wiikajila wa kutanga Baibolo. Mu bino Binembelo byatanchikwa, muji bintu byaubiwenga mu moba a kunangijila ku lufu lwa kwa Yesu kwesakana na kalenda ye twingijisha lelo jino. Moba aambiwa mu mashimikila a mu Baibolo aimena pa mbajilo ya Bayudea ya kubala mabanga kufika ku mabanga akwabo kwikala juba jituntulu. Ino mbajilo ya kubajilamo moba yo yaingijishiwa ne mu mutanchi wa kutanga Baibolo mu moba a Kivuluko. Kupituluka mu bino byambo biji mu Binembelo ne kulangulukishapo na lulombelo pa butemwe bukatampe bwa Lesa kuketukwasha kumwenamo pakatampe pa kuvuluka Kivuluko.

3. Twakonsha kukwasha byepi aba baji na lusekelo ne basapwishi bakoka kumwenamo mu Kivuluko?

³ Itai Bantu Bakeye na Kutanwako: Kya mukachi kya mu Mwingilo Wetu wa Bufumu wa February kyaambile pa mambo a mukwekele wiikajila wa kwita bantu kwiya ku kino Kivuluko. Nanchi mwinengezha kwingilako pakatampe mu uno mukwekele nyi? Abya mwanemba mazhina a bo mukeba kwita, kabiji mwatendeka ne kumonañana nabo nyi? Mukafike bukiji pa juba ja Kivuluko kuba’mba mukatambwile boba bo mwaita ne bantutu bakwabo bamwesha lusekelo. Mwakonsha kwikala nabo kabiji ne kumona’mba baji na Baibolo ne buku wa nyimbo. Bayukanyikishai ku bantu bakwabo ba mu kipwilo. Panyuma ya kupwila, ikalaiko na kimye kya kukumbula mepuzho abo. Babulai bakeye ne na kutanwako ku jashi jiikajila ja mvula bantu jikambiwa pa 15 April. Bakulumpe mu kipwilo kikatakata bakakeba kumona’mba aba basapwishi bakoka bebeta kukeya ku Kivuluko ne ku jashi jiikajila.

4. Twakonsha kukwasha byepi bantu kutwajijila kukomenako ku mupashi panyuma ya kivuluko?

⁴ Kwashai Bakatataka Baji na Lusekelo ne Boba Bakoka Kukomenako: Ñambi ukamba jashi ja Kivuluko ukalumbululako pacheche lunengezho lwetu lwa lufunjisho lwa Baibolo ne kutundaika bakatataka baji na lusekelo kutwajijila kufunda pe Yehoba. Mwakonsha kwisamba na bo muketa byambo bikamba ñambi kuba’mba bakafunjilepo byavula pe Yehoba. Umvwe bakyangye kutendeka kufunda Baibolo, monai’mba mwibafwakesha bukiji bukiji panyuma ya kivuluko ne kwibamwesha bya kufunda lufunjisho lwa Baibolo lwatutu. Pa kuba’mba bakomeneko ku mupashi bafwainwa ne kutanwanga ku kupwila kwa kipwilo. (Hebe. 10:24, 25) Pa kuba’mba bobe kino, batundaikai kutanwanga ku kupwila kimye kyonse. Bakulumpe mu kipwilo bakanengezha kufwakesha bena Kilishitu bakoka bakatanwa ku Kivuluko, kabiji ne kwibakwasha kulangulukishapo pa bishinka bikambiwa mu jashi. Kino kikebatundaika kutendeka kwingila jikwabo na kipwilo.

5. Kivuluko kitulengela kubapo byepi?

⁵ Kivuluko kitulengela kulangulukishapo pa bintu bitubila Yehoba ne Yesu. Kuno kulanguluka langulukapo kubayisha butemwe bwetu bo twibatemwa ne kwitulengela kwikala na byubilo byawama. (2 Ko. 5:14, 15; Yoa. 4:11) Kino kyo kimye kyo twafwainwa kwinengezha atweba bene ne boba bamwesha lusekelo kutanwa ku Kivuluko kyo ‘tusapwilamo lufu lwa Nkambo.’—1 Ko. 11:26.