“Saka Muba Kino” Kivuluko Kikekalako pa April 5
1. Mambo ka kuvuluka lufu lwa kwa Yesu kyo kwanemena?
1 “Saka muba kino mu kumvuluka.” (Luka 22:19) Bino Yesu byo byo akambizhe baana banji ba bwanga. Wibakambizhe kuvulukanga lufu lwanji. Na mambo a bukuzhi, kafwako juba kubena kilishitu jakila mu kunema nobe ja kuvuluka lufu lwa kwa Yesu pa mwaka pa mwaka ne. Byo kiji kuba’mba juba ja Kivuluko jafwenya ke pepi, twakonsha kumwesha byepi lusanchilo kwi Yehoba?—Kolo. 3:15.
2. Twakonsha kumwesha byepi lusanchilo pa Kivuluko kimye kyo tubena kufunda ne kulanguluka langulukapo?
2 Inengezhai: Javula twinengezha kuba bintu byo twayuka’mba byanema. Twakonsha kwinengezha ku Kivuluko pamo na kisemi kyetu kupichila mu kufunda ne kulanguluka langulukapo pa bintu byamwekejile Yesu mu moba anji apeleleko pano pa ntanda. (Ezela. 7:10) Binembelo byaamba pa moba a kupelako a kwa Yesu twakosha kwibitana mu kalenda ne mu Kubalaula Binembelo Moba Onse. Mutanchi yense wa bino Binembelo wakwatankana na bitango biji mu buku wa Muntu Waya Nkuwa uji mu Kyamba kya Usopa kya Kibemba kya February 1, 2011, mapa 23-24.
3. Twakonsha kumwesha byepi lusanchilo mu kimye kya kivuluko kupichila mu kwingilako pakatampe?
3 Sapwilai: Twakonsha kumwesha lusanchilo kupichila mu kwingilako pakatampe mu mwingilo. (Luka 6:45) Mukwekele wa ntanda yonse wa kwita bantu kwiya ku Kivuluko ukatatula pa Kibelushi pa 17 March. Nanchi mwakonsha kupimpulako mutanchi wenu pa kuba’mba mukengileko pakatampe mu mwingilo, nangwa kunembeshako bupainiya bwa kukwasha nyi? Mambo ka akubula kwisambapo na kisemi pa kimye kya kupopwela kwa kisemi?
4. Tumwenamo ka mu kutanwa ku kivuluko?
4 Tumwenamo bingi mu kutanwa ku kivuluko. Lusekelo ne butemwe pe Lesa bibailako inge ketulanguluke pa bumpanyi bwa Yehoba bwa kupana mwananji yenka umo kwikala ke bukuzhi. (Yoano 3:16; 1 Yoano 4:9, 10) Kino kitulengela kubula kwiubila bintu byo tukeba atweba bene. (2 Ko. 5:14, 15) Kabiji kitutundaika kwikala na kizaku kya kutota Yehoba kwakubula moyo. (Sala. 102:19-21) Bakalume ba Yehoba babena kwinengezha ku mwingilo ye tukekala nanji pa Kivuluko kikekalako pa 5 April wa ‘kusapwila lufu lwa Nkambo.’—1 Ko. 11:26.