Twayai Tumweshe Lusanchilo Lwetu Kivuluko Kikekalako pa 17 April
1. Byambo ka byaambile nyimbi wa masalamo byo twafwainwa kikatakata kumwesha mu kimye kya Kivuluko?
1 Na mambo a kukeba kusanchila Yehoba pa mingilo yanji yavula ya lusa kabiji ne byo apokolola bantu banji, nyimbi wa masalamo waipwizhe’mba: “Lelo i kika kyo nkamupa Yehoba na mambo a byanji byonse byawama byo angubila?” (Sala. 116:12) Lelo jino, bakalume ba Lesa baji na bintu byavula bya kumusanchilapo Lesa. Byo papichile myaka yavula panyuma ya kunemba bino byambo, Yehoba wapele bantu bupe bukatampe bingi—bukuzhi. Byo tubena kunengezha bya kuvuluka lufu lwa kwa Yesu pa 17 April, tuji na bintu byavula bya kwitulengela kumwesha lusanchilo lwetu.—Kolo. 3:15.
2. Ñanyi bintu bimo bitulengela kusanta pa mambo a bukuzhi?
2 Mapesho o Tumwenamo mu Bukuzhi: Na mambo a bukuzhi, twakonsha ‘kulekelwa mambo etu.’ (Kolo. 1:13, 14) Kino kitulengela kupopwela Yehoba na jiwi ja mu muchima jatoka. (Hebe. 9:13, 14) Kabiji twakonsha kwikala bakasuluka pa kusolomoka Yehoba mu lulombelo. (Hebe. 4:14-16) Aba baitabila mu bukuzhi baji na luketekelo lukatampe lwa kwikala na bumi bwa myaka!—Yoa. 3:16.
3. Twakonsha kumwesha byepi lusanchilo lwetu kwi Yehoba pa mambo a bukuzhi?
3 Mweshai Lusanchilo: Jishinda jimo jo tumwesheshamo lusanchilo ke kupichila mu kutanga Baibolo mu moba a Kivuluko pa juba pa juba ne kulanguluka langulukapo. Mutanchi wa kutanga Baibolo mu moba a Kivuluko uji mu kabuku ka Kubalaula Binembelo Moba Onse—2011, ne mu Kalenda wa 2011, kutendeka pa 12 April kufika pa 18 April, 2011. Kabiji twakonsha kubula Yehoba byo twanemeka buno bukuzhi kupichila mu lulombelo lwetu lwa kufuma panshi ya muchima. (1 Tesa. 5:17, 18) Tumwesha lusanchilo lwetu kupichila mu kutanwako ku kivuluko na mambo a kukokela mukambizho wa kwa Yesu. (1 Ko. 11:24, 25) Kunungapo, twakosha kulondela butemwe bukatampe bwa Yehoba ne kwita bantu bavula kwiya kutanwako pamo ne atweba.—Isa. 55:1-3.
4. Twafwainwa kukebesha kuba ka?
4 Bakalume ba Yehoba bamwesha lusanchilo, kechi bamona Kivuluko byonka byo bamona kupwila kukwabo ne. Ke kupwila kwakilamo kunema kwikalako pa mwaka! Kivuluko byo kibena kufwenya pepi, twayai twiumvwenga byonka biumvwine nyimbi wa masalamo wanembele kuba’mba: “Utakaike Yehoba, obewa muchima wami, kechi uvulame byanji byonse byawama byo umona ne.”—Sala. 103:2.