Kuvuluka Bukuzhi na Lusanchilo
1, 2. Mambo ka o twafwainwa kuvulukila bukuzhi na lusanchilo?
1 Kulondela mukambizho wa Yesu, bena Kilishitu kuzhokoloka ntanda yonse bakapwila na kuvuluka lufu lwa Yesu Kilishitu pa Kibelushi pa 22 March, 2008, panyuma ya kuzhika juba. (Luka 22:19; 1 Ko. 11:23-26) Twatundaikwa kuba bino na mambo a kukeba kumwesha lusanchilo lukatampe pa bintu byonse byaubiwe pa joja juba, myaka 1,975 yapitapo. Kupichila mu kusunga bulumbuluke kufika ne ku lufu lwa malwa pa kichi kyalumanamo, Yesu wazhijikile jizhina ja Shanji ne kumwesha’mba myendeleko ya kwa Satana ke yatutu.—Yoba 1:11; Mana. 27:11.
2 Mashi a Yesu aichikile atendekeshe lulayañano lupya kabiji ne kulengela bantu bambulwakoloka kwikala ke baana ba Lesa baji na luketekelo lwa kulama pamo ne Kilishitu mu Bufumu bwanji bwa mwiulu. (Yele. 31:31-34; Mako 14:24) Kunungapo, Lesa byo apaine Mwananji ye atemwisha kwikala ke kitapisho, kyajinga kiyukilo kya butemwe bwanji bukatampe bwa kutemwa bantu, byonka Yesu byo alumbulwijile Nikodema.—Yoano 3:16.
3. Nga aba bakatanwako ku Kivuluko bakamwenamo byepi?
3 Itai Bantu: Mwingilo Wetu wa Bufumu wa January witubujile’mba twafwainwa kunemba mutanchi wa bantu bo tukeba kuketa. Nanchi mwatendeka kwita boba baji pa mutanchi wenu nyi? Abya mubena kwinengezha kukengilako pakatampe mu mukwekele ukatatula pa 1 March wa kwita bantu ku Kivuluko nyi? Aba bakatanwako bakeumvwina byambo bya mu Binembelo bikakonsha kwibakwasha kwikala na lwitabilo mu bukuzhi butangijila ku bumi bwa myaka.—Loma 10:17.
4. Mambo ka o twafwainwa kwishila bukiji ku Kivuluko?
4 Basapwishi bonse bakatanwako bafwainwa kwiya bukiji kuba’mba bakatambwilenga bantu bakeya. Na mambo a kuba bantu beya na kutanwa ku Kivuluko bavula bingi, kyanema bingi kuta muchima aba bakatataka baiya kabiji ne bobatu batanwako ja kamo kamo ku kupwila.
5. Mwakonsha kunengezha byepi muchima wenu kukavuluka Kivuluko?
5 Nengezhai Muchima Wenu: Mu kabuku ka Kubalaulabalaula mu Binembelo pa Juba pa Juba—2008 ne mu Kalenda wa 2008 muji mutanchi wa kutanga Baibolo mu moba a Kivuluko kutatula pa 17 March. Kulanguluka pa bintu bikatampe byaubiwe mu moba akupelako a bumi bwa Yesu panopantanda, kukemukwasha kunengezha muchima wenu kuvuluka Kivuluko. (Ezela 7:10) Kulanguluka langulukapo na lulombelo pa ano mashimikila a mu Baibolo, kukemukwasha kubayisha lusanchilo lwenu lwa kusanchila butemwe bwa Yehoba ne bwa Mwananji bwa kunengezha bukuzhi.—Sala. 143:5.
6. Tukamwenamo byepi inge satwibikishako kubayisha lusanchilo lwetu lwa kusanchila bukuzhi?
6 Kivuluko byo kekinangijile, twayai twinengezhenga ne kukwashako bakwetu nabo kukatanwako ku kino kintu kyanema. Kuvuluka bukuzhi na lusanchilo kukakosesha bulunda bwetu ne Yehoba ne na Mwananji. (2 Ko. 5:14, 15) Kabiji kiketukwasha kwibalondela mu kumwesha butemwe bwa kwipana kwingijila bakwetu.—1 Yoano 4:11.