Kwashai Bantu Kumwenamo mu Bukuzhi
Kivuluko kya Lufu lwa kwa Kilishitu Kikekalako pa April 12
1. Jishinda ka jimo bantu ba kwa Yehoba mo bamweshesha lusanchilo lwabo lwa bukuzhi?
1 “Sante ekale kwi Lesa na mambo a kya bupe kyanji kyabulwa ne mwa kwikitelela.” (2 Ko. 9:15) Bino byambo bimwesha byo twiumvwa pa mambo a buwame ne butemwe bubula kwaluka bwa Lesa bo amwesha ku bantu banji kupichila mwi mwananji, Yesu Kilishitu. Kuno kusanta kwamweshiwa mu kino kinembelo, kukamwekesha kikatakata kimye kyo tukapwila pamo pa April 12 na kuvuluka Kivuluko kya lufu lwa kwa Kilishitu.
2. Bañanyi batanwa na bakalume ba Yehoba ku Kivuluko, kabiji bafwainwa kuba ka pa kuba’mba bamwenemo mu bukuzhi?
2 Bantu nobe mamilyonyi jikumi batanwa ku Kivuluko na bakalume ba Yehoba pa mwaka pa mwaka. Mu kuba bino, bamwesha lusanchilo lwa kitapisho kya Kilishitu. Nangwa byonkabyo, pa kuba’mba bamwenemo mu bukuzhi, bafwainwa kumwesha lwitabilo mu buno bukuzhi. (Yoa. 3:16, 36) Twakonsha kwibakwasha byepi kwikala na luno lwitabilo? Mu kino kimye kya Kivuluko, twakonsha kwibatundaika kwikala na lufunjisho lwa Baibolo lwa pa bunke ne kutanwa ku kupwila kwa kipwilo kwa mulungu ne mulungu. Akimonai ano mashinda.
3. Twakonsha kutendeka byepi lufunjisho lwa Baibolo na bantu bo tubena kwita kwiya ku Kivuluko?
3 Mafunjisho a Baibolo: Umvwe mwaita bantu baji na lusekelo ku Kivuluko, mambo ka a kubujila kweseka kutendeka nabo lufunjisho lwa Baibolo mu buku wa Baibolo Ufunjisha? Lumbulwilai muntu Kivuluko kupichila mu kuzhikula pa mapeja 206-8 kabiji ne kwisamba pa mutwe wa kuba’mba “Kijiilo kya Nkambo kya Mabanga—Kivuluko Kinemeka Lesa.” Mwakonsha kwisamba bino byambo pa lwendo lutanshi nangwa pa lwa bubiji, nangwa nobe lufunjisho lwa Baibolo lwa mu ka kimyetu kacheche. Umvwe mwapwisha bino byambo, muntu kampe wakonsha kusaka kufunda kitango 5, kiji na mutwe wa kuba’mba “Bukuzhi—Bupe Bwa Lesa Bwakilamo Kunema.” Inge kya kuba’mba lufunjisho lwa Baibolo lwatendeka, bwelai kunyuma ne kufunda bitango bitanshi bina bya uno buku.
4. Bañanyi bo twakonsha kutendeka nabo lufunjisho lwa Baibolo mu kino kimye kya Kivuluko?
4 Bañanyi bo twakonsha kutendeka nabo lufunjisho lwa Baibolo kwingijisha ino nsolomokelo iji peulu po? Kampe bakwenu bo mwingila nabo, bo mufunda nabo, nangwa bo mwikala nabo kipikipi baswa kwisamba nabo ino misambo. Balongo bakonsha kuya na kumona balume babula kwitabila ba banyenga. Kabiji kechi mwafwainwa kusula balongo benu ba ku mubiji babula ba Kamonyi ne. Kunungapo, tukakebesha kwita aba bo twapwilanga kala nabo kwiya ku Kivuluko. (Luka 15:3-7) Twayai tukwashe bonse bano kumwenamo mu bukuzhi.
5. Twakonsha kutundaika byepi bafunda Baibolo ne bakwabo baji na lusekelo lwa kukeba kufunda bukine kutanwa ku kupwila kwa kipwilo?
5 Kupwila kwa Kipwilo: Kivuluko ke kupwila kutanshi ko batanwako aba bafunda Baibolo bavula ne boba baji na lusekelo lwa kukeba kufunda bukine. Pano twakonsha kwibatundaika byepi kumwenamo mu kupwila kwetu kwa kipwilo kukwabo? Mwingilo Wetu wa Bufumu wa April 2005, peja 8, wapaine ano mashinda alondelapo: “Tongolai mutwe wa jashi ja mvula bantu jikekalako. Bamweshai byambo bikafunjiwa mu Lufunjisho lwa Kyamba kya Usopa kabiji ne Lufunjisho lwa Buku lwa Kipwilo. Lumbululai Sukulu ya Mwingilo wa Teokalasi ne Kupwila kwa Mwingilo. Umvwe muji na jashi mu sukulu, mwakonsha kupitulukamo nabo pamo. Babulai bishinka byanema byafunjiwe pa kupwila. Ingijishai bipikichala biji mu mabuku etu kwibakwasha kufwanyikizha bimweka. Jonka juba jitanshi ja lufunjisho lwa Baibolo, babulai kutanwako ku kipwilo.”
6. Mu mashinda ka abiji mo twakonsha kukwashisha bantu bakishinka kumwenamo mu bukuzhi?
6 Umvwe bantu bakishinka bekala na lufunjisho lwa Baibolo kimye kyonse ne kutanwa ku kupwila kwa kipwilo kimye kyonse, bakomenako bingi ku mupashi. Onkao mambo nanchi, twayai tutundaike bantu kumwenamo mu luno lunengezho lwa ku mupashi ne kumwenamo mu bupe bwa Lesa bwakilamo kunema—bwa bukuzhi.