Byo Twakonsha Kusanchila Lesa pa Bupe Bwanji Bukatampe

1. Mambo ka o twakonsha kusanchila Yehoba?

¹ Bukuzhi bwapaine Mwananji ye atemwisha Yehoba kyo kya bupe kikatampe pa bya “kupana byonse byawama.” (Yako. 1:17) Buno bukuzhi bwitulengela kwikala na mapesho avula, ne kulekelwa mambo. (Efi. 1:7) Kino kitulengela kusanta kikupu. Mu kimye kya Kivuluko tulanguluka langulukapo pa buno bupe bwanema.

2. Twakonsha kukwasha byepi kisemi kyetu ne atweba bene kwikala na lusanchilo pa bukuzhi?

² Kukwasha ba mu Kisemi Kwikala na Lusanchilo: Pa kuba’mba mukwashe kisemi kyenu kwikala na lusanchilo, nga mambo ka akubujila kwingijisha kimye kyenu kya Kupopwela kwa Kisemi kupituluka mu byambo byaamba pa bukuzhi mu milungu iji pepi na Kivuluko kikekalako pa March 30? Kabiji mwafwainwa ne kutangilanga pamo na kisemi Binembelo byo banengezha kutanga mu Moba a Kivuluko pa juba pa juba. Kabiji langulukainga pa byo mwamwenamo mu bukuzhi, ne byo bwalamata mweno yenu pe Yehoba, anweba bene, bakwenu ne kimye kya kulutwe. Kabiji kikemupelelako kufunjila jimo nyimbo ya katataka ibiji ya kukemba pa Kivuluko, namba 8 ne 109.—Sala. 77:12.

3. Twakonsha kumwesha byepi lusanchilo?

³ Byo Twakonsha Kumwesha Lusanchilo: Kwikala na lusanchilo kwitulengela kwamba ku bantu pe Yehoba ne pa butemwe bwanji bukatampe bwa kutuma Mwananji. (Sala. 145:2-7) Mu bañondo March, April, ne May, bisemi bimo bimwesha lusanchilo kupichila mu kutundaikako umo wa mu kisemi kwingilako bupainiya bwa kukwasha. Umvwe kino kechi kyakonsheka ne, abya mwakonsha ‘kupulushako kimye’ kya kwingilako pabaya mu mwingilo nyi? (Efi. 5:16) Lusanchilo luketulengela ne kutundaika bantu kushinkwako ku Kivuluko. (Lum. 22:17) Lengai mutanchi wa bantu bakwita, bo mukabwelako, mafunjisho a Baibolo, balongo benu, bo mwingila nabo, ne bo mwikala nabo pepi, kabiji ne kwingilako na ngovu mu mwingilo wa kusha tupepala twa kwichilapo bantu ku Kivuluko.

4. Ñanyi mashinda o twakonsha kwingijishishamo bulongo kimye kya Kivuluko?

⁴ Mu kimye kya Kivuluko twikalako na mwakumweshesha byo tusanchila Yehoba pa bupe bwanji bo apa bantu. Twayai twingijishe kino kimye kubaishako ne kumwesha lusanchilo pa bukuzhi ne pa byonse bya “bunonshi bwa Kilishitu bwabulwa kukonsheka kwibuyuka.”—Efi. 3:8.