Nanchi Mukengijisha Bulongo Kimye Nyi?
Kivuluko Kibena Kwiya Kitulengela Kumwesha Lusanchilo
1. Kivuluko kiketulengela kuba ka?
1 Kivuluko kikekalako pa 14 April kiketupa kimye kyawama kya kusanchila Yehoba pa buwame bwa bwanji. Jishimikila jiji mu Luka 17:11-18 jimwesha Yehoba ne Yesu byo bamona lusanchilo. Pa bantu ba mbumba jikumi bo abukile Yesu, umotu ye waingijishe bulongo kimye kyanji kuya na kumusanchila. Mu kimye kya kulutwe, bupe bwa bukuzhi bukalengela kubukwa kwa myaka ku bikola byonse ne kuleta bumi bwa myaka ne myaka. Pa juba pa juba, tukamusanchilanga Yehoba pa ano mapesho o aketubila. Pano, tukamwesha byepi lusanchilo mu milungu ibena kwiya?
2. Twakonsha kuba byepi pa kuba’mba twikale na lusanchilo pa bukuzhi?
2 Ikalai na Muchima wa Kusanta: Kusanta kufuma panshi ya muchima. Mutanchi wawama wa Kutanga Baibolo mu Moba a Kivuluko uji mu kalenda wa 2014 ne mu kabuku ka Kubalaula Binembelo Moba Onse uketukwasha kubaisha lusanchilo lwetu pa bukuzhi. Mambo ka a kubujila kutangila pamo na kisemi bino byambo? Kuba bino, kukabaisha lusanchilo lwetu pa bukuzhi. Kabiji kino kiketulengela kwikala na byubilo byawama.—2 Ko. 5:14, 15; 1 Yoa. 4:11.
3. Mu ñanyi mashinda mo twakonsha kumweshesha lusanchilo lwetu kimye kya Kivuluko?
3 Mweshainga Lusanchilo: Kusanta kumwekela mu byubilo. (Kolo. 3:15) Muntu wajinga na mbumba wajinga na muchima wa kusanta wayile na kukeba Yesu kuba’mba amusanchile. Kwa kubula nangwa kuzhinaukatu ne, washimikizhe bakwabo na lusekelo byo bamubukile. (Luka 6:45) Nanchi lusanchilo lwetu pa bukuzhi luketulengela kwingila na mukoyo mukwekele wa kwita bantu ku Kivuluko nyi? Kwingilako bupainiya bwa kukwasha nangwa kwingilako pakatampe mwingilo wa kusapwila mu kimye kya Kivuluko ke jishinda jimo ja kumwesheshamo lusanchilo. Pa juba ja Kivuluko, muchima wa kusanta uketutundaika kutambwila benyi ne kumona kuba’mba twipana kukumbula mepuzho abo onse.
4. Twakonsha kuba byepi pa kuba’mba kimye kya Kivuluko kya uno mwaka kiketuletele lusekelo?
4 Nanchi kino Kivuluko kyo kikapelako nyi? (1 Ko. 11:26) Kechi twayuka ne. Bino kyo twayuka ke kya kuba’mba inge kyapita, ko kuba’mba kimye kya kumwesheshamo lusanchilo kyapita. Nanchi kino kimye mukengijisha bulongo nyi? Mwane byambo byetu ne byo tulanguluka bisangajikenga Yehoba Mpanyi wa bukuzhi.—Sala. 19:14.