Sangalalai ne Kunengezha Bulongo Kivuluko
1. Kimye kya Kivuluko ke kimye kya kuba ka?
1 Kivuluko kikekalaako pa Kibiji pa 26 March, 2013 kitusangajika bingi mambo kitulengela kulanguluka pa jishinda ja lupulukilo Lesa jo anengezha. (Isa. 61:10) Kusangalala kuketulengela kunengezha bulongo Kivuluko. Mu ñanyi jishinda?
2. Ñanyi kintu kitulengela kunengezha bulongo Kivuluko?
2 Nengezhai Bulongo: Kijiilo kya Nkambo kya Mabanga kyanema bingi kabiji kechi kyakatazha kunengezha ne. Nangwa byonkabyo, twafwainwa kutatwilako jimo kunengezha pa kuba’mba tubule kushako bintu bimo. (Mana 21:5) Mwafwainwa kusala mpunzha yawama ne kimye kyafwainwa bulongo. Mwafwainwa kunengezha bulongo bipashañano. Kabiji mwafwainwa kuwamishisha jimo mpunzha. Ñambi wafwainwa kwinengezha bulongo, bakupishamo bipashañano ne baasha bafwainwa kuyukila jimo byakuba. Bino byonse mwafwainwa kwibinengezha bulongo. Kusanchila Lesa pa mambo a bulume bwanji bwa kwitupulusha kupichila mu bukuzhi kwitulengela kunengezha bulongo Kivuluko.—1 Pe. 1:8, 9.
3. Twakonsha kuteshako byepi muchima ku Kijiilo kya Nkambo kya Mabanga?
3 Kuteshapo Muchima: Pa kuba’mba tuyuke Kivuluko byo kilumbulula twafwainwa kutapo muchima kufunda. (Eze. 7:10) Twafwainwa kunengezha kimye kya kutanga Baibolo mu moba a Kivuluko ne kulanguluka pa moba a kwa Yesu apeleleko kwikala pano pa ntanda. Kulanguluka languluka pa kwipana kwa kwa Yesu kuketulengela kumulondela.—Nga. 2:20.
4. Ñanyi bintu bitulengela kwikala na lusekelo umvwe ketulanguluke pa bukuzhi?
4 Lufu lwa kwa Yesu lwalengela bantu kuyuka jishinda Yehoba jo alaminamo ne kwitukasulula ku bundengamambo ne lufu. (1 Yoa. 2:2) Lwitulengela kwikala balunda na Lesa ne kwitushinkwila jishinda ja bumi bwa myaka. (Kolo. 1:21, 22) Kabiji kwitulengela kwikela monka mwayila kwipana kwetu kwi Yehoba ne kulondela Kilishitu. (Mat. 16:24) Onkao mambo mwafwainwa kwinengezha kutanwa ku Kivuluko ne kwikala na lusekelo.