Nanchi Mubena Kwinengezha ku Kivuluko Nyi?
Pajinga pa Nisanyi 13 mu mwaka wa 33 C.E. Yesu wayukile’mba washajiletu na juba jimo ja kwikala na balunda nanji saka bakyangye kumwipaya. Waikele na Kijiilo kya Lupitailo nabo pamo ne kutendeka kijiilo kikwabo kitelwa’mba Kijiilo kya Nkambo kya Mabanga. Kino kijiilo kyanema kyakebewenga kunengezha. Onkao mambo, watumine Petelo ne Yoano kuya na kunengezha. (Luka 22:7-13) Kufumatu kyokya kimye, bena Kilishitu pa mwaka pa mwaka bavuluka ne kunengezha kino Kivuluko. (Luka 22:19) Ñanyi bintu byo twafwainwa kuba pa kunengezha Kivuluko kikekalako pa 3 April?
Bintu byafwainwa kunengezha Basapwishi:
Inengezhezhai jimo kwingilako pakatampe mu mukwekele wa kwita bantu ku Kivuluko.
Nengezhai mutanchi wa bantu bo mufunjisha Baibolo, bakilongo, bo mufunda nabo ku sukulu, bo mwingila nabo ne bakwenu ne kwibeta.
Tangainga ne kulanguluka langulukapo pa binembelo bya kutanga Baibolo mu moba a Kivuluko.
Inengezhai kutambwila benyi bakeyanga ku Kivuluko.