Nanchi Mubena Kwinengezha Kutanwa ku Kivuluko Nyi?

Kijiilo kya Lupitailo kyapeleleko mu bwikalo bwa kwa Yesu pano pa ntanda kyanemene bingi. Na mambo a kuba’mba lufu lwanji lwafwenyenye pepi, wanengezhezhenga kwikala na Kijiilo kya Lupitailo na batumwa ne kutendekesha Kijiilo kya Nkambo kya Mabanga kyo bakekalanga nakyo pa mwaka pa mwaka. Watumine Petelo ne Yoano kuya na kunengezha kibamba mwakwikela na kino kijiilo. (Lu 22:7-13; monai kipikichala kiji pa nkupiko.) Kino kibena kwituvululamo atweba bonse kuba’mba twafwainwa kwinengezha kutanwa ku Kivuluko kikekalako pa 27 March. Bipwilo byavula byanengezha kala bimpashañano ne bintutu bikwabo bikebewa. Pano twakonsha kuba byepi pa muntu pa muntu pa kwinengezha kutanwa ku Kivuluko?

Baishai lusanchilo lwenu pa lufu lwa kwa Yesu. Tangainga byepelo biji mu kutanga Baibolo kwa mu moba a Kivuluko ne kulanguluka langulukapo. Mutanchi wa bino byepelo uji mu Kabuku ka Kubalaula Binembelo Moba Onse. Kabiji Bya Kulumbulula B12 mu Baibolo wa Binembelo bya Ntanda Ipya mo muji mutanchi wa byepelo bya kutanga muji bishinka byavula. (Monai Mutanchi wa Kupwila kwa Bwikalo ne Mwingilo wa April 2020.) Bisemi byakonsha kutaana bikwabo bya kwisambapo pa kupopwela kwa kisemi mu Watch Tower Publications Index nangwa mu Buku wa Kukwasha Bakamonyi ba kwa Yehoba Kukebakeba Bishinka.

Itaiko Bantu. Ingilaiko na mukoyo mu mukwekele wa kwita bantu. Langulukai pa bantu bo mwakonsha kwitako. Pa bano pakonsha kwikala bo mwanengezha kubwelako, bo mwafunjishanga kala Baibolo, bakinkalankulo ne balongo benu. Bakulumpe mu kipwilo bakamona kuba’mba baitako ne bonse bakooka. Inge awo muntu kechi wikala ku mpunzha ko mwikala ne, wakonsha kuyuka kimye ne mpunzha inge wachinta pa BAKAMONYI BA KWA YEHOBA pa jipa jitanshi pa keyala wetu wa intaneti pa jw.org ne kuchinta pa Kivuluko.

Ñanyi bintu bikwabo byo mwakonsha kuba pa kwinengezha kutanwa ku Kivuluko?