Nanchi Muji na Mupashi Wakwipana Nyi?

¹ Kusanchila Yesu Kilishitu pa bintu byawama byo aubila bantu kwafwainwa kwitulengela kwingijisha mana ne ngovu, ne byubilo byetu mu jishinda ja kwipana. Binembelo bitusashijila’mba: “Mulambule mibiji yenu, ke kitapisho kyumi, kyazhila, kyaitabilwa kwi Lesa.” (Lo. 12:1) Kwipima anweba bene pa kimye ne pa kimye kukemukwasha kumona umvwe mubena kumwesha mupashi wa yewo mutundu kwesakana na papelela bulume bwenu.

² Mukukeba Kuyuka Baibolo: Nanchi mwasalululapo kimye kya kutanga Baibolo kwa pa bunke bwenu ne kwiisambijila kimye kyonse nyi? Nanchi mwalamachila ku yewo mutanchi nyi? Nanchi mwipizha kunengezha mitanchi yonse ya kusambijilapo mu kipwilo nyi? Umvwe mwi mutwe wa kisemi, nanchi muji na jisambijilo ja Baibolo ja kimye kyonse na ba mu nzubo yenu nyi? Pakuba’mba mube bino bintu pakebewa kupana kimye kyo mwashi mwingijishe nakutamba TV nangwa kyo mwashi mwingijishe pa kompyuta nangwa mu bintu bikwabo byo musaka. Mu jishinda jonse jo mwakonsha kubilamo bino bintu, byo mwipana kala, yukai kuba’mba kimye kyo mwaingijisha na kufunda Kyambo kya kwa Lesa kyakonsha kwimukwasha kutangijilwa ku bumi bwa myaka ne myaka!—Yoano 17:3.

³ Mu Kufunjisha Bana Benu: Kimye kyawama kutendeka kufunda jishinda ja kwipana ke kimye kya kubwanyike. Funjishai bana benu kuba’mba byonka byo kuji kimye kya kukaya, kuji ne kimye kya mingilo ya ku mubiji ne kimye kya mingilo ya teokalatiki. (Efi. 6:4) Bapai mingilo imo yo bafwainwa kwingila pa nzubo. Nengezhai mutanchi wa kimye kyonse wa kwingila nabo mu butumwa. Koseshai mikambizho yenu kupichila mu kumwesha kya kumwenako kyenu kyawama.

⁴ Mu Mingilo ya pa Kipwilo: Kipwilo kyakonsha kuwama umvwe kyakuba bonse bajimo bepana abo bene kwingila mingilo ya kuba’mba bonse bamwenemo. (Hebe. 13:16) Nanchi kyakonsheka kwi anweba kwingila kimye kikatampe mu mwingilo wa kusapwila Bufumu ne kupanga bana ba bwanga nyi? Nanchi mwakonsha kwitemenwa kukwasha balwazhi nangwa bakikulumpe kimye kimo muñendelo pa kuya na kupwila nyi?

⁵ Yesu saka akyangye kupana kitapisho kyapelako kya bumi bwanji bwa bumuntu, wafunjishe bana banji ba bwanga kukebesha bya Bufumu patanshi, bino apa bya ku mubiji byalondela pa nyuma mu bwikalo bwabo. (Mat. 6:33) Inge twatwajijila kulonda mupashi wakwipana wa byonka bye uketuletela lusekelo lukatampe byo tubena kutwajijila kwingijila Yehoba na kisangajimbwe.