‘Ikalai Bampanyi ba Kukwashañana’
1 Bitota bya myaka yapitapo, mutumwa Paulo wakambizhe Timoti kutundaika bakwabo baitabila ‘kuba byawama, ne kwikala banonshi ba mu mingilo yawama, kwikala bampanyi ba kukwashañana.’ (1 Timo. 6:18) Kabiji Paulo wavulwile bena Kilishitu bakina Hebelu kubula kuvulama “kuba byawama ne kupana bya kupana [ku bakwabo, NW].” (Hebe. 13:16) Mambo ka o anembejile ino mikambizho? Mambo wayukile kuba’mba “lukumo, ne buneme, ne mutende bikekala ku bonse boba byawama.”—Lo. 2:10.
2 Na mambo a Bumulenga bwanji, Yehoba Lesa ye Mwina bintu byonse. (Lum. 4:11) Atweba tusanchila byo abena kwitubila kupichila mu bintu byanji. Nangwa kyakuba bantu bavula kechi ba musanchila ne, Mwine Wakila utwajijila kuswisha bonse kumwenamo mu bupe bo apana kuba’mba batwajijile kwikala bomi. (Mat. 5:45) Wapaine Mwananji yeatemwisha kuba’mba twikale na bumi bwa myaka ne myaka. Nanchi butemwe bo twamweshiwa kechi bwakonsha kwitutundaika kwikala na lusanchilo lwa kwikala bampanyi ku bantu bakwetu nenyi?—2 Ko. 5:14, 15.
3 Nanchi Ñanyi Bintu byo Twakonsha Kupana? Ke kintu kitufwainwa kwingijisha nsabo yetu yonse yo tuji nayo mu jishinda jitokesha Lesa pa muchima. Kyakine tubena kukeba kutundaika mwingilo wa Bufumu wa ntanda yonse lwa ku mubiji ne lwa ku mupashi. Mu bukishinka, mambo awama yo nsabo yanema muntu yo akonsha kunonka, “mambo bo bulume bwa [kwa] Lesa buleta lupulukilo.” (Lo. 1:16) Kupichila mu bupanyi bwa kwingijisha bimye byetu ne nsabo yetu kila-ñondo pa kwikala na lubaji mu mwingilo wa busapwishi ne wa kusambijisha, twakonsha kupa bakwetu nsabo ya ku mupashi, ne kwibalengela kwikala na bumi bwa myaka ne myaka.
4 Yehoba umvwa bingi bulongo inge twakwasha bayanji. Witulaya mapesho, kwituvululako’mba: “Bya bunonshi kechi bikwasha muntu mu juba ja bukaji ne; pakuba bololoke bupokolola muntu ku lufu.” (Mana. 11:4; 19:17) Kutundaika mwingilo wa Bufumu lwa ku mubiji ne kwingila papelela bulume bwetu mu kusapwila mambo awama o mashinda awama bingi o twakonsha kumwesheshamo kuba’mba kine kine twibampanyi ba kukwashañana.