Kukusa Nkunwa Yavula Kuleta Mfweto
1 Atweba bonse tupembelela kufikizhiwa kwamilaye ikatampe iji mu Byambo bya Lesa. Nangwatu pakino kimye, Yehoba witupa mfweto ituletela lusekelo mubwikalo bwetu. Nangwa byonkabyo, kipimo kyamfweto yetu yotumwenamo pamuntu pamuntu kyaimena pakwibikishako kwetu mumwingilo. Byonka byaambile mutumwa Paulo amba, ‘awa ukusa nkunwa yavula ukanowa kavula.’ (2 Ko. 9:6) Langulukai pamashinda abiji mwingijila ano mafunde.
2 Mwingilo Wetu: Kimye kyonse kyotusapwila mambo awama kubantu kituletela bingi mfweto yavula. (Mana. 3:27, 28) Kyawama bingi bavula byobabena kukusa nkunwa yavula kupichila mukusapwilako kimye kyabaya mumwingilo wamubujimi, kuvwangakotu nekwingilako bupainiya bwakukwasha nangwa bwakimye kyonse. Atweba bonse twakonsha kukusa nkunwa yavula umvwe twatako muchima kubwela kubonse bamwesheshe lusekelo lwakukeba kufunda bukine kabiji nekwipuzha boba bakeba lufunjisho lwa Baibolo ponse pamweka jishuko. (Loma 12:11) Kwibikako atwe bene muano mashinda mufuma byawama bikoseshañana nelusekelo lukatampe mumwingilo wetu.
3 Kutundaika Bufumu bwa Lesa: Paulo waambile pamambo a ‘kukusa nkunwa yavula’ pamambo abumpanyi bwabintu byakumubiji. (2 Ko. 9:6, 7, 11, 13) Ano moba, paji byavula byotwakonsha kuba nangovu ne nsabo yetu kutundaikilamo Bufumu. Twakonsha kukwasha mumwingilo wakushimika Mazubo a Bufumu ne Mazubo Akatampe a Kupwilamo. Kabiji twakonsha kwipana atweba bene kuwamisha nekulama bulongo ano mapunzha ampopwelo yakine. Kunungapo, twakonsha kupanako bupe bwamali akwingijisha kupotamo bikebewa pakipwilo kyotujimo kabiji neakukwasha mwingilo wakusapwila mambo a Bufumu mwaya ntanda yonse newakukwasha bantu amba baluke kebaana babwanga. Atweba bonse pamuntu pamuntu byotwingila mwingilo wetu, tusekela bingi pakumona bibusa bya Yehoba byobyavula pauno mwingilo wanji!—Mala. 3:10; Luka 6:38.
4 Byambo bya Lesa bitukambizha ‘kuba byawama, ne kwikala banonshi ba mumingilo yawama, kwikala bampanyi bakukwashañana.’ Umvwe twaumvwina uno mukambizho, tumona mfweto yavula bingi ano moba, kabiji pakimye kimotu ‘twitujila jimo kitendekesho kyawama kya myaka ikeya.’—1 Timo. 6:18, 19.