Bantu Baji mu Kizumba!

¹ Baibolo ilondolola mu kumvwanyika kuba’mba Yehoba ukeba ‘bantu bonse kupuluka.’ Nangwa kikale byonkabyo, bwikalo bwa mu kimye kya kulutwe bwa bantu bonse ba pano pa ntanda bwaimana pa byubilo byo tumwesha kwi Yehoba Lesa ne ku Bufumu bwanji buji mu bukalama bwa kwa Yesu Kilishitu. Byubilo byawama byafwainwa kufumatu mu ‘kuyuka [“kwaluñama,” NW] kwa bya bukine.’ (1 Timo. 2:3, 4) Byo tujimuna bantu kuba’mba bubi katatakatu bukafumishiwepo pano pa ntanda pa kuba’mba ntanda ipya ya bololoke ya kwa Lesa ikapingishiwepo, twapewa mwingilo wanema wa kupulusha bantu.—Mat. 24:14; 28:19, 20; Lo. 10:13-15.

² Mambo ka a Kupelawizhizha? Yesu wajimwine pa mambo a ‘malwa akatampe akamweka, a kuba kala kechi kwajingapo akwabo a byonkabyo ne, nangwa kufuma ku ntendekelo ya pano pa ntanda kufika ne lelo jino.’ (Mat. 24:21) Ano malwa akafika pa kankomo pa Amagedonyi. (Lum. 16:16) Pakachi ka bantu bavula bakafwa na mambo akubula kumvwina mambo awama pa kekala balongo betu babula kwitabila, bakwetu ba pepi, bakwetu ba pa nkito, bakwetu motufunjila ku sukulu ne bo twiyukatu nabo. Nangwa kikale byonkabyo kijikila kyo tuji nakyo ke kya kukwasha “bantu bonse” byonka Lesa byo amwesheshe butemwe bwanji ku bonse ba pano pa ntanda kupichila mu kupana Mwananji aye Yesu Kilishitu kwikala nkuulo ya bonse. (Yoa. 3:16) Na mukoyo twafwainwa kweseka kubula bonse kunyemena ku mpunzha ya kufyamamo ya kwa Lesa. Kupichila mu kwingila na muchima yense mwingilo wetu wa busapwishi, twakonsha kuchinuzhuka kushinkimanwa ku mashi abo.—Ezi. 33:1-7; 1 Ko. 9:16.

³ Nanchi Kikonkwanyi Kyetu Kika? Buneme bwa mwingilo wa busapwishi bwakonkomwenwapo mu Kyambo kya kwa Lesa. Byonka byaambile mutumwa Paulo kuba’mba, “butemwe bwa Kilishitu bo bwitwingijisha” pa kuba’mba twikele mwayila mashinda a kwa Lesa. (2 Ko. 5:14) Mu kunungapo, Ulupungu lwa kwa Kalinda javula lukonkomwena pa mukambizho wetu wa kusapwila. Butumwa Bwetu bwa Bufumu butwajijila kukambizha bya kwingila uno mwingilo wa busapwishi. Bakulumpe mu kipwilo bakokozha uno mwingilo ne kwitutundaika betutundaika kwikala na lubaji mu uno mwingilo. Basapwishi bakwetu betwita kuba’mba twingile nabo mu butumwa. Tumvwa byavula pa mambo a kunengezha ñambilo ya kwingijisha mu busapwishi, bya kutambika magazini ne mabuku akwabo, byo tukamba ku bipempu bwa kubwelako, bya kutangijila masambijilo a Baibolo, ne bya kwingijisha ka kimye kaji konse mu busapwishi. Bino byonse bitukwasha kufikizha kikonkwanyi kya kupulusha bantu.—1 Ko. 9:22, 23; Efi. 1:13.